സന്‍ആ: സൗദി അറേബ്യയുടെ നിര്‍ണായക എണ്ണവിതരണ ശൃംഖലയായ ഈസ്റ്റ്‌വെസ്റ്റ് പൈപ്പ്‌ലൈനും ചെങ്കടല്‍ തീരത്തെ യാന്‍ബു തുറമുഖത്തെ എണ്ണസംഭരണ കേന്ദ്രവും ലക്ഷ്യമിട്ട് ആക്രമണം നടത്തിയതായി യെമനിലെ ഹൂതി വിമതര്‍ അവകാശപ്പെട്ടു. ഡ്രോണുകളും ബാലിസ്റ്റിക് മിസൈലുകളും ഉപയോഗിച്ച് ആക്രമണം നടത്തിയതായി ഹൂതി സൈനിക വക്താവ് യഹ്‌യ സരീയാണ് പ്രസ്താവിച്ചത്.
ഈസ്റ്റ്‌വെസ്റ്റ് പൈപ്പ്‌ലൈനിലെ ഏഴാം നമ്പര്‍ പമ്പിങ് സ്‌റ്റേഷനുനേരെ ഡ്രോണ്‍ ആക്രമണം നടത്തിയെന്നും യാന്‍ബുവിലെ എണ്ണസംവിധാനത്തിനു നേരെ ബാലിസ്റ്റിക് മിസൈല്‍ പ്രയോഗിച്ചെന്നുമാണ് യഹ്‌യ സരീ എക്‌സിലൂടെ അറിയിച്ചത്. സൗദിയിലെ ഒരു വിമാനത്താവളത്തിനും യെമന്‍ അതിര്‍ത്തിക്കു സമീപത്തെ സൈനിക വ്യോമതാവളത്തിനും നേരെയും ആക്രമണം നടത്തിയതായും നാലു ദൗത്യങ്ങളും വിജയകരമായിരുന്നുവെന്നും ഹൂതികള്‍ അവകാശപ്പെട്ടു.
ഇറാന്‍ ഹോര്‍മുസ് കടലിടുക്ക് ഉപരോധിച്ചതിനെത്തുടര്‍ന്ന് സൗദിയുടെ എണ്ണ കയറ്റുമതിയില്‍ ഈസ്റ്റ്‌വെസ്റ്റ് പൈപ്പ്‌ലൈനിന് നിര്‍ണായക പ്രാധാന്യം കൈവന്നിട്ടുണ്ട്. അറേബ്യന്‍ ഉപദ്വീപിന്റെ കിഴക്കുഭാഗത്തുനിന്ന് പടിഞ്ഞാറന്‍ തീരത്തെ യാന്‍ബുവിലേക്ക് എണ്ണ എത്തിക്കുന്ന ഈ പൈപ്പ്‌ലൈന്‍ വഴിയാണ് ഹോര്‍മുസ് കടലിടുക്ക് ഒഴിവാക്കി ചെങ്കടല്‍ വഴി അന്താരാഷ്ട്ര വിപണിയിലേക്ക് എണ്ണ എത്തിക്കുന്നത്. അതിനാല്‍ പൈപ്പ്‌ലൈനുനേരെയുള്ള ആക്രമണം സൗദിയുടെ എണ്ണവിതരണത്തെ ബാധിക്കുമെന്ന ആശങ്ക ശക്തമാണ്.
പൈപ്പ്‌ലൈനുനേരെ ഹൂതികള്‍ നേരത്തെയും ആക്രമണം നടത്തിയിട്ടുണ്ട്. നവംബര്‍ ഒമ്പതിന് നടന്ന ആക്രമണത്തില്‍ പൈപ്പ്‌ലൈനില്‍ തീപിടിത്തമുണ്ടായെങ്കിലും പ്രവര്‍ത്തനങ്ങളെ ബാധിച്ചിട്ടില്ലെന്ന് സൗദി അധികൃതര്‍ അറിയിച്ചിരുന്നു. സൗദി ദേശീയ എണ്ണക്കമ്പനിയായ അരാംകോയുടെ റിയാദിലെ കേന്ദ്രത്തിനുനേരെ ഡ്രോണ്‍ ആക്രമണം നവംബര്‍ എട്ടിന് അരാംകോയുടെ ഒരു കെട്ടിടത്തിന് സമീപം ആക്രമണശ്രമത്തിനിടെ പതിച്ച അവശിഷ്ടങ്ങള്‍ പതിച്ചതായി അധികൃതര്‍ അറിയിച്ചിരുന്നു.
റിയാദ് മേഖലയിലും രാജ്യത്തിന്റെ കിഴക്കന്‍ പ്രവിശ്യയിലും ഹൂതികള്‍ അയച്ച ഡ്രോണുകള്‍ തകര്‍ത്തതായി സൗദി നേതൃത്വത്തിലുള്ള സഖ്യസേന അറിയിച്ചു. പടിഞ്ഞാറന്‍ സൗദിയെ ലക്ഷ്യമിട്ട രണ്ട് ബാലിസ്റ്റിക് മിസൈലുകളും തെക്കന്‍ മേഖലയിലും മക്കയ്ക്ക് സമീപവും എത്തിയ രണ്ട് ഡ്രോണുകളും നേരത്തേ തകര്‍ത്തതായും സഖ്യസേന വ്യക്തമാക്കി. മക്കയില്‍നിന്ന് ഏകദേശം 35 കിലോമീറ്റര്‍ അകലെയുള്ള സബൂഹ ഗ്രാമത്തില്‍ മിസൈലിന്റെ അവശിഷ്ടങ്ങള്‍ പതിച്ചതായും സൗദി സിവില്‍ ഡിഫന്‍സ് അറിയിച്ചു.
ജൂലൈയില്‍ യുദ്ധം വീണ്ടും ശക്തമായതുമുതല്‍ സൗദി അറേബ്യയ്ക്കുനേരെ ഹൂതികളുടെ ആക്രമണങ്ങള്‍ വര്‍ധിച്ചുവരികയാണ്. വിമാനത്താവളങ്ങള്‍, ഊര്‍ജ അടിസ്ഥാനസൗകര്യങ്ങള്‍, സൈനിക കേന്ദ്രങ്ങള്‍, റിയാദിലെ സാമ്പത്തിക മേഖല എന്നിവയാണ് പ്രധാനമായും ലക്ഷ്യമിടുന്നത്. അതിനിടെ, യെമന്‍ സംഘര്‍ഷവുമായി ബന്ധപ്പെട്ട ഉപരോധങ്ങള്‍ നീട്ടാന്‍ ഐക്യരാഷ്ട്രസഭാ സുരക്ഷാസമിതി ഏകകണ്ഠമായി തീരുമാനിച്ചതും മേഖലയില്‍ നയതന്ത്ര സമ്മര്‍ദം വര്‍ധിപ്പിച്ചിട്ടുണ്ട്.
പടിഞ്ഞാറന്‍ യെമനിലെ തായിസ് ഗവര്‍ണറേറ്റിലുള്ള ദുബാബില്‍നിന്ന് സര്‍ക്കാര്‍ സൈന്യം പിന്‍വാങ്ങിയെന്ന റിപ്പോര്‍ട്ടുകള്‍ യെമനിലെ അന്താരാഷ്ട്ര അംഗീകാരമുള്ള സര്‍ക്കാര്‍ നിഷേധിച്ചു. ഹൂതി അനുകൂല സമൂഹമാധ്യമ അക്കൗണ്ടുകള്‍ പ്രചരിപ്പിച്ച വീഡിയോ തെറ്റിദ്ധരിപ്പിക്കുന്നതാണെന്നും സര്‍ക്കാര്‍ വ്യക്തമാക്കി.
Related News
