ജിദ്ദ: ഇന്ത്യയുടെ 80-ാമത് സ്വാതന്ത്ര്യദിനാഘോഷത്തിന്റെ ഭാഗമായി ഒ.ഐ.സി.സി. വെസ്റ്റേണ് റീജ്യണല് കമ്മിറ്റി ജിദ്ദ കിംഗ് അബ്ദുല് അസീസ് യൂണിവേഴ്സിറ്റി ഹോസ്പിറ്റലുമായി സഹകരിച്ച് രക്തദാന ക്യാമ്പ് സംഘടിപ്പിച്ചു. 'രക്തദാനത്തിലൂടെ ജീവന് രക്ഷിക്കുക, രാജ്യത്തെ സേവിക്കുക' എന്ന സന്ദേശമുയര്ത്തിപ്പിടിച്ചാണ് ക്യാമ്പ് സംഘടിപ്പിച്ചത്.
ഒരു വ്യക്തിയുടെ ചെറിയൊരു സന്നദ്ധതയ്ക്ക് മറ്റൊരാളുടെ ജീവിതത്തില് വലിയൊരു മാറ്റം സൃഷ്ടിക്കാന് കഴിയുമെന്ന മഹത്തായ ആശയത്തിലൂന്നി മാനവികതയുടെയും സാമൂഹിക പ്രതിബദ്ധതയുടെയും സന്ദേശം പൊതുസമൂഹത്തിനു നല്കാന് കഴിയുമെന്ന് ക്യാമ്പില് പങ്കെടുത്തവര് അഭിപ്രായപ്പെട്ടു. ഭാവിയിലും ഇത്തരത്തിലുള്ള സാമൂഹിക പ്രതിബദ്ധത ഉയര്ത്തിപ്പിടിച്ചുള്ള പ്രവര്ത്തനങ്ങള് തുടരുമെന്ന് ഒ.ഐ.സി.സി. വെസ്റ്റേണ് റീജ്യണല് കമ്മിറ്റി ഭാരവാഹികള് വ്യക്തമാക്കി.
ഒ.ഐ.സി.സി. വെസ്റ്റേണ് റീജ്യണല് കമ്മിറ്റി പ്രസിഡന്റ് ഹക്കീം പാറക്കല്, ജനറല് സെക്രട്ടറി ആസാദ് പോരൂര്, വൈസ് പ്രസിഡന്റുമാരായ സഹീര് മാഞ്ഞാലി, അലി തേക്കുതോട്, ഭാരവാഹികളായ അബ്ദുല് നാസര് കോഴിത്തൊടി, അബ്ദുല് നാസര് വയനാട്, ഷനുജ് വാഴക്കാട്, നവാസ് ബീമാപള്ളി, അഷ്റഫ് കോഴിക്കോട്, ബഷീര് പരുത്തിക്കുന്നന്, എം.ടി. ഗഫൂര്, അഫ്സല് എന്., റെമി ഹരീഷ്, ആശ ലിസ മനോജ്, മിനി ജോണ് എന്നിവര് പരിപാടികള്ക്ക് നേതൃത്വം നല്കി.
