തിരുവനന്തപുരം: കേരളക്കരയില് ചികിത്സയ്ക്കായി എത്തുന്ന ദ്വീപ് നിവാസികള്ക്കും വിവിധ വിദ്യാഭ്യാസ സ്ഥാപനങ്ങളില് പഠിക്കുന്ന വിദ്യാര്ത്ഥികള്ക്കും കൂടുതല് പരിഗണന ആവശ്യപ്പെട്ട്, ലക്ഷദ്വീപ് കോണ്ഗ്രസ് കമ്മിറ്റി അധ്യക്ഷനും എം.പിയുമായ അഡ്വ. ഹംദുള്ള സഈദിന്റെ നേതൃത്വത്തിലുള്ള കോണ്ഗ്രസ് പ്രതിനിധി സംഘം കേരള മുഖ്യമന്ത്രിയെ സന്ദര്ശിച്ചു.
കേരളത്തിലെ വിവിധ സര്ക്കാര് ആശുപത്രികളില് ചികിത്സയ്ക്കായി എത്തുന്ന ലക്ഷദ്വീപ് നിവാസികള്ക്ക് പ്രത്യേക പരിഗണന നല്കുക, ബേപ്പൂര് തുറമുഖം അടക്കമുള്ള പ്രധാന തുറമുഖങ്ങള് വികസിപ്പിക്കുകയും ലക്ഷദ്വീപ് കപ്പലുകളുടെ യാത്ര സുഗമമാക്കുകയും ചെയ്യുക, പ്രകൃതിദുരന്ത സമയങ്ങളില് ലക്ഷദ്വീപ് നിവാസികള്ക്ക് കേരളത്തിലെ പ്രധാന നഗരങ്ങളില് താമസസൗകര്യങ്ങളും മറ്റ് സഹായങ്ങളും ഒരുക്കുക, ലക്ഷദ്വീപ് വിദ്യാര്ത്ഥികള് വിവിധ കോളേജുകളില് നേരിടുന്ന വിവിധ പ്രശ്നങ്ങള്ക്ക് പരിഹാരം കാണുക, ഓപ്പറേഷന് തൂഫാനില് ഉള്പ്പെടുത്തി ലക്ഷദ്വീപിലേക്കുള്ള ലഹരി കടത്ത് നിയന്ത്രിക്കുക തുടങ്ങിയ വിവിധ ആവശ്യങ്ങള് ഉന്നയിച്ചാണ് ലക്ഷദ്വീപ് എം.പി അഡ്വ. ഹംദുള്ള സഈദിന്റെ നേതൃത്വത്തില് കോണ്ഗ്രസ് നേതാക്കള് മുഖ്യമന്ത്രിയെ സന്ദര്ശിച്ചത്.
ലക്ഷദ്വീപും കേരളവുമായി പതിറ്റാണ്ടുകളായി തുടരുന്ന ബന്ധം കൂടുതല് ആഴത്തിലാക്കാന് സര്ക്കാരിന്റെ സഹകരണം ആവശ്യപ്പെട്ടതായും ഉന്നയിച്ച വിഷയങ്ങള് മുഖ്യമന്ത്രി അനുഭാവപൂര്വ്വം പരിഗണിച്ചെന്നും ഉചിതമായ തീരുമാനങ്ങള് ഉണ്ടാവുമെന്നാണ് പ്രതീക്ഷയെന്നും ഹംദുള്ള സഈദ് എം.പി പറഞ്ഞു. പത്ത് വര്ഷത്തിനുശേഷം കേരളത്തിന്റെ അധികാരത്തിലേക്ക് ശക്തമായ തിരിച്ചുവരവ് നടത്തിയ യു.ഡി.എഫ് നേതൃത്വത്തെ ലക്ഷദ്വീപ് കോണ്ഗ്രസ് സംഘം അഭിനന്ദിച്ചു.
കെപിസിസി പ്രസിഡന്റ് കൂടിയായ വൈദ്യുതി മന്ത്രി സണ്ണി ജോസഫ്, വിദ്യാഭ്യാസ മന്ത്രി എന് ഷംസുദ്ദീന് എന്നിവരെയും പ്രതിനിധി സംഘം സന്ദര്ശിച്ച് കൂടിക്കാഴ്ചകള് നടത്തി.
