മക്ക- സൗദി മീഡിയ മന്ത്രാലയം സംഘടിപ്പിച്ച 'ഹജ്ജ് മീഡിയ ഹബ്ബിന്റെ' മൂന്നാം പതിപ്പിന് മക്കയില് വിജയകരമായ സമാപനം. ഗ്രാന്ഡ് ഹജ്ജ് സിമ്പോസിയവുമായി സഹകരിച്ച്, ഹജ്ജിനായുള്ള യൂണിഫൈഡ് മീഡിയ ഓപ്പറേഷന്സ് സെന്ററിന്റെ ആഭിമുഖ്യത്തില് മക്ക ചേംബര് എക്സിബിഷന്സ് ആന്ഡ് ഇവന്റ്സ് സെന്ററിലാണ് നാല് ദിവസത്തെ പരിപാടി നടന്നത്. മാധ്യമപ്രവര്ത്തകര്ക്കും വിദഗ്ധര്ക്കും ആവശ്യമായ പിന്തുണ നല്കുന്നതില് വലിയ വിജയമാണ് മീഡിയ ഹബ്ബ് കൈവരിച്ചത്.
ലോകത്തിന്റെ വിവിധ ഭാഗങ്ങളില് നിന്നായി 13,500-ലധികം മാധ്യമപ്രവര്ത്തകരും സന്ദര്ശകരുമാണ് ഇത്തവണ മീഡിയ ഹബ്ബിലേക്ക് എത്തിയത്. ഹബ്ബിന്റെ ഭാഗമായി ഒരുക്കിയ ട്രാന്സ്ഫോര്മേഷന് എക്സിബിഷനില് മുപ്പതിലധികം സര്ക്കാര്, സ്വകാര്യ, ലാഭരഹിത സ്ഥാപനങ്ങള് പങ്കെടുത്തു. തീര്ഥാടകര്ക്കായി ഒരുക്കിയിട്ടുള്ള പ്രധാന വികസന പദ്ധതികളും സേവനങ്ങളും വ്യക്തമാക്കുന്ന 1,500-ലധികം ഇന്ററാക്ടീവ് സ്ക്രീനുകളാണ് പ്രദര്ശനത്തില് സജ്ജീകരിച്ചിരുന്നത്.
അത്യാധുനിക സാങ്കേതിക സൗകര്യങ്ങളോടെ ഒരുക്കിയ മീഡിയ കമ്മ്യൂണിറ്റി സ്പേസുകളും സ്റ്റുഡിയോകളും നൂറ്റമ്പതിലധികം പ്രാദേശിക, പ്രാദേശിക-അന്തര്ദേശീയ മാധ്യമങ്ങള്ക്ക് ഹജ്ജ് സീസണിന്റെ അന്താരാഷ്ട്ര മാധ്യമ കവറേജിനായി ഏറെ സഹായകരമായി.
കൂടാതെ, ഹജ്ജ് തീര്ഥാടകര്ക്കായുള്ള മാധ്യമ സന്നദ്ധത വര്ദ്ധിപ്പിക്കുന്നതിനായി സൗദി മീഡിയ അക്കാദമിയുടെ നേതൃത്വത്തില് പ്രത്യേക പരിശീലന വര്ക്ക്ഷോപ്പുകളും സംഘടിപ്പിച്ചു. നാല് ദിവസങ്ങളിലായി നടന്ന ഈ വര്ക്ക്ഷോപ്പുകളില് സര്ക്കാര്, സ്വകാര്യ, മാധ്യമ മേഖലകളില് നിന്നുള്ള മുന്നൂറിലധികം പേര് പ്രമുഖ വിദഗ്ധരില് നിന്ന് പരിശീലനം നേടി.
Related News
