ഖത്തീഫ്: കിഴക്കന് പ്രവിശ്യയിലെ പ്രധാന മത്സ്യവിപണിയായ ഖത്തീഫ് ഫിഷ് മാര്ക്കറ്റില് ചെമ്മീന് സീസണ് സജീവമായതോടെ വ്യാപാര രംഗം കൂടുതല് സജീവമായി. ഏതാനും ആഴ്ചകളായി കടലിലെ പ്രതികൂല സാഹചര്യങ്ങള് മത്സ്യബന്ധനത്തെ ബാധിച്ചിരുന്നെങ്കിലും കാലാവസ്ഥ മെച്ചപ്പെട്ടതോടെ മത്സ്യബന്ധന ബോട്ടുകള് മികച്ച ചെമ്മീന് ശേഖരവുമായി തീരത്തെത്താന് തുടങ്ങി. ഇതോടെ മത്സ്യത്തൊഴിലാളികള്ക്കും വ്യാപാരികള്ക്കും അനുബന്ധ മേഖലകളില് ജോലി ചെയ്യുന്നവര്ക്കും വലിയ പ്രതീക്ഷയാണ് കൈവന്നിരിക്കുന്നത്.
ഓരോ വര്ഷവും ചെമ്മീന് സീസണ് ആരംഭിക്കുമ്പോള് ഖത്തീഫ് മത്സ്യ മാര്ക്കറ്റിന്റെ മുഖച്ഛായ തന്നെ മാറാറുണ്ട്. അതിരാവിലെ മുതല് ഫിഷ് ഐലന്ഡിലേക്ക് എത്തുന്ന വാഹനങ്ങളില് നിന്ന് ചെമ്മീന് ഇറക്കുന്നതും ലേലത്തിനായി ക്രമീകരിക്കുന്നതും മനോഹര കാഴ്ചകളായി മാറിയിട്ടുണ്ട്. വൈകുന്നേരങ്ങളിലും വിപണി സജീവമാണ്. സൗദി അറേബ്യയുടെ വിവിധ ഭാഗങ്ങളില് നിന്നും മൊത്തവ്യാപാരികളും ചില്ലറ വ്യാപാരികളും ഒരുപോലെ മാര്ക്കറ്റില് എത്തുന്നതിനാല് തിരക്ക് വര്ധിച്ചിട്ടുണ്ട്.
സീസണിന്റെ തുടക്കത്തില് കാലാവസ്ഥാ വ്യതിയാനവും കടല് അതിര്ത്തികളിലെ ചില പ്രശ്നങ്ങളും കാരണം മത്സ്യബന്ധനം പരിമിതമായിരുന്നു. എന്നാല് കഴിഞ്ഞ ദിവസങ്ങളില് കടല് ശാന്തമായതോടെ കൂടുതല് ബോട്ടുകള് മത്സ്യബന്ധനത്തിനായി പുറപ്പെടുകയും മികച്ച അളവില് ചെമ്മീന് ലഭിക്കുകയും ചെയ്തു. ഇതിന്റെ പ്രതിഫലനം മാര്ക്കറ്റിലും പ്രകടമാണ്.
ഗുണമേന്മയുള്ള ചെമ്മീനുകള്ക്ക് ആവശ്യക്കാര് കൂടുതലായതിനാലും സീസണിന്റെ തുടക്കമായതിനാലും വില അല്പ്പം കൂടുതലാണെങ്കിലും, ലഭ്യത കൂടുന്നതനുസരിച്ച് വില കുറയുമെന്ന് വ്യാപാരികള് പറയുന്നു. വലിയ ചെമ്മീനുകള്ക്ക് ഉയര്ന്ന വില ലഭിക്കുമ്പോള് ചെറിയതും മീഡിയം സൈസിലുള്ള ഇനങ്ങള്ക്കും കുടുംബങ്ങള്ക്കിടയില് മികച്ച ആവശ്യകതയുണ്ട്. ഹോട്ടലുകള്, റസ്റ്റോറന്റുകള്, ഭക്ഷ്യസംസ്കരണ യൂണിറ്റുകള് എന്നിവയും വലിയ തോതില് വാങ്ങല് നടത്തുന്നുണ്ട്.
ചെമ്മീന് സീസണ് സജീവമായതോടെ ഖത്തീഫ് മത്സ്യ മാര്ക്കറ്റിലേക്ക് ദിവസേന എത്തുന്ന ഉപഭോക്താക്കളുടെയും മൊത്തവ്യാപാരികളുടെയും എണ്ണം ഗണ്യമായി വര്ധിച്ചിട്ടുണ്ടെന്ന് ഫഹദ് പൊന്നാനി പറയുന്നു. 'പുതുതായി ലഭിക്കുന്ന ചെമ്മീനുകള് നേരിട്ട് വാങ്ങാന് വിവിധ ഭാഗങ്ങളില് നിന്നുള്ള ആളുകളാണ് ഇവിടെ എത്തുന്നത്. ഹോട്ടലുകള്, റസ്റ്റോറന്റുകള്, ഭക്ഷ്യസംസ്കരണ സ്ഥാപനങ്ങള് എന്നിവിടങ്ങളില് നിന്നുള്ള ആവശ്യവും വര്ധിച്ചതോടെ മാര്ക്കറ്റിലെ വ്യാപാര ഇടപാടുകള് കൂടുതല് സജീവമായിരിക്കുകയാണ്. ചെമ്മീന് സീസണ് ഖത്തീഫിന്റെ മത്സ്യവിപണിക്ക് എല്ലാ വര്ഷവും പുതിയ ഊര്ജമാണ് നല്കുന്നത്,' അദ്ദേഹം പറഞ്ഞു.
ഖത്തീഫ് മത്സ്യ മാര്ക്കറ്റിലെ ഏജന്റും പൊതുപ്രവര്ത്തകനുമായ ജസീര് പള്ളിപ്പടിയുടെ അഭിപ്രായത്തില്, കടുംചൂടാണെങ്കിലും സീസണ് ആരംഭിച്ചതോടെ മാര്ക്കറ്റിന്റെ അന്തരീക്ഷം പൂര്ണമായും മാറിയിരിക്കുകയാണ്. 'അതിരാവിലെ ബോട്ടുകള് മത്സ്യവുമായി എത്തുന്നതു മുതല് ലേലവും തരംതിരിക്കലും ലോഡിങ്ങും അണ്ലോഡിങ്ങും വില്പ്പനയും വരെ എല്ലായിടത്തും നല്ല തിരക്കാണ് അനുഭവപ്പെടുന്നത്. വിവിധ രാജ്യങ്ങളില് നിന്നുള്ള തൊഴിലാളികള് ഐക്യത്തോടെ പ്രവര്ത്തിക്കുന്ന ഈ മാര്ക്കറ്റ് ഖത്തീഫിന്റെ തൊഴില് സംസ്കാരത്തിന്റെ മികച്ച ഉദാഹരണമാണ്.
ചെമ്മീന് സീസണ് മത്സ്യത്തൊഴിലാളികള്ക്ക് മാത്രമല്ല, അനുബന്ധ മേഖലകളില് ജോലി ചെയ്യുന്ന നൂറുകണക്കിന് ആളുകള്ക്കും വരുമാനവും പ്രതീക്ഷയും നല്കുന്ന കാലമാണ്,' അദ്ദേഹം പറഞ്ഞു. വിപണിയില് ചെമ്മീന് ലഭ്യത വര്ധിച്ചതോടെ ഉപഭോക്താക്കള്ക്ക് ഗുണമേന്മയുള്ള മത്സ്യം തിരഞ്ഞെടുക്കാനുള്ള അവസരവും വര്ധിച്ചിട്ടുണ്ട്. ചൂടും ഉയര്ന്ന ഈര്പ്പവും തുടരുന്നുണ്ടെങ്കിലും വ്യാപാര പ്രവര്ത്തനങ്ങളെ അത് കാര്യമായി ബാധിച്ചിട്ടില്ല.
സ്വദേശികള്ക്കൊപ്പം മലയാളികള്, ബംഗ്ലാദേശികള്, പാകിസ്ഥാനികള്, ഈജിപ്തുകാര് തുടങ്ങി വിവിധ രാജ്യങ്ങളില് നിന്നുള്ള തൊഴിലാളികളും ഈ സീസണിനെ പ്രതീക്ഷയോടെയാണ് കാണുന്നത്. സമുദ്രവിഭവങ്ങള് സംരക്ഷിക്കുന്ന രീതിയില് മത്സ്യബന്ധനം നടത്തുകയും സര്ക്കാര് നിശ്ചയിച്ചിട്ടുള്ള സുരക്ഷാ മാനദണ്ഡങ്ങളും സീസണ് നിയന്ത്രണങ്ങളും പാലിക്കുകയും ചെയ്യേണ്ടത് അനിവാര്യമാണെന്ന് മേഖലയിലെ വിദഗ്ധര് ചൂണ്ടിക്കാട്ടുന്നു. ഇത് ഭാവിയിലും ചെമ്മീന് സമ്പത്ത് നിലനിര്ത്തുന്നതിനും മത്സ്യബന്ധന മേഖലയെ കൂടുതല് ശക്തിപ്പെടുത്തുന്നതിനും സഹായകരമാകും.
കാലാവസ്ഥ അനുകൂലമായി തുടര്ന്നാല് വരും ദിവസങ്ങളില് ചെമ്മീന് ലഭ്യത ഇനിയും വര്ധിക്കുമെന്നും അതോടെ ഖത്തീഫ് മത്സ്യ മാര്ക്കറ്റിലെ വ്യാപാര പ്രവര്ത്തനങ്ങള് കൂടുതല് സജീവമാകുമെന്നും മത്സ്യത്തൊഴിലാളികളും വ്യാപാരികളും പ്രതീക്ഷ പ്രകടിപ്പിക്കുന്നു.
