ദുബായ്- മോഹന്‍ലാല്‍-ജീത്തു ജോസഫ് കൂട്ടുകെട്ടില്‍ പുറത്തിറങ്ങിയ 'ദൃശ്യം 3' തിയേറ്ററുകളില്‍ വന്‍ കുതിപ്പ് തുടരുന്നു. റിലീസ് ചെയ്ത് രണ്ട് ദിവസങ്ങള്‍ക്കുള്ളില്‍ ചിത്രം ലോകമെമ്പാടുമുള്ള ബോക്‌സ് ഓഫീസില്‍നിന്ന് 76 കോടിയിലധികം രൂപയാണ് സ്വന്തമാക്കിയത്. ഇന്ത്യയേക്കാള്‍ കൂടുതല്‍ വിദേശ വിപണികളിലാണ് ചിത്രത്തിന് വന്‍ വരവേല്‍പ്പ് ലഭിക്കുന്നത്.

ചിത്രത്തിന്റെ നിര്‍മ്മാണ കമ്പനിയായ ആശീര്‍വാദ് സിനിമാസ് പുറത്തുവിട്ട വിവരങ്ങള്‍ പ്രകാരം ആദ്യ ദിനം മാത്രം ചിത്രം 50.34 കോടി രൂപയാണ് ആഗോളതലത്തില്‍ ഗ്രോസ് കളക്ഷനായി നേടിയത്. റിലീസ് ചെയ്ത വ്യാഴാഴ്ചയ്ക്ക് ശേഷം വെള്ളിയാഴ്ചയും മികച്ച പ്രതികരണമാണ് ചിത്രത്തിന് ലഭിച്ചത്. ബോക്‌സ് ഓഫീസ് ട്രാക്കിംഗ് വെബ്സൈറ്റായ സാക്‌നിലിന്റെ കണക്കുകള്‍ പ്രകാരം ഇന്ത്യയില്‍ നിന്ന് രണ്ട് ദിവസം കൊണ്ട് ചിത്രം 26.9 കോടി രൂപ നെറ്റ് കളക്ഷനും (ഏകദേശം 30 കോടിയിലധികം രൂപ ഗ്രോസ് കളക്ഷന്‍) വിദേശത്തുനിന്ന് 45 കോടി രൂപയും നേടിയിട്ടുണ്ട്. ഇതോടെയാണ് രണ്ട് ദിവസത്തെ ആകെ തുക 76.18 കോടി രൂപയായി ഉയര്‍ന്നത്.

നിരൂപകരില്‍ നിന്ന് സമ്മിശ്ര പ്രതികരണമാണ് ലഭിച്ചതെങ്കിലും ജോര്‍ജുകുട്ടിയുടെയും കുടുംബത്തിന്റെയും മൂന്നാം ഭാഗം കാണാന്‍ തിയേറ്ററുകളിലേക്ക് പ്രേക്ഷകരുടെ വന്‍ ഒഴുക്കാണ് അനുഭവപ്പെടുന്നത്. ബുക്ക് മൈ ഷോ വഴി മാത്രം രണ്ടാം ദിവസം നാല് ലക്ഷത്തിലധികം ടിക്കറ്റുകളാണ് വിറ്റുപോയത്. ആന്റണി പെരുമ്പാവൂര്‍ നിര്‍മ്മിച്ച ചിത്രത്തില്‍ മീന, അന്‍സിബ ഹസ്സന്‍, എസ്തര്‍ അനില്‍, സിദ്ദിഖ്, മുരളി ഗോപി, ബിജു മേനോന്‍ തുടങ്ങിയ താരനിര അണിനിരക്കുന്നുണ്ട്. ചിത്രം വലിയൊരു വിജയത്തിലേക്ക് കുതിക്കുമ്പോള്‍, ഇതിനകം തന്നെ ഒരു 'ദൃശ്യം 4' നുള്ള സൂചനകള്‍ നല്‍കിക്കൊണ്ടാണ് ദൃശ്യം 3 അവസാനിക്കുന്നത് എന്നതും പ്രേക്ഷകര്‍ക്കിടയില്‍ ചര്‍ച്ചയായിട്ടുണ്ട്.