റിയാദ്: മലയാള സിനിമയിലെ ഇതിഹാസ താരങ്ങളായ മമ്മൂട്ടിയും മോഹന്ലാലും നീണ്ട ഇടവേളയ്ക്ക് ശേഷം ഒന്നിച്ച 'പാട്രിയറ്റ്' സിനിമയ്ക്ക് സൗദി അറേബ്യയില് വന് വരവേല്പ്പ്. മമ്മൂട്ടി ഫാന്സ് വെല്ഫെയര് അസോസിയേഷന് ഇന്റര്നാഷണല് റിയാദ് കമ്മിറ്റിയും, ചാക്കോച്ചന് ലൗവേഴ്സ് & ഫ്രണ്ട്സ് റിയാദും സംയുക്തമായാണ് റീല് സിനിമാസില് മെഗാ ഫാന്സ് ഷോ സംഘടിപ്പിച്ചത്.
രണ്ട് സമയങ്ങളിലായി നടന്ന ഷോകള്ക്ക് സിനിമാപ്രേമികള്ക്കിടയില് വലിയ സ്വീകരണമാണ് ലഭിച്ചത്. വര്ത്തമാനകാലത്തും ഭാവിയിലും നമ്മള് അഭിമുഖീകരിക്കേണ്ടി വന്നേക്കാവുന്ന സങ്കീര്ണ്ണമായ വിഷയങ്ങളെ അതിമനോഹരമായാണ് സംവിധായകന് മഹേഷ് നാരായണന് തിരശീലയില് എത്തിച്ചിരിക്കുന്നത്. മമ്മൂട്ടി, മോഹന്ലാല് എന്നിവര്ക്കൊപ്പം കുഞ്ചാക്കോ ബോബന്, ഫഹദ് ഫാസില് എന്നിവരും മികച്ച പ്രകടനമാണ് കാഴ്ചവെച്ചിരിക്കുന്നത്.
ഇജാസ് ബിനു കോര്ഡിനേറ്റ് ചെയ്ത പരിപാടിക്ക് മമ്മൂട്ടി ഫാന്സ് റിയാദ് കമ്മിറ്റി പ്രസിഡന്റ് നൗഷാദ് ചിറ്റാര്, ചാക്കോച്ചന് ലൗവേഴ്സ് പ്രസിഡന്റ് അലക്സ് കൊട്ടാരക്കര, കോര്ഡിനേറ്റര് സിയാദ്, സെക്രട്ടറി സജീര് ചിതറ, മമ്മൂട്ടി ഫാന്സ് ഭാരവാഹികളായ അന്വര് ഷാ പൊന്നാനി, കബീര് കാടന്സ് എന്നിവര് നേതൃത്വം നല്കി. മമ്മൂട്ടി ഫാന്സ് സെന്ട്രല് കമ്മിറ്റി പ്രസിഡന്റ് നൗഷാദ് കോട്ടക്കല് ചടങ്ങില് ആശംസകള് അര്പ്പിച്ചു.
മെഗാ ഫാന്സ് ഷോയുടെ വിജയത്തിനായി മല്ബറീസ് ഫലൂഡ, വൈറ്റ് പേള് റെസ്റ്റോറന്റ്, വിസ്മയ റെസ്റ്റോറന്റ്, മിഡ് ടൗണ് സ്ട്രീറ്റ് എന്നിവരും പങ്കാളികളായി.
