റിയാദ്: റാസ് തനൂറയില് സൗദി അരാംകോയുടെ ഹെലികോപ്റ്റര് തകര്ന്നുണ്ടായ അപകടത്തില് 14 പേരും മരിച്ചു. ഞായറാഴ്ച പുലര്ച്ചെ 6 മണിയോടെയാണ് അപകടം സംഭവിച്ചതെന്ന് സൗദി ഊര്ജ്ജ മന്ത്രാലയം അറിയിച്ചു. മരിച്ചവരെല്ലാം സൗദി പൗരന്മാരാണ്. അപകടകാരണം ഇതുവരെ വ്യക്തമായിട്ടില്ലെന്നും അന്വേഷണം നടക്കുകയാണെന്നും അധികൃതര് വ്യക്തമാക്കി.
ദുരന്തത്തില് സൗദി അറേബ്യയ്ക്ക് ഐക്യദാര്ഢ്യം പ്രഖ്യാപിച്ച് നിരവധി അറബ് രാജ്യങ്ങളും അന്താരാഷ്ട്ര സംഘടനകളും രംഗത്തെത്തി. സല്മാന് രാജാവിനും കിരീടാവകാശി മുഹമ്മദ് ബിന് സല്മാന് രാജകുമാരനും ദുഃഖസന്ദേശങ്ങള് പ്രവഹിക്കുകയാണ്. അറബി ലീഗ് സെക്രട്ടറി ജനറല് അഹമ്മദ് അബുല് ഗെയ്ത് സൗദി അറേബ്യയ്ക്ക് അനുശോചനം രേഖപ്പെടുത്തുകയും ഐക്യദാര്ഢ്യം പ്രഖ്യാപിക്കുകയും ചെയ്തു.ഗള്ഫ് സഹകരണ കൗണ്സില് സെക്രട്ടറി ജനറല് ജാസിം അല് ബുദൈവി ദുരന്തത്തില് സൗദി നേതൃത്വത്തിനും ജനങ്ങള്ക്കും അനുശോചനം അറിയിച്ചു. മുസ്ലീം വേള്ഡ് ലീഗ് സെക്രട്ടറി ജനറല് മുഹമ്മദ് അല് ഇസ്സ ദുരന്തത്തില് അഗാധമായ ദുഃഖം രേഖപ്പെടുത്തി.
കൂടാതെ കുവൈറ്റ് അമീര് ഷെയ്ഖ് മിഷാല് അല് അഹമ്മദ് അല് സബാഹ്, ഖത്തര് അമീര് ഷെയ്ഖ് തമീം ബിന് ഹമദ് അല് താനി, ജോര്ദാന് രാജാവ് അബ്ദുള്ള രണ്ടാമന് എന്നിവര് സൗദി നേതൃത്വത്തിന് അനുശോചന സന്ദേശങ്ങള് അയച്ചു. യുഎഇ, ഒമാന്, സിറിയ, മൗറിറ്റാനിയ, പലസ്തീന് തുടങ്ങിയ രാജ്യങ്ങളും സൗദി അറേബ്യയ്ക്ക് പിന്തുണയും ഐക്യദാര്ഢ്യവും അറിയിച്ചു.
ഈ ഗൗരവകരമായ സാഹചര്യത്തില് സൗദി ജനതയ്ക്കൊപ്പമാണെന്ന് വിവിധ രാജ്യങ്ങളുടെ വിദേശകാര്യ മന്ത്രാലയങ്ങള് പുറത്തിറക്കിയ പ്രസ്താവനകളില് വ്യക്തമാക്കി. സൗദി അരാംകോയുമായി ബന്ധപ്പെട്ട് സമീപകാലത്തുണ്ടായ ഏറ്റവും വലിയ വിമാനാപകടങ്ങളിലൊന്നാണിത്.
Related News
