ബിഷ: തമിഴ്നാട് കുഞ്ഞരം സ്വദേശി രാജഭാരതി സദാശിവനെ (26) സൗദി അറേബ്യയിലെ ബിഷയ്ക്ക് സമീപമുള്ള ഹൈമത്താറില്‍ താമസസ്ഥലത്ത് തൂങ്ങി മരിച്ച നിലയില്‍ കണ്ടെത്തി. ബിഷയിലെത്തിയിട്ട് 10 മാസം മാത്രമേ ആയിട്ടുള്ളൂ. ഇന്ന് പുലര്‍ച്ചെ നാലു മണിയോടെയാണ് സംഭവം. 'ഞാന്‍ ഇവിടെ ജീവിതം അവസാനിപ്പിക്കുകയാണ്' എന്ന് രാജഭാരതി നാട്ടിലുള്ള സഹോദരിക്ക് വാട്സ്ആപ്പ് സന്ദേശമയച്ചിരുന്നു. തുടര്‍ന്ന് സഹോദരി ബിഷയിലുള്ള അമ്മാവന്റെ മകനെ വിവരമറിയിക്കുകയും, അദ്ദേഹം റൂമിലെത്തി നോക്കിയപ്പോള്‍ രാജഭാരതിയെ തൂങ്ങിനില്‍ക്കുന്ന നിലയില്‍ കണ്ടെത്തുകയുമായിരുന്നു.

ഉടന്‍തന്നെ സ്‌പോണ്‍സറെയും പോലീസിനെയും ആംബുലന്‍സിനെയും വിവരമറിയിച്ചു. പോലീസ് നടപടികള്‍ക്ക് ശേഷം മൃതദേഹം ബിഷ കിംഗ് അബ്ദുള്ള ആശുപത്രി മോര്‍ച്ചറിയിലേക്ക് മാറ്റി. പ്രണയിച്ച പെണ്‍കുട്ടിയുടെ വിവാഹം മറ്റൊരാളുമായി ഉറപ്പിച്ചതിലുള്ള മനോവിഷമമാണ് ആത്മഹത്യക്ക് കാരണമെന്ന് ബന്ധുക്കള്‍ പറഞ്ഞു.

നിയമനടപടികള്‍ പൂര്‍ത്തിയാക്കി മൃതദേഹം നാട്ടിലേക്ക് കൊണ്ടുപോകുന്നതിനുള്ള പ്രവര്‍ത്തനങ്ങള്‍ക്ക് ബിഷയിലെ സാമൂഹിക പ്രവര്‍ത്തകന്‍ അബ്ദുല്‍ അസീസ് പാതിരപ്പറമ്പന്‍ (കൊണ്ടോട്ടി) നേതൃത്വം നല്‍കുന്നു.