തബൂക്ക്- സമുദ്ര മലിനീകരണവും എണ്ണച്ചോര്‍ച്ചയും മൂലമുണ്ടാകുന്ന അടിയന്തര സാഹചര്യങ്ങളെ നേരിടാന്‍ ബന്ധപ്പെട്ട അധികാരികളുടെ സജ്ജതയും വേഗവും വര്‍ദ്ധിപ്പിക്കുക എന്ന ലക്ഷ്യത്തോടെ ദേശീയതലത്തില്‍ നടത്തുന്ന 'റെസ്‌പോണ്‍സ് 24' സംയുക്ത പരിശീലനത്തിന് തബൂക്ക് മേഖലയില്‍ തുടക്കമായി. യഥാര്‍ത്ഥ സാഹചര്യങ്ങളെ അനുസ്മരിപ്പിക്കുന്ന രീതിയില്‍ നടത്തുന്ന ഈ മോക്ക് ഡ്രില്‍, എണ്ണച്ചോര്‍ച്ചയുണ്ടായാല്‍ സര്‍ക്കാര്‍-സ്വകാര്യ മേഖലകള്‍ തമ്മിലുള്ള ഏകോപനവും പ്രതികരണ വേഗവും വര്‍ദ്ധിപ്പിക്കാനും അതുവഴി സമുദ്ര പരിസ്ഥിതിയും തന്ത്രപ്രധാനമായ തീരദേശ സൗകര്യങ്ങളും സംരക്ഷിക്കാനും സഹായിക്കും.

പ്രിന്‍സ് മുഹമ്മദ് ബിന്‍ സല്‍മാന്‍ റോയല്‍ റിസര്‍വിന്റെ പരിധിയിലുള്ള പ്രാദേശിക സമുദ്രമേഖലയില്‍ ഏകദേശം 20,000 ബാരല്‍ എണ്ണ ചോരുന്നതായുള്ള സങ്കീര്‍ണ്ണ സാഹചര്യം സൃഷ്ടിച്ചാണ് ഈ പരിശീലനം പുരോഗമിക്കുന്നത്. പ്രസ്തുത റിസര്‍വിലെ സുരക്ഷാ സംവിധാനങ്ങള്‍ ആദ്യം സജീവമാക്കുകയും, തുടര്‍ന്ന് തബൂക്ക് മേഖലയിലെ ദുരന്തനിവാരണ വിഭാഗങ്ങളെ സംയോജിപ്പിച്ച് പ്രതികരണ നിലവാരം ഉയര്‍ത്തുകയുമാണ് ഇതിന്റെ പ്രവര്‍ത്തന രീതിയെന്ന് 'റെസ്‌പോണ്‍സ് 24' എക്‌സര്‍സൈസ് കമാന്‍ഡര്‍ റയാന്‍ അല്‍-തര്‍യാനി വ്യക്തമാക്കി. വിവിധ വകുപ്പുകള്‍ തമ്മിലുള്ള ഏകോപനവും എണ്ണച്ചോര്‍ച്ച കൈകാര്യം ചെയ്യുന്നതില്‍ ദേശീയ കേഡര്‍മാര്‍ക്കുള്ള പരിശീലനവും മെച്ചപ്പെടുത്താന്‍ ഇത് ഉപകരിക്കും.

ദേശീയതലത്തില്‍ എണ്ണച്ചോര്‍ച്ചയ്‌ക്കെതിരെ നടക്കുന്ന പരമ്പരയിലെ ഇരുപത്തിനാലാമത്തെയും, തബൂക്ക് മേഖലയില്‍ പ്രാദേശികമായി സംഘടിപ്പിക്കുന്ന നാലാമത്തെയും പരിശീലനമാണിത്. പ്രമുഖ പൊതു-സ്വകാര്യ മേഖലകളില്‍ നിന്നുള്ള നാല്‍പ്പതിലധികം വകുപ്പുകള്‍ സംയുക്തമായി ഈ ദൗത്യത്തില്‍ പങ്കാളികളാകുന്നുണ്ട്. ഓരോ പരിശീലനത്തിന് ശേഷവും പങ്കെടുക്കുന്ന ഏജന്‍സികളുടെ പ്രകടനം സമഗ്രമായി വിലയിരുത്തി, മുന്‍കാല അനുഭവങ്ങളില്‍ നിന്നും പാഠങ്ങള്‍ ഉള്‍ക്കൊണ്ട് പോരായ്മകള്‍ പരിഹരിക്കുകയും കരുത്തുറ്റ വശങ്ങള്‍ കൂടുതല്‍ ശക്തമാക്കുകയും ചെയ്യുന്ന അവലോകന രീതിയാണ് ഇതിനായി സംഘാടകര്‍ അവലംബിക്കുന്നത്.

സമുദ്ര മലിനീകരണവും ലംഘനങ്ങളും നിരീക്ഷിക്കാന്‍ സാറ്റലൈറ്റുകള്‍, അത്യാധുനിക സിമുലേഷന്‍ മാതൃകകള്‍, സ്മാര്‍ട്ട് ബോയകള്‍ തുടങ്ങിയ നൂതന സാങ്കേതികവിദ്യകളാണ് നിലവില്‍ ഉപയോഗിക്കുന്നത്. ഇത്തരം ആധുനിക സാങ്കേതിക സംവിധാനങ്ങളുടെ സഹായത്തോടെ ഏതെങ്കിലും തരത്തിലുള്ള ചോര്‍ച്ചയോ പരിസ്ഥിതി നാശമോ ഉണ്ടായാല്‍ തത്സമയം കണ്ടെത്താനും ബന്ധപ്പെട്ട അധികാരികളെ ഉടന്‍ വിവരമറിയിക്കാനും സാധിക്കും. ഇത് ദുരന്തനിവാരണ പ്രവര്‍ത്തനങ്ങളുടെ വേഗം വര്‍ദ്ധിപ്പിക്കുന്നതിനും സമുദ്ര പരിസ്ഥിതിയെ കൂടുതല്‍ ഫലപ്രദമായി സംരക്ഷിക്കുന്നതിനും വഴിതുറക്കുമെന്ന് അല്‍-തര്‍യാനി കൂട്ടിച്ചേര്‍ത്തു.