ദുബായ്: യു.എ.ഇയിലെ വിവിധ ഭാഗങ്ങളില് ശക്തമായ മഴയ്ക്കും ശക്തമായ കാറ്റിനും കുറഞ്ഞ ദൃശ്യപരതയ്ക്കും സാധ്യതയുള്ളതായി ദേശീയ കാലാവസ്ഥാ കേന്ദ്രത്തിന്റെ (NCM) മുന്നറിയിപ്പ്. ചില ഭാഗങ്ങളില് ഇന്നലെ രാത്രി യെല്ലോ, ഓറഞ്ച് അലര്ട്ട് പ്രഖ്യാപിച്ചിരുന്നു. അസ്ഥിരമായ കാലാവസ്ഥ തുടരുന്ന സാഹചര്യത്തില് വാഹനമോടിക്കുന്നവര് അതീവ ജാഗ്രത പാലിക്കണമെന്ന് ആഭ്യന്തര മന്ത്രാലയവും പൊതുജനങ്ങളോട് അഭ്യര്ത്ഥിച്ചു.
യെല്ലോ അലര്ട്ട് ബാധിച്ച പ്രദേശങ്ങളിലുള്ളവര് ജാഗ്രത പാലിക്കണമെന്നും, കൂടുതല് തീവ്രമായ കാലാവസ്ഥയ്ക്ക് സാധ്യതയുള്ള ഓറഞ്ച് അലര്ട്ട് മേഖലകളിലുള്ളവര് അതീവ ജാഗ്രതയോടെയും തയ്യാറെടുപ്പോടെയും ഇരിക്കണമെന്നും എന്.സി.എം നിര്ദ്ദേശിച്ചു. കാലാവസ്ഥാ കേന്ദ്രം പുറത്തിറക്കിയ മാപ്പ് പ്രകാരം ദുബായ്, ഷാര്ജ എന്നിവയുടെ ചില ഭാഗങ്ങളും രാജ്യത്തിന്റെ കിഴക്കന്, തെക്കന് പ്രദേശങ്ങളും അലര്ട്ടിന്റെ പരിധിയില് ഉള്പ്പെടുന്നു. കാലാവസ്ഥാ വ്യതിയാനം തുടരുന്നതിനാല് വരുന്ന ദിവസങ്ങളിലും കൂടുതല് മഴ ലഭിച്ചേക്കുമെന്നാണ് പ്രവചനം.
വിവിധ പ്രദേശങ്ങളില് ഒറ്റപ്പെട്ട മഴയ്ക്കും ശക്തമായ കാറ്റിനും ദൃശ്യപരത കുറയാനും സാധ്യതയുണ്ടെന്ന് ആഭ്യന്തര മന്ത്രാലയത്തിന്റെ സുരക്ഷാ മുന്നറിയിപ്പില് വ്യക്തമാക്കുന്നു. വാഹനമോടിക്കുന്നവര് ശ്രദ്ധയോടെ ഡ്രൈവ് ചെയ്യണമെന്ന് മോശം കാലാവസ്ഥയെ തുടര്ന്ന് അധികൃതര് ഓര്മ്മിപ്പിച്ചു.
Related News
