ദമ്മാം: പ്രവാസി ഗായിക കല്യാണി നായരുടെ പ്രഥമ ഇംഗ്ലീഷ് കവിതാസമാഹാരമായ 'ആംബിവലന്‍സ്' ജൂണ്‍ 18-ന് വ്യാഴം ദമ്മാമില്‍ പ്രകാശനം ചെയ്യും. സൗദി മലയാളീ സമാജം സംഘടിപ്പിക്കുന്ന ചടങ്ങ് ദമ്മാം റോസ് ഓഡിറ്റോറിയത്തില്‍ വൈകിട്ട് 7.30ന് സാംസ്‌കാരിക പരിപാടികളോട് കൂടി ആരംഭിക്കും.

മലയാളത്തിലെ പ്രശസ്ത ഗാനരചയിതാവും തിരക്കഥാകൃത്തുമായ ഷിബു ചക്രവര്‍ത്തി പുസ്തകത്തിന്റെ പ്രകാശനകര്‍മം നിര്‍വഹിക്കും.
സ്വരമാധുര്യം കൊണ്ട് പ്രവാസി മലയാളികളുടെ ഹൃദയങ്ങളില്‍ ഇടംപിടിച്ച കല്യാണി 'ആംബിവലന്‍സ്'എന്ന തന്റെ കവിതാ സമാഹാരത്തിലൂടെ സാഹിത്യ മേഖലയിലും, കവിതകള്‍ക്കായി വരച്ച ചിത്രങ്ങളിലൂടെ ചിത്രരചനയിലും തന്റെ സാന്നിധ്യം അറിയിക്കുകയാണ്.

ഡെസ്റ്റിനി ബുക്ക്‌സ് കോഴിക്കോട് പ്രസിദ്ധീകരിക്കുന്ന ഈ കൃതിയിലൂടെ തന്റെ സാഹിത്യ പ്രതിഭാ വിലാസത്തോടൊപ്പം നല്ലൊരു ചിത്രകാരികൂടിയാണ് താനെന്ന് വായനക്കാരെ ബോധ്യപെടുത്തുന്നുണ്ട് കല്യാണി. ജീവിതാനുഭവങ്ങള്‍, മനുഷ്യബന്ധങ്ങള്‍, ആത്മസംഘര്‍ഷങ്ങള്‍, പ്രതീക്ഷകള്‍ തുടങ്ങി വിവിധ വിഷയങ്ങളെ പ്രമേയമാക്കിയ ഇംഗ്ലീഷ് കവിതകളുടെ സമാഹാരമാണീ പുസ്തകം.

കിഴക്കന്‍ പ്രവിശ്യയിലെ സാഹിത്യ-സാംസ്‌കാരിക വിദ്യാഭ്യാസ മേഖലകളിലേ പ്രമുഖ വ്യക്തിത്വങ്ങള്‍ പ്രകാശന ചടങ്ങില്‍ പങ്കെടുക്കും.
സംഗീതവും സാഹിത്യവും ഒരുമിച്ച് ആഘോഷിക്കുന്ന ഈ സായാഹ്നം കലാസ്വാദകര്‍ക്കും സാഹിത്യപ്രേമികള്‍ക്കും ഒരു നവ്യാ നുഭവമാകുമെന്ന് സൗദി മലയാളീ സമാജം ഭാരവാഹികള്‍ പത്രകുറിപ്പിലൂടെ അറിയിച്ചു.