ജിദ്ദ: ഷറഫിയ സഫയര് ഓഡിറ്റോറിയത്തില് നടന്ന 'മൊഞ്ചുള്ള മലബാര്' സംഗീതനിശ മാപ്പിളപ്പാട്ട് ആസ്വാദകര്ക്ക് നവ്യാനുഭമായി. ജിദ്ദയിലെ സംഗീതവേദികളില് നിറസാന്നിധ്യമായ 'സന്ധ്യാരാഗ'മാണ് പരിപാടി സംഘടിപ്പിച്ചത്. മാപ്പിളപ്പാട്ടിന്റെ ആചാര്യന് മോയിന്കുട്ടി വൈദ്യരുടെ ഗാനങ്ങള് ഉള്പ്പെടെ, പഴയതും പുതിയതുമായ മനോഹര ഗാനങ്ങള് കോര്ത്തിണക്കി അവതരിപ്പിച്ച സംഗീതനിശ സദസ്സിന്റെ വലിയ കയ്യടി നേടി. മലബാറിന്റെ തനത് മാപ്പിളപ്പാട്ട് പാരമ്പര്യത്തെയും സംഗീത മാധുര്യത്തെയും തൊട്ടുണര്ത്തുന്നതായിരുന്നു വേദിയില് അവതരിപ്പിച്ച ഓരോ ഗാനവും.
ജിദ്ദയിലെ പ്രമുഖ സംഘാടകനും സാമൂഹ്യപ്രവര്ത്തകനുമായ ഹസ്സന് കൊണ്ടോട്ടി പരിപാടിയുടെ ഉദ്ഘാടനം നിര്വഹിച്ചു. പ്രാദേശിക ഭേദമില്ലാതെ ലോകമെമ്പാടുമുള്ള മലയാളികള് ഒരുപോലെ ആസ്വദിക്കുന്ന മാപ്പിളപ്പാട്ടുകള്, നൂറ്റാണ്ടുകളായി കേരളത്തിന്റെ സാഹോദര്യവും ഐക്യവും ഊട്ടിയുറപ്പിക്കുന്നതില് വലിയ പങ്കുവഹിക്കുന്നതായി അദ്ദേഹം അഭിപ്രായപ്പെട്ടു. പ്രോഗ്രാം കോ-ഓര്ഡിനേറ്റര് നൂഹ് ബീമാപ്പള്ളി സ്വാഗതം ആശംസിച്ചു.
സമൂഹത്തിന്റെ വിവിധ മേഖലകളില് നിന്നുള്ള പ്രമുഖര് ചടങ്ങില് മുഖ്യാതിഥികളായി പങ്കെടുത്തു. സി.എം. അഹ്മദ് ആക്കോട്, അഷ്റഫ് കാലിക്കറ്റ്, പ്രശസ്ത എഴുത്തുകാരി റജിയ വീരാന്, ബാദുഷ മാസ്റ്റര്, ജ്യോതി ബാബുകുമാര്, അഷറഫ് ചുക്കന്, യൂസുഫ് കോട്ട തുടങ്ങിയവര് സംസാരിച്ചു.
തുടര്ന്ന് നടന്ന സംഗീത സന്ധ്യയില് പ്രമുഖ ഗായകരായ നൂഹ് ബീമാപള്ളി, സോഫിയ സുനില്, ബീഗം ഖദീജ, ഹസ്സന് കൊണ്ടോട്ടി, ഗഫൂര് തൃപ്പനച്ചി, റാഫി ആലുവ, അഷറഫ് വലിയോറ, മന്സൂര് പാങ്ങ്, സത്യന് പി. നായര്, അഫ്ര സബീന് റാഫി, റഫീഖ് ബിലാല്, സല്മാന് പാണ്ടിക്കാട്, മുനീര് കണ്ണൂര് തുടങ്ങിയവര് ജനപ്രിയ മാപ്പിളഗാനങ്ങള് ആലപിച്ച് സദസ്സിനെ മനംകുളിര്പ്പിച്ചു. സുവിജ സത്യന് പരിപാടി അവതരിപ്പിച്ചു. സന്ധ്യാരാഗം ചെയര്മാന് നവാസ് ബീമാപ്പള്ളി നന്ദി പറഞ്ഞു.
Related News
