ജിദ്ദ: സൗദിയില്‍ ട്രെയിലര്‍ ഡ്രൈവറായി ജോലിക്കെത്തിയ മലയാളി യുവാവിനെ കാണാനില്ലെന്ന് പരാതി. എറണാകുളം ജില്ലയിലെ മലയാറ്റൂര്‍ പല്ലിശ്ശേരി തോമസ് മകന്‍ സജിയെ (43) ആണ് കാണാതായത്. നേരത്തെ സൗദിയില്‍ ജോലി ചെയ്തിട്ടുള്ള ഇദ്ദേഹം ഏതാനും ദിവസം മുന്‍പാണ് പുതിയ ജോലിയില്‍ സൗദിയിലെത്തിയത്. റിയാദിലെ കമ്പനി ആസ്ഥാനത്തെത്തി അവിടെ നിന്നും മറ്റൊരു ഡ്രൈവറോടൊപ്പം ജിദ്ദയിലേക്ക് ലോഡുമായി വന്നതായിരുന്നു.

ജിദ്ദ അല്‍ഖുംറയില്‍ എത്തിയ ശേഷം പുറത്തേക്കു പോയ ഇദ്ദേഹത്തെ പിന്നീട് കണ്ടെത്താനയില്ലെന്നാണ് കൂടെ ഉണ്ടായിരുന്ന രാജസ്ഥാന്‍ സ്വദേശിയായ ഡ്രൈവര്‍ പറയുന്നത്. ജൂലൈ 15 മുതലാണ് ഇദ്ദേഹത്തെ കാണാതായത്. പലയിടത്തും അന്വേഷണം നടത്തിയെങ്കിലും സജിയെക്കുറിച്ചുള്ള സൂചനകളൊന്നും ലഭിച്ചില്ലെന്ന് ബന്ധുക്കള്‍ പറയുന്നു. 170 സെ.മീ ഉയരമുള്ള ഇദ്ദേഹത്തിന് വെളുത്ത നിറമാണ്. സൗദിയിലെത്തി അധിക ദിവസം ആയിട്ടില്ലാത്തതിനാല്‍ ഇഖാമ ലഭിച്ചിട്ടില്ല. പാസ്‌പോര്‍ട്ട് മാത്രമാണ് രേഖയായി കൈവശം ഉണ്ടായിരുന്നത്. എന്നാല്‍ പാസ്‌പോര്‍ട്ട് അടക്കമുള്ള ബാഗ് ഇദ്ദേഹം ട്രെയിലറില്‍ തന്നെ വച്ചിട്ടുണ്ടായിരുന്നു. അതിനാല്‍ കൈവശം മറ്റു രേഖകളൊന്നും കാണാന്‍ സാധ്യതയില്ല.

ഇദ്ദേഹത്തെക്കുറിച്ച് എന്തെങ്കിലും സൂചന ലഭിക്കുന്നവര്‍ കേരളം, ഇന്ത്യ: +91 7592928274 (നെല്‍സണ്‍ സ്റ്റീഫന്‍), സൗദി അറേബ്യ: +966 511475813 (ജോഫിന്‍ ജോസഫ്) എന്നിവരുമായി ബന്ധപ്പെടുക.