മിനാ-ദൈവത്തിന്റെ അതിഥികളായെത്തുന്ന തീര്ത്ഥാടകരുടെ ജീവന് കാത്തുസൂക്ഷിക്കാന് പ്രതിരോധ മന്ത്രാലയത്തിന്റെ വ്യോമ മെഡിക്കല് ഇവാക്യൂവേഷന് വിഭാഗം റെക്കോര്ഡ് വേഗത്തില് അത്ഭുതകരമായ രക്ഷാദൗത്യം പൂര്ത്തിയാക്കി. തീവ്രമായ പ്രമേഹത്തെ തുടര്ന്ന് കോമയിലായ ഇരുപതുകാരിയെയാണ് വ്യോമസേനയുടെ അത്യാധുനിക മെഡിക്കല് വിമാനത്തില് മക്കയിലെ മിനാ എമര്ജന്സി ഹോസ്പിറ്റലില് നിന്നും ജിദ്ദയിലെ ഈസ്റ്റ് ജിദ്ദ ഹോസ്പിറ്റലിലേക്ക് വിജയകരമായി എത്തിച്ചത്. യുവതിയുടെ ഗുരുതരാവസ്ഥയെക്കുറിച്ചുള്ള അടിയന്തര മെഡിക്കല് റിപ്പോര്ട്ട് ലഭിച്ച ഉടന് തന്നെ പ്രതിരോധ മന്ത്രാലയത്തിന് കീഴിലുള്ള പ്രത്യേക മെഡിക്കല് സംഘം രംഗത്തിറങ്ങുകയായിരുന്നു. അതിവേഗത്തിലാണ് വ്യോമസേനയും ആരോഗ്യവകുപ്പും സംയുക്തമായി ഈ ദൗത്യത്തില് ഇടപെട്ടത്. വിമാനത്തിനുള്ളില് വെച്ചുതന്നെ യുവതിയുടെ ആരോഗ്യനില തത്സമയം നിരീക്ഷിക്കുകയും വിദഗ്ദ്ധ പരിചരണത്തിലൂടെ സ്ഥിരത നിലനിര്ത്തുകയും ചെയ്തു. തുടര്ന്ന് ഒട്ടും സമയം കളയാതെ വിദഗ്ധ ചികിത്സക്കായി അവരെ ജിദ്ദയിലെ ആശുപത്രിയിലേക്ക് മാറ്റാന് സാധിച്ചു. വിശുദ്ധ ഹജ്ജ് തീര്ത്ഥാടന വേളയില് രാജ്യത്തെ ആരോഗ്യ രംഗവും സൈനിക വ്യൂഹവും എത്രത്തോളം പരസ്പര പൂരകങ്ങളായാണ് പ്രവര്ത്തിക്കുന്നത് എന്നതിന്റെ ഉത്തമ ഉദാഹരണമാണ് ഈ അടിയന്തര രക്ഷാപ്രവര്ത്തനം. തീര്ത്ഥാടകര്ക്ക് ഉണ്ടാകാനിടയുള്ള പെട്ടെന്നുള്ള ശാരീരിക അടിയന്തര ഘട്ടങ്ങളില് മിന്നല് വേഗത്തില് പ്രതികരിക്കാനും, അവര്ക്ക് ലോകോത്തര നിലവാരത്തിലുള്ള അത്യാധുനിക മെഡിക്കല് സേവനങ്ങള് ലഭ്യമാക്കാനും പുണ്യഭൂമിയില് ഒരുക്കിയിട്ടുള്ള സംയോജിത സുരക്ഷാ കവചത്തിന്റെ കാര്യക്ഷമതയാണ് ഈ ദൗത്യത്തിന്റെ വിജയത്തിലൂടെ വീണ്ടും തെളിയുന്നത്.
Related News
