നിലമ്പൂര്‍: ചാലിയാര്‍ പുഴയിലൂടെ ഒഴുകിവന്ന മരം പിടിക്കുന്നതിനിടയില്‍ ശക്തമായ ഒഴുക്കില്‍പ്പെട്ട് യുവാവിനെ കാണാതായി. മമ്പാട് ബീമ്പുങ്ങല്‍ സ്വദേശി ആഷിഖിനെയാണ് മമ്പാട് ഓടായിക്കല്‍ റെഗുലേറ്റര്‍ കം ബ്രിഡ്ജിന് താഴെ വെച്ച് കാണാതായത്. ഇയാളോടൊപ്പം പുഴയിലിറങ്ങിയ മറ്റ് രണ്ട് സുഹൃത്തുക്കള്‍ നീന്തി രക്ഷപ്പെട്ടു. മേഖലയില്‍ പെയ്യുന്ന കനത്ത മഴയെത്തുടര്‍ന്ന് ചാലിയാര്‍ പുഴയില്‍ ജലനിരപ്പ് ഉയരുകയും ശക്തമായ ഒഴുക്കുണ്ടാവുകയും ചെയ്തിരുന്നു. ഇതിനിടയിലാണ് പുഴയിലൂടെ ഒഴുകിവന്ന വലിയ മരം കരയ്ക്കടുപ്പിക്കാന്‍ ആഷിഖും സുഹൃത്തുക്കളും ശ്രമിച്ചത്.

എന്നാല്‍ പാലത്തിന് താഴെയുള്ള കുത്തൊഴുക്കിലും ചുഴിയിലും പെട്ട് ആഷിഖ് ഒഴുക്കില്‍പ്പെടുകയായിരുന്നു. ഒപ്പമുണ്ടായിരുന്നവര്‍ രക്ഷപ്പെടുത്താന്‍ ശ്രമിച്ചെങ്കിലും ശക്തമായ അടിയൊഴുക്ക് കാരണം യുവാവ് പെട്ടെന്ന് പുഴയില്‍ താഴ്ന്നുപോവുകയായിരുന്നു. കൂടെയുണ്ടായിരുന്ന മറ്റ് രണ്ട് പേര്‍ അത്ഭുതകരമായി നീന്തി കരയ്ക്കുകയറി.

അപകടവിവരമറിഞ്ഞ് ഫയര്‍ഫോഴ്‌സും സിവില്‍ ഡിഫന്‍സും നാട്ടുകാരും പ്രാദേശിക നീന്തല്‍ വിദഗ്ദ്ധരും സ്ഥലത്തെത്തി യുദ്ധകാലാടിസ്ഥാനത്തില്‍ തിരച്ചില്‍ ആരംഭിച്ചിട്ടുണ്ട്. എന്നാല്‍ കനത്ത മഴയും ചാലിയാറിലെ ശക്തമായ കുത്തൊഴുക്കും രക്ഷാപ്രവര്‍ത്തനത്തിന് കനത്ത വെല്ലുവിളിയാകുന്നുണ്ട്. റബ്ബര്‍ ഡിങ്കികള്‍ അടക്കമുള്ള സജ്ജീകരണങ്ങള്‍ ഉപയോഗിച്ച് പുഴയുടെ താഴേക്കോട്ടുള്ള ഭാഗങ്ങളിലേക്ക് തിരച്ചില്‍ വ്യാപിപ്പിച്ചിരിക്കുകയാണ്. പഞ്ചായത്ത് പ്രസിഡന്റ് ഷമീന കാഞ്ഞിരാല, വൈസ് പ്രസിഡന്റ് നിഷാദ് പാലോളി എന്നവരുടെ നേതൃത്വത്തിലാണ് രക്ഷാപ്രവര്‍ത്തന ഏകോപനം നടത്തുന്നത്.

ചിത്രം: കാണാതായ ആഷിഖ്