റിയാദ്: സൗദി അറേബ്യയില്‍ ആദ്യമായി വിദൂര റോബോട്ടിക് ശസ്ത്രക്രിയ (telesurgery) വിജയകരമായി നടത്തി നാഷണല്‍ ഗാര്‍ഡ് ഹെല്‍ത്ത് അഫയേഴ്സ് മന്ത്രാലയം ചരിത്രം കുറിച്ചു. ജിദ്ദയിലെ കിംഗ് അബ്ദുല്‍ അസീസ് മെഡിക്കല്‍ സിറ്റിയിലുള്ള രോഗിയിലാണ് ഈ നൂതന ശസ്ത്രക്രിയ നടത്തിയത്.

റിയാദിലെ കിംഗ് അബ്ദുല്‍ അസീസ് മെഡിക്കല്‍ സിറ്റിയിലെ മെഡിക്കല്‍ സംഘമാണ് റോബോട്ടിക് സംവിധാനം നിയന്ത്രിച്ച് ശസ്ത്രക്രിയ പൂര്‍ത്തിയാക്കിയത്. ഇരു നഗരങ്ങളിലെയും കിഡ്നി, യൂറോളജി വിഭാഗങ്ങളിലെ ശസ്ത്രക്രിയാ വിദഗ്ധര്‍ തമ്മിലുള്ള മികച്ച ഏകോപനത്തിലൂടെയാണ് ഈ നേട്ടം കൈവരിക്കാനായത്.

'കാംഗ്ഡുവോ - സേജ്ബോട്ട്' പ്ലാറ്റ്ഫോം ഉപയോഗിച്ചാണ് ശസ്ത്രക്രിയ നടത്തിയത്. അത്യാധുനിക റോബോട്ടിക് സാങ്കേതികവിദ്യകളും മികച്ച ആശയവിനിമയ സംവിധാനങ്ങളും ഉപയോഗിച്ച് റിയാദിലെ ശസ്ത്രക്രിയാ സംഘം അതീവ കൃത്യതയോടെയാണ് നടപടിക്രമങ്ങള്‍ പൂര്‍ത്തിയാക്കിയത്.

രാജ്യത്ത് വിദൂര റോബോട്ടിക് ശസ്ത്രക്രിയാ സാങ്കേതികവിദ്യയുടെ പ്രയോഗത്തില്‍ വലിയൊരു കുതിച്ചുചാട്ടമാണിത്. കൂടാതെ, നാഷണല്‍ ഗാര്‍ഡ് ഹെല്‍ത്ത് അഫയേഴ്സ് മന്ത്രാലയത്തിന് കീഴിലുള്ള വിവിധ ആശുപത്രികള്‍ തമ്മിലുള്ള മികച്ച സഹകരണത്തെയും ഈ നേട്ടം എടുത്തുകാണിക്കുന്നു. ആരോഗ്യപരിപാലന രംഗത്തെ ഗുണനിലവാരവും കാര്യക്ഷമതയും വര്‍ധിപ്പിക്കാന്‍ ഈ സാങ്കേതികവിദ്യ സഹായിക്കും. രോഗികളെ മറ്റു നഗരങ്ങളിലേക്ക് മാറ്റാതെ തന്നെ വിദഗ്ധ ചികിത്സ ലഭ്യമാക്കാന്‍ സാധിക്കുമെന്നത് ഭാവിയില്‍ വലിയ ഗുണം ചെയ്യുമെന്നും അധികൃതര്‍ വ്യക്തമാക്കി.