ജിദ്ദ: രാജ്യത്തെ വികസന ഭവന പദ്ധതികളുടെ ഗുണഭോക്താക്കള്ക്കായി നിക്ഷേപകര്ക്ക് ഭൂമി വികസിപ്പിക്കാനും ഭവന നിര്മ്മാണം നടത്താനും അനുമതി നല്കുന്ന പുതിയ പദ്ധതിക്ക് സൗദി മന്ത്രിസഭ അംഗീകാരം നല്കി. പദ്ധതിയുടെ ഭാഗമായി നിര്മ്മാണം നടത്തുന്നവര്ക്ക് ഭൂമിയുടെ നിശ്ചിത ശതമാനം അവകാശമായി കൈമാറുന്ന ഫ്രേംവര്ക്കിനാണ് അംഗീകാരം ലഭിച്ചത്. കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന്റെ അധ്യക്ഷതയില് ജിദ്ദയില് ചേര്ന്ന മന്ത്രിസഭാ യോഗത്തിലാണ് ഈ സുപ്രധാന തീരുമാനം. രേഖകളില്ലാത്ത റിയല് എസ്റ്റേറ്റ് ഇടപാടുകള് നിയമവിധേയമാക്കുന്നതിനുള്ള അവസാന തീയതി ഒരു വര്ഷത്തേക്ക് കൂടി നീട്ടാനും യോഗം തീരുമാനിച്ചു.
മേഖലയിലെ സുരക്ഷയും സമാധാനവും ലക്ഷ്യമിട്ട് വിവിധ രാജ്യങ്ങളുടെ നേതാക്കളുമായി കിരീടാവകാശി നടത്തിയ ചര്ച്ചകളും യോഗം വിലയിരുത്തി. അന്താരാഷ്ട്ര ഷിപ്പിംഗ് പാതകളും ഊര്ജ്ജ വിതരണ ശൃംഖലകളും സംരക്ഷിക്കുന്നതിനായി സൗദി അറേബ്യയുടെ നേതൃത്വത്തിലുള്ള മള്ട്ടിനാഷണല് മാരിടൈം ഡിഫന്സ് അലയന്സില് കൂടുതല് രാജ്യങ്ങള് ചേരുന്നതിനെ മന്ത്രിസഭ സ്വാഗതം ചെയ്തു.
ഗാസ മുനമ്പിലെ ചരിത്രപരമായ വെടിനിര്ത്തല് കരാര് സമഗ്രമായ സമാധാന പദ്ധതികളിലേക്കും ഫലസ്തീന് ജനതയുടെ സ്വയം നിര്ണ്ണയാവകാശത്തിലേക്കും നയിക്കുമെന്ന് മന്ത്രിസഭ പ്രത്യാശ പ്രകടിപ്പിച്ചു. കൂടാതെ, സൗദി വിഷന് 2030-ന്റെ ഭാഗമായി രാജ്യം കൈവരിച്ച സാമ്പത്തിക വളര്ച്ചയെയും അന്താരാഷ്ട്ര നാണ്യനിധിയുടെ (IMF) 2026ലെ ആര്ട്ടിക്കിള് കഢ കണ്സള്ട്ടേഷന് റിപ്പോര്ട്ടിനെയും മന്ത്രിസഭ അഭിനന്ദിച്ചു.
സൗദി അറേബ്യയും ഇക്വഡോര്, കസാഖ്സ്ഥാന്, സ്പെയിന്, സൊമാലിയ, ദക്ഷിണ കൊറിയ, തുര്ക്കി തുടങ്ങിയ വിവിധ രാജ്യങ്ങളുമായുള്ള സഹകരണ കരാറുകള്ക്കും ധാരണാപത്രങ്ങള്ക്കും യോഗം അംഗീകാരം നല്കി. ഔദ്യോഗിക ടെന്ഡര് നിയമങ്ങളും വിവിധ വകുപ്പുകളുടെ പുതിയ ഭേദഗതികളും മന്ത്രിസഭയുടെ പരിഗണനയില് പാസ്സായി.
Related News
