ടെഹ്‌റാന്‍- ഇറാനിലെ ഊര്‍ജ്ജ നിലയങ്ങള്‍ക്ക് നേരെ അമേരിക്കന്‍ ആക്രമണമുണ്ടായാല്‍ ചെങ്കടലിലൂടെയുള്ള ആഗോള എണ്ണപ്പാത അടച്ചുപൂട്ടാന്‍ തങ്ങളുടെ സഖ്യകക്ഷിയായ യെമനിലെ ഹൂത്തി വിമതര്‍ക്ക് ഇറാന്‍ നിര്‍ദ്ദേശം നല്‍കിയതായി റിപ്പോര്‍ട്ട്. യു.എസ് പ്രസിഡന്റ് ഡൊണാള്‍ഡ് ട്രംപ് ഇറാനെതിരെ ഭീഷണി മുഴക്കിയതിന് പിന്നാലെയാണ് ഈ പുതിയ നീക്കമെന്ന് അന്താരാഷ്ട്ര മാധ്യമമായ റോയിട്ടേഴ്‌സ് വെളിപ്പെടുത്തി.

ചെങ്കടലിന്റെ പ്രവേശന കവാടമായ ബാബ് അല്‍-മന്ദബ് ഇടുക്കിന് സമീപം ഹൂത്തികള്‍ ഇതിനകം തന്നെ മിസൈലുകളും ഡ്രോണുകളും വിന്യസിച്ച് ആക്രമണത്തിനുള്ള സന്നാഹങ്ങള്‍ പൂര്‍ത്തിയാക്കിയിട്ടുണ്ട്. യെമനിലുള്ള ഇറാന്‍ റെവല്യൂഷണറി ഗാര്‍ഡ് പ്രതിനിധികളായിരിക്കും ഈ ആക്രമണങ്ങള്‍ക്ക് അന്തിമ അനുമതി നല്‍കുകയെന്നാണ് സൂചന.

നേരത്തെയുണ്ടായ സംഘര്‍ഷങ്ങളെ തുടര്‍ന്ന് ഹോര്‍മുസ് ഇടുക്ക് വഴിയുള്ള കപ്പല്‍ ഗതാഗതം തടസ്സപ്പെട്ടിരിക്കുന്ന സാഹചര്യത്തില്‍, ചെങ്കടല്‍ പാതകൂടി അടയ്ക്കപ്പെടുന്നത് ആഗോള ഊര്‍ജ്ജ മേഖലയെ ചരിത്രത്തിലെ ഏറ്റവും വലിയ പ്രതിസന്ധിയിലേക്ക് തള്ളിവിടും. ഹോര്‍മുസ് പാത അടഞ്ഞതോടെ ഗള്‍ഫ് രാജ്യങ്ങളില്‍നിന്നുള്ള എണ്ണ കയറ്റുമതിയുടെ ഭൂരിഭാഗവും ഇപ്പോള്‍ ചെങ്കടല്‍ വഴിയാണ് നടക്കുന്നത്. സൗദി അറേബ്യ തങ്ങളുടെ എണ്ണ കയറ്റുമതിയുടെ 70 ശതമാനവും ചെങ്കടല്‍ തുറമുഖമായ യാമ്പു വഴിയാണ് തിരിച്ചുവിട്ടിരിക്കുന്നത്. അതിനാല്‍ ചെങ്കടലില്‍ ഉണ്ടാകുന്ന ഏതൊരു ആക്രമണവും എണ്ണ വ്യാപാരത്തെയും ഒപ്പം ആഗോള വിപണിയെയും ഒരുപോലെ നിശ്ചലമാക്കും.

തങ്ങളുടെ നിയന്ത്രണത്തിലുള്ള സന്‍ആ വിമാനത്താവളത്തിന് നേരെ ആക്രമണമുണ്ടായെന്ന് ആരോപിച്ച് ഹൂത്തികള്‍ സൗദി അറേബ്യയ്ക്ക് നേരെ മിസൈലുകള്‍ തൊടുത്തുവിട്ടതോടെ കഴിഞ്ഞ നാല് വര്‍ഷമായി നിലനിന്നിരുന്ന താല്‍ക്കാലിക സമാധാന കരാറും തകര്‍ന്നിരിക്കുകയാണ്. മേഖലയിലെ സുരക്ഷാ വെല്ലുവിളികളെ അതീവ ഗൗരവത്തോടെയാണ് കാണുന്നതെന്ന് സൗദി ഭരണകൂടം വ്യക്തമാക്കിയിട്ടുണ്ട്. അമേരിക്കയുമായുള്ള സംഘര്‍ഷം മുറുകുന്ന സാഹചര്യത്തില്‍ ചെങ്കടലിലെ എണ്ണക്കടത്ത് തടസ്സപ്പെടുത്തി ആഗോള സമ്പദ്വ്യവസ്ഥയെ സമ്മര്‍ദ്ദത്തിലാക്കാനാണ് ഇറാന്‍ ലക്ഷ്യമിടുന്നത്.