റിയോ ഡി ജനീറോ: കരുത്തരായ ബ്രസീലിനെതിരെ അട്ടിമറി ലക്ഷ്യമിട്ട് ജപ്പാന്. അന്താരാഷ്ട്ര ഫുട്ബോള് മത്സരത്തിന്റെ ആദ്യ പകുതി അവസാനിക്കുമ്പോള് ഏകപക്ഷീയമായ ഒരു ഗോളിന് ജപ്പാന് മുന്നിലാണ്. മത്സരത്തിന്റെ 29-ാം മിനിറ്റില് സാനോയാണ് ജപ്പാന്റെ വിജയഗോള് നേടിയത്.
മത്സരത്തിലുടനീളം പന്തടക്കത്തില് ബ്രസീല് ആധിപത്യം പുലര്ത്തിയെങ്കിലും, ജപ്പാന്റെ പ്രതിരോധക്കോട്ട തകര്ക്കാന് കാനറികള്ക്ക് സാധിച്ചില്ല. ബ്രസീല് താരങ്ങളുടെ മടിപിടിച്ചുള്ള നീക്കങ്ങളും കൃത്യതയില്ലാത്ത പാസുകളും അവര്ക്ക് തിരിച്ചടിയായി. മറുഭാഗത്ത്, മികച്ച അച്ചടക്കത്തോടെ കളിച്ച ജപ്പാന്, ലഭിച്ച അവസരങ്ങളില് കൗണ്ടര് അറ്റാക്കുകളിലൂടെ ബ്രസീലിയന് പ്രതിരോധത്തെ വിറപ്പിച്ചു.
ഡാനിലോയുടെ ഭാഗത്തുനിന്നുണ്ടായ പിഴവ് മുതലെടുത്ത് ബോക്സിന് പുറത്തുനിന്നും സാനോ തൊടുത്ത ഷോട്ട് ബ്രസീലിയന് ഗോള്കീപ്പര് അലിസണെ കാഴ്ചക്കാരനാക്കി വലയിലെത്തി. പിന്നീട് സമനിലയ്ക്കായി ബ്രസീല് കിണഞ്ഞു പരിശ്രമിച്ചെങ്കിലും ജപ്പാന്റെ പ്രതിരോധം പാറപോലെ ഉറച്ചുനിന്നു.
വിനീഷ്യസ് ജൂനിയറിനെ തളയ്ക്കാന് രണ്ടോ മൂന്നോ ജപ്പാന് താരങ്ങളാണ് നിരന്തരം പിന്തുടര്ന്നത്. കസെമിറോയെയും പാക്വെറ്റയെയും മധ്യനിരയില് വെച്ച് പന്തു തട്ടിയെടുത്ത് ജപ്പാന് താരങ്ങള് നടത്തിയ പ്രത്യാക്രമണങ്ങള് ബ്രസീല് പ്രതിരോധത്തെ പലതവണ സമ്മര്ദ്ദത്തിലാക്കി.
ജപ്പാന്റെ തന്ത്രപരമായ നീക്കങ്ങള്ക്ക് മുന്നില് ബ്രസീല് പരിശീലകന് കാര്ലോ ആന്സലോട്ടി അതീവ അസ്വസ്ഥനായാണ് കാണപ്പെട്ടത്. ലോകത്തെ മികച്ച ടീമുകളിലൊന്നാണ് ജപ്പാന് എന്ന് മത്സരം തുടങ്ങുന്നതിന് മുന്പേ ആന്സലോട്ടി മുന്നറിയിപ്പ് നല്കിയിരുന്നു.
