റിയാദ്: അന്താരാഷ്ട്ര നിയമങ്ങളും അയല്‍പക്ക ബന്ധങ്ങളും ലംഘിച്ചുകൊണ്ട് മേഖലയിലെ സുരക്ഷയും സ്ഥിരതയും തകര്‍ക്കുന്ന ഇറാന്റെ തുടര്‍ച്ചയായ നടപടികളെ ശക്തമായി അപലപിച്ച് സൗദി അറേബ്യ. വാണിജ്യ കപ്പലുകള്‍ക്ക് നേരെ ഇറാന്‍ നടത്തുന്ന ആവര്‍ത്തിച്ചുള്ള ആക്രമണങ്ങള്‍ സമുദ്രസുരക്ഷക്കും അന്താരാഷ്ട്ര കപ്പല്‍ ഗതാഗത സ്വാതന്ത്ര്യത്തിനും വലിയ ഭീഷണിയാണെന്ന് സൗദി വിദേശകാര്യ മന്ത്രാലയം പ്രസ്താവനയില്‍ വ്യക്തമാക്കി. ഇറാന്റെ ഇത്തരം പ്രകോപനപരമായ പെരുമാറ്റം അന്താരാഷ്ട്ര നിയമങ്ങളുടെയും, ഐക്യരാഷ്ട്രസഭയുടെയും, ഓര്‍ഗനൈസേഷന്‍ ഓഫ് ഇസ്ലാമിക് കോപ്പറേഷന്റെയും ചാര്‍ട്ടറുകളുടെയും നഗ്‌നമായ ലംഘനമാണെന്ന് മന്ത്രാലയം ചൂണ്ടിക്കാട്ടി. അതോടൊപ്പം, മേഖലയിലെ ഇതര പരമാധികാര രാഷ്ട്രങ്ങളായ കുവൈറ്റ്, ബഹ്‌റൈന്‍, ഖത്തര്‍, യുണൈറ്റഡ് അറബ് എമിറേറ്റ്‌സ്, ഒമാന്‍, ജോര്‍ദാന്‍ എന്നീ രാജ്യങ്ങള്‍ക്ക് നേരെ ഇറാന്‍ നടത്തുന്ന തുടര്‍ച്ചയായ ആക്രമണങ്ങളെയും പ്രസ്താവനയില്‍ ശക്തമായി അപലപിച്ചിട്ടുണ്ട്. സഹോദര രാജ്യങ്ങളുടെ പരമാധികാരത്തിന്മേലുള്ള ഇറാന്റെ കടന്നുകയറ്റങ്ങളെയും മേഖലയുടെ സമാധാനത്തിന് വെല്ലുവിളിയാകുന്ന ഇത്തരം ഭീഷണികളെയും രാജ്യം പൂര്‍ണ്ണമായി തള്ളിക്കളയുന്നതായി സൗദി വിദേശകാര്യ മന്ത്രാലയം ആവര്‍ത്തിച്ചു വ്യക്തമാക്കി.