മനില: ഫിലിപ്പീന്സിലെ മിന്ഡാനാവോ ദ്വീപിന് സമീപം ഉണ്ടായ അതിശക്തമായ ഭൂചലനത്തില് കുറഞ്ഞത് 15 പേര് മരിച്ചു. 125 ഓളം പേര്ക്ക് പരിക്കേറ്റു. റിക്ടര് സ്കെയിലില് 7.8 തീവ്രത രേഖപ്പെടുത്തിയ ഭൂചലനത്തില് കെട്ടിടങ്ങള് തകരുകയും ഏഷ്യന് രാജ്യങ്ങളില് സുനാമി മുന്നറിയിപ്പ് നല്കുകയും ചെയ്തു. ഇന്ന് പ്രാദേശിക സമയം രാവിലെ 7:40-ഓടെയാണ് ഭൂചലനം ഉണ്ടായതെന്ന് യുഎസ് ജിയോളജിക്കല് സര്വേ അറിയിച്ചു. തുടര്ന്ന് ഒരു മണിക്കൂറിലധികം നീണ്ടുനിന്ന തുടര്ചലനങ്ങളും ഉണ്ടായതായി ഫിലിപ്പൈന് ഇന്സ്റ്റിറ്റ്യൂട്ട് ഓഫ് വോള്ക്കനോളജി ആന്ഡ് സീസ്മോളജി വ്യക്തമാക്കി.
തെക്കന് മിന്ഡാനാവോയിലെ ജനറല് സാന്റോസ് നഗരത്തിലാണ് ഏറ്റവും കൂടുതല് നാശനഷ്ടങ്ങള് റിപ്പോര്ട്ട് ചെയ്തത്. നഗരത്തില് പ്രവര്ത്തിച്ചിരുന്ന ഒരു മൂന്നുനില കെട്ടിടം പൂര്ണ്ണമായും തകര്ന്നു. നഗരത്തിലെ സെന്റ് എലിസബത്ത് ആശുപത്രിക്ക് കനത്ത കേടുപാടുകള് സംഭവിച്ചു. ഇതേത്തുടര്ന്ന് രോഗികളെയും ജീവനക്കാരെയും ആശുപത്രിക്ക് പുറത്തേക്ക് മാറ്റി അവിടെ താല്ക്കാലിക സംവിധാനങ്ങള് ഒരുക്കി. വിദ്യാഭ്യാസ സ്ഥാപനങ്ങള്ക്കും കാര്യമായ നാശനഷ്ടങ്ങള് സംഭവിച്ചിട്ടുണ്ട്.
രാജ്യത്ത് സ്കൂളുകള് തുറക്കുന്ന ആദ്യ ദിവസമായിരുന്നു തിങ്കളാഴ്ച. എന്നാല്, വിദ്യാര്ത്ഥികളുടെയും അധ്യാപകരുടെയും സുരക്ഷ കണക്കിലെടുത്ത് ബാധിക്കപ്പെട്ട പ്രദേശങ്ങളിലെ സ്കൂളുകള് അടച്ചിടാന് പ്രസിഡന്റ് ഫെര്ഡിനാന്ഡ് മാര്ക്കോസ് ഉത്തരവിട്ടു. 3.2 ദശലക്ഷം വിദ്യാര്ത്ഥികളെയും 1.28 ലക്ഷം അധ്യാപകരെയും ഇത് ബാധിച്ചതായി ഫിലിപ്പൈന് വാര്ത്താ ഏജന്സി റിപ്പോര്ട്ട് ചെയ്തു. അടിയന്തര സാഹചര്യങ്ങള് നേരിടാന് സിവില് ഡിഫന്സ്, നാഷണല് ഡിസാസ്റ്റര് റിസ്ക് റിഡക്ഷന് ആന്ഡ് മാനേജ്മെന്റ് കൗണ്സില് എന്നിവയെ സജ്ജമാക്കിയിട്ടുണ്ട്.
ഫിലിപ്പീന്സ്, ഇന്തോനേഷ്യ, ജപ്പാന് തുടങ്ങിയ രാജ്യങ്ങളില് സുനാമി മുന്നറിയിപ്പ് നല്കിയിരുന്നു. ഫിലിപ്പീന്സിലെ ഒമ്പത് പ്രവിശ്യകളില് താമസിക്കുന്നവരോട് ഉടനടി ഉയര്ന്ന പ്രദേശങ്ങളിലേക്ക് മാറിത്താമസിക്കാന് അധികൃതര് നിര്ദ്ദേശിച്ചു. ഹവായിയിലെ പസിഫിക് സുനാമി മുന്നറിയിപ്പ് കേന്ദ്രം നല്കിയ മുന്നറിയിപ്പ് പ്രകാരം ഫിലിപ്പീന്സില് 3 മീറ്റര് വരെ ഉയരമുള്ള തിരമാലകള്ക്കും ഇന്തോനേഷ്യ, മലേഷ്യ തീരങ്ങളില് ഒരു മീറ്റര് വരെ ഉയരമുള്ള തിരമാലകള്ക്കും സാധ്യതയുണ്ടായിരുന്നു. എന്നാല് ഉച്ചയോടെ സുനാമി ഭീഷണി ഒഴിഞ്ഞതായി അധികൃതര് അറിയിച്ചു. ഇന്തോനേഷ്യയിലെ നോര്ത്തേണ് സുലവേസിയില് 0.83 മീറ്റര് ഉയരത്തില് തിരമാലകള് രേഖപ്പെടുത്തി. ഇന്തോനേഷ്യ സുനാമി മുന്നറിയിപ്പ് പിന്നീട് പിന്വലിച്ചു. ജപ്പാന് തീരങ്ങളില് ജാഗ്രതാ നിര്ദ്ദേശം തുടരുകയാണ്. തീരപ്രദേശങ്ങളില് താമസിക്കുന്നവര് ജാഗ്രത പാലിക്കണമെന്നും പ്രാദേശിക ഭരണകൂടത്തിന്റെ നിര്ദ്ദേശങ്ങള് കര്ശനമായി പാലിക്കണമെന്നും അധികൃതര് അഭ്യര്ത്ഥിച്ചു.
