ജറൂസലേം/ദുബായ്: ഇറാന്-ഇസ്രായേല് യുദ്ധത്തിനിടെ യുണൈറ്റഡ് അറബ് എമിറേറ്റ്സ് (യുഎഇ) സന്ദര്ശിച്ചതായും പ്രസിഡന്റ് ഷെയ്ഖ് മുഹമ്മദ് ബിന് സായിദുമായി കൂടിക്കാഴ്ച നടത്തിയതായും ഇസ്രായേല് പ്രധാനമന്ത്രി ബെഞ്ചമിന് നെതന്യാഹു. എന്നാല്, ഈ അവകാശവാദം പൂര്ണ്ണമായും നിഷേധിച്ച യുഎഇ, ഇത്തരമൊരു സന്ദര്ശനം നടന്നിട്ടില്ലെന്നും വാര്ത്തകള് അടിസ്ഥാനരഹിതമാണെന്നും വ്യക്തമാക്കി. ഇതോടെ ഇരുരാജ്യങ്ങളും തമ്മില് അസാധാരണമായ നയതന്ത്ര തര്ക്കം ഉടലെടുത്തിരിക്കുകയാണ്.
ഈ വര്ഷം മാര്ച്ച് 26-ന് ഒമാന് അതിര്ത്തിക്കടുത്തുള്ള അല് ഐന് നഗരത്തില് വെച്ച് നെതന്യാഹുവും ഷെയ്ഖ് മുഹമ്മദും മണിക്കൂറുകളോളം ചര്ച്ച നടത്തിയെന്നാണ് ഇസ്രായേല് പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയില് പറയുന്നത്. ഇരുരാജ്യങ്ങളും തമ്മിലുള്ള ബന്ധത്തില് ഇതൊരു 'ചരിത്രപരമായ വഴിത്തിരിവ്' ആണെന്നും അവര് വിശേഷിപ്പിച്ചു.
നെതന്യാഹുവിനെ രാജകീയ ബഹുമതികളോടെയാണ് സ്വീകരിച്ചതെന്നും വിമാനത്താവളത്തില് നിന്ന് കൊട്ടാരത്തിലേക്ക് ഷെയ്ഖ് മുഹമ്മദ് ബിന് സായിദ് നേരിട്ടാണ് കാര് ഓടിച്ചു കൊണ്ടുപോയതെന്നും നെതന്യാഹുവിന്റെ മുന് വക്താവ് സിവ് അഗ്മണ് ഫേസ്ബുക്കിലൂടെ വെളിപ്പെടുത്തി.
ഇസ്രായേലിന്റെ വാദങ്ങള് തള്ളിക്കൊണ്ട് യുഎഇ വിദേശകാര്യ മന്ത്രാലയം ശക്തമായ ഭാഷയില് പ്രതികരിച്ചു. 'അബ്രഹാം ഉടമ്പടിയുടെ പശ്ചാത്തലത്തില് ഇസ്രായേലുമായുള്ള യുഎഇയുടെ ബന്ധം പരസ്യമാണ്. സുതാര്യമല്ലാത്തതോ ഔദ്യോഗികമായി പ്രഖ്യാപിക്കാത്തതോ ആയ യാതൊരു രഹസ്യ നീക്കങ്ങളും യുഎഇ നടത്തിയിട്ടില്ല,' മന്ത്രാലയം വ്യക്തമാക്കി. തെറ്റായ രാഷ്ട്രീയ വിവരണങ്ങള് പ്രചരിപ്പിക്കരുതെന്നും മാധ്യമങ്ങള് കൃത്യത പാലിക്കണമെന്നും യുഎഇ ആവശ്യപ്പെട്ടു.
യുഎഇ നിഷേധിക്കുമ്പോഴും, ഇറാനില് നിന്നുള്ള മിസൈല്-ഡ്രോണ് ആക്രമണങ്ങളെ പ്രതിരോധിക്കാന് ഇസ്രായേല് രഹസ്യാന്വേഷണ ഏജന്സികളായ മൊസാദിന്റെയും ഷിന് ബെറ്റിന്റെയും തലവന്മാര് യുഎഇ സന്ദര്ശിച്ചതായി അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നു. യുഎഇയുടെ പ്രതിരോധം ശക്തമാക്കാന് 'അയണ് ഡോം' മിസൈല് പ്രതിരോധ സംവിധാനവും അത് പ്രവര്ത്തിപ്പിക്കാന് സൈനികരെയും ഇസ്രായേല് അയച്ചതായി യുഎസ് ഉദ്യോഗസ്ഥരും സ്ഥിരീകരിച്ചിട്ടുണ്ട്.
നെതന്യാഹുവിന്റെ സന്ദര്ശന വാര്ത്ത പുറത്തുവന്നതിന് പിന്നാലെ യുഎഇക്കെതിരെ ഭീഷണിയുമായി ഇറാന് രംഗത്തെത്തി. ഇസ്രായേലുമായി ചേര്ന്ന് ഇറാനെതിരെ നീങ്ങുന്നത് 'ക്ഷമിക്കാനാവാത്ത തെറ്റാണെന്നും' ഇതിന് മറുപടി നല്കേണ്ടി വരുമെന്നും ഇറാന് വിദേശകാര്യ മന്ത്രി അബ്ബാസ് അരാഗ്ചി മുന്നറിയിപ്പ് നല്കി.
2020-ലെ അബ്രഹാം ഉടമ്പടിക്ക് ശേഷം നെതന്യാഹു യുഎഇയിലേക്ക് നടത്താനിരുന്ന പല ഔദ്യോഗിക സന്ദര്ശനങ്ങളും രാഷ്ട്രീയ കാരണങ്ങളാല് മുമ്പ് റദ്ദാക്കപ്പെട്ടിരുന്നു. ഈ പശ്ചാത്തലത്തില് ഇപ്പോള് പുറത്തുവന്ന 'രഹസ്യ സന്ദര്ശന' വാര്ത്ത ആഗോളതലത്തില് വലിയ പ്രാധാന്യത്തോടെയാണ് നോക്കിക്കാണുന്നത്.
Related News
