ജിദ്ദ: സൗദിയിലെ വളര്‍ന്നുവരുന്ന സംഗീതജ്ഞര്‍ക്ക് പുതിയ പരിശീലനവും മെന്റര്‍ഷിപ്പും അന്താരാഷ്ട്ര വേദിയില്‍ പ്രകടനങ്ങള്‍ നടത്താനുള്ള അവസരങ്ങളും ലഭ്യമാക്കുന്നതിനായി സൗദി സംഗീത കമ്മീഷനും 'ജാസ് ഇന്‍ ജിദ്ദ'യും തമ്മില്‍ തന്ത്രപ്രധാനമായ പങ്കാളിത്തം പ്രഖ്യാപിച്ചു. പ്രാദേശിക പ്രതിഭകളെ വളര്‍ത്തിയെടുക്കുന്നതിനൊപ്പം പ്രകടനങ്ങളിലൂടെയും സാംസ്‌കാരിക കൈമാറ്റങ്ങളിലൂടെയും സൗദി, അന്താരാഷ്ട്ര സംഗീതജ്ഞരെ ഒന്നിപ്പിക്കുകയുമാണ് ഈ പങ്കാളിത്തം ലക്ഷ്യമിടുന്നത്.

'കാള്‍ ഓഫ് കള്‍ച്ചര്‍' സംഘടിപ്പിക്കുന്ന 'ജാസ് ഇന്‍ ജിദ്ദ', ജാസ് സംഗീതത്തെ സൗദി സംഗീത പാരമ്പര്യവുമായി സംയോജിപ്പിച്ച് ചരിത്രപ്രസിദ്ധമായ ജിദ്ദയില്‍ പരിപാടികള്‍ അവതരിപ്പിക്കാനാവുന്നതിലൂയെ സാംസ്‌കാരിക കൈമാറ്റമാണ് നടക്കുന്നത്. കൂടാതെ, പത്തോളം രാജ്യങ്ങളിലെ അന്താരാഷ്ട്ര മേളകളുമായി സഹകരിച്ച് സൗദി കലാകാരന്മാര്‍ക്ക് ആഗോളതലത്തില്‍ കൂടുതല്‍ അവസരങ്ങളും സൃഷ്ടിക്കപ്പെടുന്നു. രാജ്യത്തിന്റെ വളര്‍ന്നുവരുന്ന സംഗീത രംഗവും ആഗോള സമൂഹവും തമ്മിലുള്ള ബന്ധം ശക്തിപ്പെടുത്താന്‍ ഇത് സഹായിക്കും.

സൗദി അറേബ്യയിലെ സംഗീത വ്യവസായത്തിന്റെ വികസനത്തില്‍ സ്വകാര്യമേഖലയുടെ പങ്കാളിത്തം പ്രോത്സാഹിപ്പിക്കുന്നതിനായി സംഗീത കമ്മീഷനും ജാസ് ഇന്‍ ജിദ്ദയും തമ്മില്‍ മുന്‍പ് ഒപ്പുവെച്ച ധാരണാപത്രത്തിന്റെ തുടര്‍ച്ചയായാണ് പുതിയ കരാര്‍.

സൗദിയിലെ സംഗീതാസ്വാദകരും കലാകാരന്മാരും ലോകോത്തര നിലവാരമുള്ള ഒരു വേദിക്കര്‍ഹരാണെന്ന് 'ജാസ് ഇന്‍ ജിദ്ദ' സ്ഥാപകന്‍ മുഹമ്മദ് ബഖ്രേബ വ്യക്തമാക്കി. സൗദി കലാകാരന്മാരിലും രാജ്യത്തിന്റെ സംഗീത പാരമ്പര്യത്തിലും നിക്ഷേപം നടത്തുന്നതിനൊപ്പം ജാസിന്റെ സാന്നിധ്യം വ്യാപിപ്പിക്കാന്‍ ഈ പങ്കാളിത്തം സഹായിക്കുമെന്ന് അദ്ദേഹം പറഞ്ഞു. സംഗീതജ്ഞര്‍ക്ക് സുസ്ഥിരമായ അവസരങ്ങള്‍ സൃഷ്ടിക്കുന്നതില്‍ പൊതുസ്ഥാപനങ്ങളും സ്വകാര്യമേഖലയും തമ്മിലുള്ള സഹകരണം അത്യന്താപേക്ഷിതമാണെന്ന് സൗദി സംഗീത കമ്മീഷന്‍ സി.ഇ.ഒ പോള്‍ പസിഫിക്കോ പറഞ്ഞു. സൗദി അറേബ്യയുടെ സംഗീത രംഗം ശക്തിപ്പെടുത്താനും അന്താരാഷ്ട്ര സാംസ്‌കാരിക സാന്നിധ്യം വര്‍ദ്ധിപ്പിക്കാനും ഈ പങ്കാളിത്തം വഴിയൊരുക്കുമെന്നും അദ്ദേഹം കൂട്ടിച്ചേര്‍ത്തു.