റിയാദ്: മൂന്നാമത് അന്താരാഷ്ട്ര അണുശാസ്ത്ര ഒളിമ്പ്യാഡിന് (INSO 2026) ജിദ്ദ ആതിഥേയത്വം വഹിക്കും. 19 രാജ്യങ്ങളില്‍ നിന്നുള്ള 120-ലധികം വിദ്യാര്‍ത്ഥികളും ശാസ്ത്ര വിദഗ്ധരും ഒളിമ്പ്യാഡില്‍ പങ്കെടുക്കും. വിദ്യാഭ്യാസ മന്ത്രാലയം, പ്രതിഭകളെയും സര്‍ഗ്ഗാത്മകതയെയും പ്രോത്സാഹിപ്പിക്കുന്നതിനുള്ള കിംഗ് അബ്ദുല്‍ അസീസ് ആന്‍ഡ് ഹിസ് കമ്പാനിയന്‍സ് ഫൗണ്ടേഷന്‍ (മഹ്സിബ - Mawhiba), കിംഗ് അബ്ദുല്ല സിറ്റി ഫോര്‍ അറ്റോമിക് ആന്‍ഡ് റിന്യൂവബിള്‍ എനര്‍ജി (KACARE) എന്നിവയുടെ സംയുക്ത ആഭിമുഖ്യത്തിലാണ് ഈ പരിപാടി സംഘടിപ്പിക്കുന്നത്. 2026 ആഗസ്റ്റ് 2 മുതല്‍ 9 വരെ കിംഗ് അബ്ദുല്‍ അസീസ് സര്‍വ്വകലാശാലയുടെ നേതൃത്വത്തിലാണ് പരിപാടി നടക്കുന്നത്. മക്കാ പ്രവിശ്യയുടെ ഡെപ്യൂട്ടി ഗവര്‍ണര്‍ പ്രിന്‍സ് സൗദ് ബിന്‍ മിഷാല്‍ ബിന്‍ അബ്ദുല്‍ അസീസിന്റെ രക്ഷാകര്‍തൃത്വത്തില്‍ ആഗസ്റ്റ് 3 തിങ്കളാഴ്ച ഉദ്ഘാടനച്ചടങ്ങ് നടക്കും.

2024-ല്‍ അന്താരാഷ്ട്ര ആറ്റോമിക ഊര്‍ജ്ജ ഏജന്‍സി (IAEA) അംഗീകരിച്ച അന്താരാഷ്ട്ര അണുശാസ്ത്ര ഒളിമ്പ്യാഡ് (INSO), അണുശാസ്ത്രത്തിലും അതിന്റെ സമാധാനപരമായ പ്രയോഗങ്ങളിലും വൈദഗ്ധ്യം കൈമാറുന്നതിനുള്ള ഒരു ആഗോള ശാസ്ത്ര വേദിയാണ്.

ന്യൂക്ലിയര്‍ സാങ്കേതികവിദ്യകളുടെ സുരക്ഷിതവും സമാധാനപരവുമായ ഉപയോഗം പ്രോത്സാഹിപ്പിക്കുന്നതിനും, യുവാക്കളെ ഈ മേഖലയില്‍ സ്‌പെഷ്യലൈസ് ചെയ്യാന്‍ പ്രേരിപ്പിക്കുന്നതിനും, അണുശാസ്ത്രത്തിന്റെ സമാധാനപരമായ പ്രയോഗങ്ങള്‍ വികസിപ്പിക്കുന്നതിനുള്ള നൂതനമായ വഴികള്‍ കണ്ടെത്താന്‍ അവരെ പ്രചോദിപ്പിക്കുന്നതിനും ഈ ഒളിമ്പ്യാഡ് സഹായകരമാണ്.

അന്താരാഷ്ട്ര ശാസ്ത്ര മത്സരങ്ങള്‍ സംഘടിപ്പിക്കുന്നതില്‍ സൗദി അറേബ്യയുടെ വര്‍ദ്ധിച്ചുവരുന്ന പ്രാധാന്യമാണ് ഈ ഒളിമ്പ്യാഡിന്റെ ആതിഥേയത്വം വ്യക്തമാക്കുന്നത്. മഹ്സിബയിലൂടെ, ഫിലിപ്പൈന്‍സില്‍ നടന്ന പ്രഥമ പതിപ്പ് (2024) മുതല്‍ സൗദി അറേബ്യ ഈ ഒളിമ്പ്യാഡില്‍ പങ്കെടുക്കുന്നുണ്ട്. തുടര്‍ന്ന് മലേഷ്യയില്‍ നടന്ന 2025 ലെ പതിപ്പിലും സൗദി അറേബ്യ പങ്കെടുത്തു. ഇതുവരെ ഒരു വെള്ളി മെഡലും മൂന്ന് വെങ്കല മെഡലുകളുമടക്കം അഞ്ച് അന്താരാഷ്ട്ര പുരസ്‌കാരങ്ങള്‍ സൗദി നേടിയിട്ടുണ്ട്. ഒളിമ്പ്യാഡിന്റെ മൂന്നാം പതിപ്പിന് ആതിഥേയത്വം വഹിക്കുന്നത് ശാസ്ത്രീയ മികവിനുള്ള സൗദി അറേബ്യയുടെ പ്രതിബദ്ധതയാണ് കാണിക്കുന്നത്.