റിയാദ്: ശക്തമായ ആവശ്യകത, സ്ഥിരതയാര്‍ന്ന നാണയപ്പെരുപ്പം, എണ്ണയിതര സാമ്പത്തിക വളര്‍ച്ച എന്നിവയുടെ പിന്തുണയോടെ 2026-ലെ ആദ്യ പാദത്തില്‍ സൗദി അറേബ്യയിലെ ഉപഭോക്തൃ ചെലവഴിക്കല്‍ മുന്‍വര്‍ഷത്തെ അപേക്ഷിച്ച് 6.8 ശതമാനം ഉയര്‍ന്ന് 42.5 ലക്ഷം കോടി സൗദി റിയാലിലെത്തി. പ്രമുഖ കണ്‍സള്‍ട്ടന്‍സി സ്ഥാപനമായ 'നൈറ്റ് ഫ്രാങ്ക്' പുറത്തുവിട്ട റിപ്പോര്‍ട്ടിലാണ് ഈ വിവരമുള്ളത്.

സ്ഥാപനത്തിന്റെ 'സൗദി അറേബ്യ റീട്ടെയില്‍ മാര്‍ക്കറ്റ് ഓവര്‍വ്യൂ - സമ്മര്‍ 2026' റിപ്പോര്‍ട്ട് പ്രകാരം, പോയിന്റ് ഓഫ് സെയില്‍ ഇടപാടുകള്‍, എടിഎം വഴിയുള്ള പണം പിന്‍വലിക്കലുകള്‍, ഇ-കൊമേഴ്‌സ് പര്‍ച്ചേസുകള്‍ എന്നിവയെല്ലാം ഈ വളര്‍ച്ചയില്‍ ഉള്‍പ്പെടുന്നുണ്ട്. ഔദ്യോഗിക പേയ്മെന്റ് ചാനലുകള്‍ വഴി 2025-ല്‍ രേഖപ്പെടുത്തിയ റെക്കോര്‍ഡ് തുകയായ 1.57 ട്രില്യണ്‍ റിയാലിന്റെ തുടര്‍ച്ചയായാണ് ഈ വളര്‍ച്ചയെന്നും പ്രസ്താവനയില്‍ വ്യക്തമാക്കുന്നു.

2026-ലെ ആദ്യ പാദത്തില്‍ രാജ്യത്തിന്റെ സമ്പദ്വ്യവസ്ഥ 3% വളര്‍ച്ച നേടി (എണ്ണയിതര പ്രവര്‍ത്തനങ്ങളില്‍ 2.9% വളര്‍ച്ച). നാണയപ്പെരുപ്പം 1.8% ആയി നിയന്ത്രിച്ചുനിര്‍ത്താന്‍ കഴിഞ്ഞു.

പ്രാദേശികമായ സംഘര്‍ഷങ്ങളും അനിശ്ചിതത്വങ്ങളും നിലനില്‍ക്കുന്നുണ്ടെങ്കിലും, എണ്ണയിതര സാമ്പത്തിക വളര്‍ച്ചയും കുടുംബങ്ങളുടെ വരുമാനത്തിലുണ്ടായ വര്‍ദ്ധനവും കാരണം ഉപഭോക്തൃ ചെലവഴിക്കല്‍ വളരെ ശക്തമായി തുടരുന്നുവെന്ന് നൈറ്റ് ഫ്രാങ്കിന്റെ മിഡില്‍ ഈസ്റ്റ് ആന്‍ഡ് നോര്‍ത്ത് ആഫ്രിക്ക റിസര്‍ച്ച് ഹെഡ് ഫൈസല്‍ ദുറാനി വ്യക്തമാക്കി. ഷോപ്പിംഗിനും ഭക്ഷണത്തിന് പുറമെ കുടുംബത്തോടൊപ്പമുള്ള വിനോദങ്ങള്‍, ഫിറ്റ്നസ്, വിവിധ പരിപാടികള്‍, സാമൂഹിക പ്രവര്‍ത്തനങ്ങള്‍ എന്നിവ കൂടി ഉള്‍ക്കൊള്ളുന്ന സമഗ്രമായ ഒരു 'ഡേ-ഔട്ട്' അനുഭവമാണ് ഉപഭോക്താക്കള്‍ ഇപ്പോള്‍ ആഗ്രഹിക്കുന്നത്. ഇത് ഷോപ്പിംഗ് മാളുകളുടെയും റീട്ടെയില്‍ ഇടങ്ങളുടെയും നിര്‍മ്മാണ ശൈലിയില്‍ മാറ്റം വരുത്താന്‍ ഡെവലപ്പര്‍മാരെ പ്രേരിപ്പിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.

2030-ഓടെ പ്രതിവര്‍ഷം 15- കോടി (150 ദശലക്ഷം) സന്ദര്‍ശകരെ ആകര്‍ഷിക്കുക, മൊത്ത ആഭ്യന്തര ഉല്‍പ്പാദനത്തിലേക്ക് (GDP) ടൂറിസത്തിന്റെ സംഭാവന 10 ശതമാനമായി ഉയര്‍ത്തുക എന്നീ ലക്ഷ്യങ്ങളോടെയുള്ള 'വിഷന്‍ 2030' പദ്ധതിയും സൗദി റീട്ടെയില്‍ മേഖലയ്ക്ക് വന്‍ കരുത്താണ് പകരുന്നത്. ഇന്റര്‍നാഷണല്‍ മോണിറ്ററി ഫണ്ടിന്റെ പ്രവചനപ്രകാരം 2026-ല്‍ രാജ്യത്തിന്റെ സാമ്പത്തിക വളര്‍ച്ച 1.7 ശതമാനമായിരിക്കുമെന്നും, 2027-ഓടെ ഇത് 5.5 ശതമാനമായി വേഗത്തിലാകുമെന്നുമാണ് പ്രതീക്ഷിക്കുന്നത്.