മൈസൂരു- തെന്നിന്ത്യന്‍ സിനിമാ സംഗീത ലോകത്തെ പ്രണയവും വിരഹവും ഭക്തിയുമെല്ലാം തന്റെ മാസ്മരിക ശബ്ദത്തിലൂടെ കോറിയിട്ട ഗാനകോകിലം എസ്. ജാനകിയുടെ (88) വിയോഗത്തില്‍ രാജ്യമൊട്ടാകെ അനുശോചന പ്രവാഹം. മൈസൂരുവിലെ അപ്പോളോ ആശുപത്രിയില്‍ ശനിയാഴ്ച വൈകുന്നേരത്തോടെയായിരുന്നു അന്ത്യം.

രാഷ്ട്രീയ-ചലച്ചിത്ര മേഖലകളിലെ പ്രമുഖര്‍ തങ്ങളുടെ പ്രിയപ്പെട്ട 'ജാനകിയമ്മയ്ക്ക്' ആദരാഞ്ജലികള്‍ അര്‍പ്പിച്ചു.

പ്രധാനമന്ത്രി നരേന്ദ്ര മോദി

'പ്രശസ്ത പിന്നണി ഗായിക എസ്. ജാനകി അമ്മയുടെ വിയോഗം സംഗീത-സാംസ്‌കാരിക ലോകത്തിന് നികത്താനാകാത്ത നഷ്ടമാണ്. വിവിധ ഭാഷകളിലുള്ള അവരുടെ ഗാനങ്ങള്‍ തലമുറകളായി ജനപ്രിയമായിരുന്നു. ആ ഈണങ്ങള്‍ വരും വര്‍ഷങ്ങളിലും ശ്രോതാക്കളെ മയക്കുന്നത് തുടരും. ഈ ദുഃഖവേളയില്‍ അവരുടെ കുടുംബത്തിനും ദശലക്ഷക്കണക്കിന് ആരാധകര്‍ക്കും എന്റെ അനുശോചനം അറിയിക്കുന്നു.'

കേരള മുഖ്യമന്ത്രി വി.ഡി. സതീശന്‍

'എസ്. ജാനകിയുടെ വിയോഗം ഇന്ത്യന്‍ സിനിമയിലെയും സംഗീതത്തിലെയും ഒരു സുവര്‍ണ്ണ കാലഘട്ടത്തിന്റെ അന്ത്യമാണ് കുറിക്കുന്നത്. അവര്‍ മറ്റൊരു സംസ്ഥാനത്തുനിന്നുള്ള ആളായിരിക്കാം, പക്ഷേ അവരുടെ ശബ്ദം ഓരോ മലയാളി ഹൃദയത്തിലും ഇടം നേടി. ഓരോ ഗാനത്തിലൂടെയും അവര്‍ നമ്മുടെ ആഴമേറിയ വികാരങ്ങള്‍ക്ക് ജീവന്‍ നല്‍കുകയും നമ്മുടെ ഓര്‍മ്മകളുടെയും ജീവിതത്തിന്റെയും ഭാഗമാവുകയും ചെയ്തു. അവരുടെ അസാധാരണമായ പൈതൃകം എന്നും നിലനില്‍ക്കും.'

തമിഴ്നാട് മുഖ്യമന്ത്രി വിജയ്

'ഇന്ത്യന്‍ സിനിമാ സംഗീത ലോകത്ത് തന്റെ സവിശേഷമായ ശബ്ദം കൊണ്ട് നിരവധി തലമുറകളുടെ ഹൃദയം കീഴടക്കിയ ഇതിഹാസ പിന്നണി ഗായിക എസ്. ജാനകിയമ്മയുടെ വിയോഗം അതീവ ദുഃഖമുണ്ടാക്കുന്നു.'

നടന്‍ രജനീകാന്ത്: 'എണ്ണമറ്റ മധുരതരമായ ഗാനങ്ങള്‍ക്ക് ജീവന്‍ നല്‍കിയ ആ ശബ്ദം ഒടുവില്‍ ശാന്തമായിരിക്കുന്നു. ഇന്ത്യന്‍ സംഗീതത്തിന് ജാനകിയമ്മ നല്‍കിയ സംഭാവനകള്‍ സമാനതകളില്ലാത്തതാണ്. അവരുടെ ആത്മാവിന് നിത്യശാന്തി നേരുന്നു.'

കമലഹാസന്‍: 'എസ്. ജാനകി വെറുമൊരു ഗായിക മാത്രമല്ലായിരുന്നു; അവര്‍ തലമുറകളുടെ ശബ്ദമായിരുന്നു. അവരുടെ ഗാനങ്ങള്‍ നമ്മുടെ ഹൃദയങ്ങളില്‍ എന്നും മുഴങ്ങിക്കൊണ്ടേയിരിക്കും. ഇന്ത്യന്‍ സംഗീത ലോകത്തിന് ഇത് നികത്താനാകാത്ത നഷ്ടമാണ്.'

ചിരഞ്ജീവി: 'അവരുടെ മാന്ത്രിക ശബ്ദം എണ്ണമറ്റ സിനിമകളിലെ വികാരങ്ങള്‍ക്ക് ജീവന്‍ നല്‍കി. ജാനകിയമ്മ വെറുമൊരു പിന്നണി ഗായിക എന്നതിനപ്പുറം ഒരു വലിയ ഇതിഹാസമായിരുന്നു.'

കര്‍ണാടക മുഖ്യമന്ത്രി ഡി.കെ. ശിവകുമാര്‍: 'ഇന്ത്യന്‍ സിനിമയിലെ സമാനതകളില്ലാത്ത ഗായികയും കന്നഡ സിനിമയുടെ വാനമ്പാടിയുമായിരുന്നു അവര്‍. അവരുടെ ലാളിത്യം വരുംതലമുറയിലെ നിരവധി ഗായകര്‍ക്ക് പ്രചോദനമാണ്.'

ജാനകിയുടെ കൊച്ചുമകള്‍ അപ്‌സര വൈദ്യുല ഇന്‍സ്റ്റാഗ്രാമിലൂടെയാണ് ഈ വിയോഗവാര്‍ത്ത പങ്കുവെച്ചത്.

'ലോകത്തിന് അവര്‍ ഒരു ഐക്കണിക് ശബ്ദമായിരുന്നു, എന്നാല്‍ ഞങ്ങള്‍ക്ക് അവര്‍ സ്‌നേഹനിധിയായ ഒരു മുത്തശ്ശിയായിരുന്നു. അവരുടെ ഊഷ്മളതയും വിനയവും ദയയും എന്നും ഞങ്ങളോടൊപ്പം ഉണ്ടാകും. പ്രിയപ്പെട്ടവരാല്‍ ചുറ്റപ്പെട്ട് വളരെ സമാധാനപരമായായിരുന്നു അവരുടെ മരണം.'

ആറ് പതിറ്റാണ്ടിലേറെ നീണ്ട സംഗീത സപര്യയില്‍ മലയാളം, തമിഴ്, തെലുങ്ക്, കന്നഡ, ഹിന്ദി ഉള്‍പ്പെടെ ഇരുപതോളം ഭാഷകളിലായി 48,000-ത്തിലധികം ഗാനങ്ങളാണ് ജാനകിയമ്മ ആലപിച്ചിട്ടുള്ളത്. 4 ദേശീയ അവാര്‍ഡുകളും 33 സംസ്ഥാന അവാര്‍ഡുകളും നേടിയ ജാനകിയമ്മയുടെ ഭൗതികശരീരം പൊതുദര്‍ശനത്തിന് ശേഷം പൂര്‍ണ്ണ ഔദ്യോഗിക ബഹുമതികളോടെ സംസ്‌കരിക്കും.