ജിദ്ദ: പ്രവാസികള് നേരിടുന്ന പ്രശ്നങ്ങള് പഠിച്ച് നിയമസഭയില് അവതരിപ്പിക്കുമെന്നും അവയ്ക്ക് പരിഹാരങ്ങള് കണ്ടെത്താന് പരമാവധി ശ്രമിക്കുമെന്നും മഞ്ചേരി എം.എല്.എ. അഡ്വ. റഹ്മത്തുള്ള പറഞ്ഞു. ജിദ്ദ കെ.എം.സി.സി. സെന്ട്രല് കമ്മിറ്റി ഓഫീസില് നല്കിയ സ്വീകരണത്തില് സംസാരിക്കുകയായിരുന്നു അദ്ദേഹം.
എസ്ടിയുവിന്റെ സംസ്ഥാന പ്രസിഡന്റ് എന്ന നിലയില് അടിസ്ഥാനപരമായി ഞാന് ഒരു തൊഴിലാളി നേതാവാണ്. എന്റെ പൊതുപ്രവര്ത്തനത്തിന്റെ ഫോക്കസ് തൊഴിലാളികളുടെ പ്രശ്നങ്ങള് കേന്ദ്രീകരിച്ചാണ്; അവരുടെ ക്ഷേമകാര്യങ്ങളും അവകാശ സംരക്ഷണവുമാണ്. നാട്ടില് പണിയെടുക്കുന്ന തൊഴിലാളികളെപ്പോലെ തന്നെയാണ് വിദേശരാജ്യങ്ങളില് തൊഴിലെടുക്കാന് വന്ന പ്രവാസികളും; അടിസ്ഥാനപരമായി അവരും തൊഴിലാളികളാണ്. അതുകൊണ്ടുതന്നെ പ്രവാസി തൊഴിലാളികള്ക്ക് സര്ക്കാരില് നിന്ന് ലഭിക്കേണ്ട അവകാശങ്ങള് നേടിക്കൊടുക്കല് എന്റെ കൂടി ഉത്തരവാദിത്തമാണെന്ന് ഞാന് തിരിച്ചറിഞ്ഞിട്ടുണ്ട്. എം.എല്.എ. എന്ന നിലയില് ആ കാര്യത്തില് കടുത്ത ജാഗ്രത പുലര്ത്തും - അദ്ദേഹം വ്യക്തമാക്കി.
മണ്ഡലത്തിലെ വികസന വിഷയങ്ങളില് മഞ്ചേരി മെഡിക്കല് കോളേജിന്റെ വികസനത്തിനാണ് മുന്തിയ പരിഗണന നല്കുകയെന്നും കാരണം അത് ജില്ലയിലെ മൊത്തം ജനങ്ങള്ക്കും അത്യാവശ്യമായ ആരോഗ്യപരമായ ആവശ്യമാണെന്നും അദ്ദേഹം കൂട്ടിച്ചേര്ത്തു.
സ്വീകരണ യോഗം വേങ്ങര മണ്ഡലം മുസ്ലിം ലീഗ് ജനറല് സെക്രട്ടറി പി.കെ. അലി അക്ബര് ഉദ്ഘാടനം ചെയ്തു. മുസ്തഫ ഹുദവി ആക്കോട്, ഇ.പി. ഉബൈദുള്ള, നസീര് ബാവ കുഞ്ഞ് എന്നിവര് പ്രസംഗിച്ചു. ജിദ്ദ കെ.എം.സി.സി. സെന്ട്രല് കമ്മിറ്റി പ്രസിഡന്റ് അബൂബക്കര് അരിമ്പ്ര എം.എല്.എ.യെ ഷാള് അണിയിച്ചു. ജനറല് സെക്രട്ടറി വി.പി. മുസ്തഫ സ്വാഗതവും സെക്രട്ടറി നാസര് മച്ചിങ്ങല് നന്ദിയും പറഞ്ഞു. സെന്ട്രല് കമ്മിറ്റി ഭാരവാഹികളും ജില്ലാ-ഏരിയ ഭാരവാഹികളുമായ നിരവധി പേര് ചടങ്ങില് പങ്കെടുത്തു.
Related News
