മക്ക: ഈ വര്ഷത്തെ ഹജ്ജ് സീസണില് ഇന്ത്യന് തീര്ത്ഥാടകര്ക്ക് കൈത്താങ്ങായി മക്ക ഇന്ത്യന് വെല്ഫെയര് അസോസിയേഷന് (IWA) മാതൃകാപരമായ സേവന പ്രവര്ത്തനങ്ങള് കാഴ്ചവെച്ചു. കഴിഞ്ഞ ഏതാനും വര്ഷങ്ങളായി ഹജ്ജ് വേളയില് സജീവമായുള്ള ഐ.ഡബ്ല്യു.എയുടെ സന്നദ്ധസേവനം ഇത്തവണയും പതിനായിരക്കണക്കിന് ഹാജിമാര്ക്ക് ആശ്വാസമായി.
ഇന്ത്യന് കോണ്സുലേറ്റിന്റെയും ഹജ്ജ് മിഷന്റെയും പൂര്ണ പിന്തുണയോടെ, പ്രായമായവര്ക്കും ശാരീരിക അസ്വസ്ഥതകള് അനുഭവിക്കുന്നവര്ക്കുമായി മക്കയിലും അസീസിയയിലുമായി 24 മണിക്കൂറും കര്മ്മനിരതരായ അന്പതോളം വളണ്ടിയര്മാരാണ് ഇത്തവണ രംഗത്തുണ്ടായിരുന്നത്. ഇതിനുപുറമെ, തീര്ത്ഥാടകര്ക്കിടയില് സൗജന്യമായി ഭക്ഷണം, കുട, ചെരിപ്പ്, പഴങ്ങള് എന്നിവ ഐ.ഡബ്ല്യു.എ പ്രവര്ത്തകര് വിതരണം ചെയ്തു. ശരാശരി 900 പാക്കറ്റ് ഭക്ഷണമാണ് ഓരോ ദിവസവും ഐ.ഡബ്ല്യു.എ പ്രവര്ത്തകര് ഹാജിമാര്ക്കായി വിതരണം ചെയ്തിരുന്നത്.
ഏറ്റവും കൂടുതല് സഹായം ആവശ്യമുള്ള ഹജ്ജ് ദിനങ്ങളില് മിന, അറഫ, മുസ്ദലിഫ എന്നിവിടങ്ങളിലും വളണ്ടിയര്മാരുടെ സേവനം ലഭ്യമായിരുന്നു. ഹറം പരിസരത്ത് തീര്ത്ഥാടകര്ക്ക് വഴി കാണിച്ചും, ശാരീരിക ബുദ്ധിമുട്ടുള്ളവര്ക്ക് യാത്രാസൗകര്യങ്ങള് ഒരുക്കിയും വളണ്ടിയര്മാര് വിശ്രമമില്ലാതെ പ്രവര്ത്തിച്ചു.
ഹജ്ജ് സേവനങ്ങള് മികച്ച രീതിയില് ഏകോപിപ്പിക്കുന്നതിന് പൂര്ണ പിന്തുണ നല്കിയ ഇന്ത്യന് കോണ്സല് ജനറല്, ഹജ്ജ് കോണ്സല്, മറ്റ് കോണ്സുലേറ്റ് ഉദ്യോഗസ്ഥര് എന്നിവര്ക്ക് ഐ.ഡബ്ല്യു.എ ഭാരവാഹികള് നന്ദി അറിയിച്ചു. ഹാരിസ് കണ്ണിപൊയില്, അബൂബക്കര്, ഷഹീന്, ഫവാസ്, അസ്കര് മംഗലാപുരം, ബൈജു ഹനീഫ തുടങ്ങിയവരുടെ നേതൃത്വത്തിലാണ് മക്ക ഐ.ഡബ്ല്യു.എയുടെ വളണ്ടിയര് സംഘം ഈ വര്ഷത്തെ ഹജ്ജ് സേവന പ്രവര്ത്തനങ്ങള് വിജയകരമായി പൂര്ത്തിയാക്കിയത്.
.jpg)
Related News
