റിയാദ്- വെര്‍ച്വലായി നടന്ന 38-ാമത് ഏഷ്യ പസഫിക് മാത്തമാറ്റിക്‌സ് ഒളിമ്പ്യാഡില്‍ സൗദി അറേബ്യയുടെ ദേശീയ ഗണിതശാസ്ത്ര ടീം 10 അന്താരാഷ്ട്ര പുരസ്‌കാരങ്ങള്‍ കരസ്ഥമാക്കി മികച്ച വിജയം കൈവരിച്ചു. ലോകമെമ്പാടുമുള്ള 43 രാജ്യങ്ങളെ പ്രതിനിധീകരിച്ച് 397 ആണ്‍കുട്ടികളും പെണ്‍കുട്ടികളും മാറ്റുരച്ച കടുത്ത മത്സരത്തിലാണ് സൗദി വിദ്യാര്‍ത്ഥികള്‍ അഭിമാന നേട്ടം സ്വന്തമാക്കിയത്. കിംഗ് അബ്ദുല്‍ അസീസ് ആന്‍ഡ് ഹിസ് കമ്പാനിയന്‍സ് ഫൗണ്ടേഷന്‍ ഫോര്‍ ഗിഫ്റ്റഡ്‌നസ് ആന്‍ഡ് ക്രിയേറ്റിവിറ്റി (മാവ്ഹിബ), സൗദി വിദ്യാഭ്യാസ മന്ത്രാലയവുമായി സഹകരിച്ച് നടപ്പിലാക്കുന്ന 'മാവ്ഹിബ ഇന്റര്‍നാഷണല്‍ ഒളിമ്പ്യാഡ് പ്രോഗ്രാമിന്' കീഴിലുള്ള കൃത്യമായ പരിശീലനത്തിന്റെ ഫലമായാണ് ഈ വലിയ വിജയം രാജ്യത്തെ തേടിയെത്തിയത്.

മൂന്ന് വെങ്കല മെഡലുകളും ഏഴ് പ്രശംസാ പത്രങ്ങളുമാണ് സൗദി ടീം നേടിയത്. മദീന വിദ്യാഭ്യാസ വകുപ്പിലെ അബ്ദുല്‍ സലാം അബ്ദുള്ള അല്‍-സല്‍മി, ഈസ്റ്റേണ്‍ പ്രവിശ്യയില്‍ നിന്നുള്ള ഷാക്കര്‍ അല്‍-ഫറജ്, ജിദ്ദ വിദ്യാഭ്യാസ വകുപ്പിലെ യൂസഫ് ഫരീദ് അല്‍-ഖലാവി എന്നിവരാണ് വെങ്കല മെഡലുകള്‍ സ്വന്തമാക്കിയത്. ജിദ്ദയില്‍നിന്നുള്ള അബ്ദുല്‍ ഇലാഹ് മുഹമ്മദ് അല്‍-സഖാഫ്, ജുബൈലിലെ റോയല്‍ കമ്മീഷനില്‍ നിന്നുള്ള മുഹമ്മദ് അലി ഷൈബാന്‍, ഈസ്റ്റേണ്‍ പ്രവിശ്യയില്‍ നിന്നുള്ള അബ്ദുള്ള താരിഖ് അല്‍-ആമിര്‍, അല്‍-അഹ്‌സയില്‍ നിന്നുള്ള മുഹമ്മദ് ബാഖിര്‍ അല്‍-ഹസന്‍, യാന്‍ബുവിലെ റോയല്‍ കമ്മീഷനില്‍ നിന്നുള്ള യാസര്‍ മുഹമ്മദ് ഹബീബുള്ള, മദീനയില്‍ നിന്നുള്ള അബ്ദുല്‍ റഹ്‌മാന്‍ ഷൗഖി മന്‍സൂര്‍, ഈസ്റ്റേണ്‍ പ്രവിശ്യയില്‍ നിന്നുള്ള അലി ഹസ്സന്‍ അല്‍-ഹുസൈന്‍ എന്നിവര്‍ പ്രശംസാ പത്രങ്ങള്‍ക്ക് അര്‍ഹരായി. വിദ്യാര്‍ത്ഥികളുടെ ഉയര്‍ന്ന ശാസ്ത്രീയ നിലവാരവും ആഗോള വേദികളില്‍ രാജ്യത്തിന്റെ സാന്നിധ്യവും വിളിച്ചോതുന്നതാണ് ഈ ഫലം.

ഈ വിജയത്തോടെ ഏഷ്യ പസഫിക് മാത്തമാറ്റിക്‌സ് ഒളിമ്പ്യാഡില്‍ സൗദി അറേബ്യയുടെ ആകെ പുരസ്‌കാര നേട്ടം 121 ആയി ഉയര്‍ന്നു. ഇതില്‍ 3 സ്വര്‍ണ്ണ മെഡലുകളും 14 വെള്ളി മെഡലുകളും 52 വെങ്കല മെഡലുകളും 52 പ്രശംസാ പത്രങ്ങളും ഉള്‍പ്പെടുന്നു. ഹൈസ്‌കൂള്‍ വിദ്യാര്‍ത്ഥികള്‍ക്കായി വര്‍ഷം തോറും നടത്തിവരുന്ന ഏറ്റവും പ്രമുഖമായ അന്താരാഷ്ട്ര ഗണിതശാസ്ത്ര മത്സരങ്ങളിലൊന്നാണ് ഏഷ്യ പസഫിക് മാത്തമാറ്റിക്‌സ് ഒളിമ്പ്യാഡ്. ഏഷ്യ-പസഫിക് മേഖലയിലെ മികച്ച വിദ്യാര്‍ത്ഥികളില്‍ ഗണിതശാസ്ത്ര ചിന്താശേഷി വളര്‍ത്തുക, സങ്കീര്‍ണ്ണമായ പ്രശ്‌നങ്ങള്‍ പരിഹരിക്കാനുള്ള കഴിവ് വര്‍ദ്ധിപ്പിക്കുക, അന്താരാഷ്ട്ര തലത്തില്‍ ശാസ്ത്രീയ മികവ് പ്രോത്സാഹിപ്പിക്കുക എന്നിവയാണ് ഈ ഒളിമ്പ്യാഡിന്റെ പ്രധാന ലക്ഷ്യങ്ങള്‍.