ജിദ്ദ: മദീന റോഡില് പ്രവര്ത്തിക്കുന്ന ഇന്ത്യന് ഇസ്ലാഹി സെന്ററിന്റെ ആഭിമുഖ്യത്തില് ഖുര്ആന് പഠിതാക്കള്, സന്നദ്ധപ്രവര്ത്തകര്, ഭാരവാഹികള് എന്നിവര്ക്കായി ആത്മീയാനുഭവങ്ങള് സമ്മാനിച്ച ഏകദിന മദീന സിയാറ സംഘടിപ്പിച്ചു.
സുബ്ഹി നമസ്കാരത്തിന് ശേഷം ജിദ്ദയില് നിന്ന് യാത്ര തിരിച്ച സംഘം മദീനയിലെത്തി പ്രവാചകന്റെ പള്ളി (മസ്ജിദുന്നബവി), മസ്ജിദുല് ഖുബാ, മസ്ജിദുല് ഖിബ്ലതൈന് തുടങ്ങി ഇസ്ലാമിക ചരിത്രവുമായി അഭേദ്യമായി ബന്ധപ്പെട്ട വിശുദ്ധവും ചരിത്രപ്രസിദ്ധവുമായ നിരവധി സ്ഥലങ്ങള് സന്ദര്ശിച്ചു. ആത്മീയ നിര്വൃതിയും ചരിത്രസ്മരണകളും നിറഞ്ഞ സന്ദര്ശനത്തിന് ശേഷം സംഘം രാത്രിയോടെ ജിദ്ദയിലേക്ക് മടങ്ങി.
യാത്രയിലുടനീളം സെന്ററിലെ ഖുര്ആന് പഠിതാക്കളും പ്രസംഗ പരിശീലന വിദ്യാര്ത്ഥികളും അവതരിപ്പിച്ച വൈവിധ്യമാര്ന്ന വിഷയങ്ങളിലെ പ്രഭാഷണങ്ങള്, അറബി അക്ഷരമാലയെ ആസ്പദമാക്കി സംഘടിപ്പിച്ച ഖുര്ആന് അന്താക്ഷരി മത്സരം, വിജ്ഞാനപ്രദവും ചിന്തോദ്ദീപകവുമായ മറ്റ് സംവേദനാത്മക പരിപാടികള് എന്നിവ യാത്രയെ കൂടുതല് സജീവവും അര്ത്ഥപൂര്ണവുമാക്കി.
ഖുര്ആന് പഠനവും വ്യക്തിത്വ വികസനവും ആത്മീയ മൂല്യങ്ങളും സമന്വയിപ്പിച്ച ഇത്തരം യാത്രകള് പഠിതാക്കളുടെ വിജ്ഞാനവികാസത്തിനും സഹോദര്യബോധം ശക്തിപ്പെടുത്തുന്നതിനും ഏറെ സഹായകരമാണെന്ന് സംഘാടകര് അഭിപ്രായപ്പെട്ടു. പരിപാടികള്ക്കും യാത്രയ്ക്കും ഇസ്സുദ്ദീന് സ്വലാഹി, നൗഫല് കരുവാരകുണ്ട്, നഈം മോങ്ങം, ഫിറോസ് കൊയിലാണ്ടി എന്നിവര് നേതൃത്വം നല്കി.
Related News
