ജിദ്ദ/ജിസാന്: സ്ട്രോക്ക് ബാധിച്ചതിനെ തുടര്ന്ന് ചികിത്സയിലായിരുന്ന വേങ്ങര പറപ്പൂര് ഇരിങ്ങല്ലൂര് കോട്ടംപറമ്പ് സ്വദേശി പറമ്പന് മുഹമ്മദ് അഷ്റഫ് (54) ജിദ്ദ കിംഗ് ഫഹദ് ആശുപത്രിയില് നിര്യാതനായി. മുപ്പത് വര്ഷമായി പ്രവാസിയായ അദ്ദേഹം ജിദ്ദ അല് ഹംറയില് സൂപ്പര്മാര്ക്കറ്റ് ജീവനക്കാരനായിരുന്നു. പരേതനായ മുന് പറപ്പൂര് പഞ്ചായത്ത് പ്രസിഡന്റ് പറമ്പന് ഇബ്രാഹിം ഹാജിയുടെയും ആമിന കുട്ടിയുടെയും മകനാണ്. ഭാര്യ: സുനീറ. മക്കള്: ഹാഷിം, ഹിഷാം, അസ്ഹര്. സഹോദരങ്ങള്: മന്സൂര്, അസ്മാബി, നുസൈബ, മുനീറ, പരേതയായ സാബിറ. മയ്യിത്ത് ജിദ്ദയില് ഖബറടക്കുമെന്ന് ബന്ധുക്കള് അറിയിച്ചു. കര്മ്മങ്ങള്ക്കും സഹായങ്ങള്ക്കുമായി ജിദ്ദ കെ എം സി സി പ്രവര്ത്തകര് ഒപ്പമുണ്ട്.
സൗദി അറേബ്യയിലെ ജിസാന് ദര്ബിലുണ്ടായ വാഹനാപകടത്തില് മരണപ്പെട്ട മലപ്പുറം മൂന്നിയൂര് ചിനക്കല് സ്വദേശി എരണിക്കല് നൗഫലിന്റെ (42) മൃതദേഹം ദര്ബില് ഖബറടക്കി. ദര്ബില് ടെക്സ്റ്റൈല് ജീവനക്കാരനായിരുന്ന നൗഫല്, കഴിഞ്ഞ തിങ്കളാഴ്ച രാത്രി ജോലി കഴിഞ്ഞ് പതിവ് നടത്തത്തിനിടെ ഈജിപ്ഷ്യന് പൗരന്റെ വാഹനമിടിച്ച് ഗുരുതര പരിക്കുകളോടെ അബോധാവസ്ഥയിലാവുകയായിരുന്നു. ഉടനെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
അബൂഅരീഷ് കിംഗ് ഫഹദ് ആശുപത്രി മോര്ച്ചറിയിലുണ്ടായിരുന്ന മൃതദേഹം വ്യാഴാഴ്ച ളുഹറിന് ശേഷം അബൂഅരീഷിലെ ഹോസ്പിറ്റലിനോട് ചേര്ന്ന മസ്ജിദിലും, അസറിന് ശേഷം ദര്ബ് അല് ജൗഹറ മസ്ജിദിലും വെച്ച് ജനാസ നിസ്കാരങ്ങള് നടത്തി. തുടര്ന്ന് ദര്ബ് അല്ഗായിം മഖ്ബറയില് സംസ്കരിച്ചു. മുസ്തഫ സഹദി പ്രാര്ത്ഥനയ്ക്ക് നേതൃത്വം നല്കി.
ജിസാന് കെ എം സി സി സെന്ട്രല് കമ്മിറ്റി വെല്ഫെയര് വിംഗിന്റെ നേതൃത്വത്തിലാണ് നിയമനടപടികള് പൂര്ത്തിയാക്കിയത്. ജിസാന് കെ എം സി സി പ്രസിഡന്റും ജിദ്ദ ഇന്ത്യന് കോണ്സുലേറ്റിന് കീഴിലെ വെല്ഫെയര് വിംഗ് അംഗവുമായ ശംസു പൂക്കോട്ടൂര് നടപടിക്രമങ്ങള് ഏകോപിപ്പിച്ചു. നാട്ടുകാരും വിവിധ സംഘടനാ പ്രവര്ത്തകരും ചടങ്ങുകളില് സന്നിഹിതരായിരുന്നു.
ഫോട്ടോ: മുഹമ്മദ് അഷ്റഫ്, നൗഫല്
.jpg)
Related News
