ലഖ്നൗ: വാരണാസി വിമാനത്താവളത്തില് സുരക്ഷാ പരിശോധനയ്ക്കിടെ എയര് ഇന്ത്യ എക്സ്പ്രസ് യാത്രക്കാരന്റെ കൈവശമുണ്ടായിരുന്ന ലൈസന്സുള്ള പിസ്റ്റളില് നിന്ന് അബദ്ധത്തില് വെടിയുതിര്ന്ന് വനിതാ സുരക്ഷാ ജീവനക്കാരി ഉള്പ്പെടെ രണ്ട് പേര്ക്ക് പരിക്കേറ്റു. ഞായറാഴ്ച രാവിലെയാണ് സംഭവം. പരിക്കേറ്റവരെ ഉടന്തന്നെ ചികിത്സയ്ക്കായി സ്വകാര്യ ആശുപത്രിയിലേക്ക് മാറ്റി.
അസംഘ് ജില്ലയില് നിന്നുള്ള കമലേഷ് റായ് എന്ന യാത്രക്കാരനാണ് മുംബൈയിലേക്കുള്ള എയര് ഇന്ത്യ എക്സ്പ്രസിന്റെ IX1810 വിമാനത്തില് യാത്ര ചെയ്യാന് ഭാര്യയോടൊപ്പം ലാല് ബഹദൂര് ശാസ്ത്രി അന്താരാഷ്ട്ര വിമാനത്താവളത്തില് എത്തിയത്. ഇദ്ദേഹത്തിന്റെ കൈവശം ലൈസന്സുള്ള ഒരു പിസ്റ്റള് ഉണ്ടായിരുന്നു.
സുരക്ഷാ പരിശോധനയ്ക്കിടെ തോക്കും അതിലെ വെടിയുണ്ടകളും പരിശോധിക്കുന്നതിനിടയില് അബദ്ധത്തില് തോക്കില് നിന്നും വെടിയുതിരുകയായിരുന്നുവെന്ന് പൊലീസ് അറിയിച്ചു. വെടിയുണ്ട വനിതാ സുരക്ഷാ ജീവനക്കാരിയുടെ കാലിലും സമീപത്തുണ്ടായിരുന്ന മറ്റൊരു വ്യക്തിയുടെ തള്ളവിരലിലുമാണ് കൊണ്ടത്. വിമാനത്തില് യാത്ര ചെയ്യാനെത്തിയ യാത്രക്കാരന് ആയുധങ്ങള് കൈവശമുള്ളതായി നേരത്തെ തന്നെ അധികൃതരെ അറിയിച്ചിരുന്നുവെന്നും, തുടര്ന്നു നടത്തിയ പരിശോധനയ്ക്കിടെയാണ് വെടിയുണ്ട പൊട്ടിത്തെറിച്ചതെന്നും വാരണാസി എയര്പോര്ട്ട് ഡയറക്ടര് വ്യക്തമാക്കി.
സംഭവത്തെക്കുറിച്ചറിഞ്ഞ ഉടന് തന്നെ ഗോമതി സോണ് ഡി.സി.പിയും പിന്ദ്ര എ.സി.പിയും ഉള്പ്പെടെയുള്ള മുതിര്ന്ന പൊലീസ് ഉദ്യോഗസ്ഥര് വിമാനത്താവളത്തിലെത്തി. സംഭവസ്ഥലം പരിശോധിച്ചുവരികയാണെന്നും ആവശ്യമായ നിയമനടപടികള് സ്വീകരിച്ചിട്ടുണ്ടെന്നും പൊലീസ് പ്രസ്താവനയില് വ്യക്തമാക്കി.
Related News
