റിയാദ്: സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന് രണ്ടുദിവസത്തെ ഔദ്യോഗിക സന്ദര്ശനത്തിനായി ഞായറാഴ്ച ഫ്രാന്സിലെത്തും. ഫ്രഞ്ച് പ്രസിഡന്റ് ഇമ്മാനുവല് മാക്രോണ് അദ്ദേഹത്തെ സ്വീകരിക്കും. എലീസി കൊട്ടാരമാണ് വാര്ത്താക്കുറിപ്പിലൂടെ ഇക്കാര്യം അറിയിച്ചത്. 2024 ഡിസംബറില് മാക്രോണ് സൗദി അറേബ്യ സന്ദര്ശിച്ചതിന് പിന്നാലെയാണ് ഈ കൂടിക്കാഴ്ച.
രണ്ടു രാജ്യങ്ങളും തമ്മിലുള്ള തന്ത്രപരമായ സഹകരണം കൂടുതല് ശക്തമാക്കാന് സന്ദര്ശനം വഴിയൊരുക്കുമെന്ന് എലീസി കൊട്ടാരം വ്യക്തമാക്കി. ഇതിന്റെ ഭാഗമായി ഫ്രാങ്കോ-സൗദി സ്ട്രാറ്റജിക് പാര്ട്ണര്ഷിപ്പ് കൗണ്സിലിന്റെ ആദ്യ യോഗത്തില് ഇരുനേതാക്കളും പങ്കെടുക്കും. സാമ്പത്തിക-തന്ത്രപ്രധാന മേഖലകളിലെ സഹകരണത്തിന് പുറമെ, പശ്ചിമേഷ്യയില് സമാധാനവും സ്ഥിരതയും പുനഃസ്ഥാപിക്കുന്നതിനുള്ള പ്രാദേശിക വിഷയങ്ങളും ചര്ച്ചയാകും.
ഞായറാഴ്ച നടക്കുന്ന ഈസ്പോര്ട്സ് വേള്ഡ് കപ്പ് സമാപന ചടങ്ങിലും ഇരുനേതാക്കളും ഒരുമിച്ച് പങ്കെടുക്കും. സൗദി അറേബ്യയ്ക്ക് പുറത്ത് ആദ്യമായാണ് ഈ ആഗോള കായിക മാമാങ്കത്തിന് പാരിസ് വേദിയാകുന്നത്. 2024 പാരിസ് ഒളിമ്പിക്സിന്റെ വിജയത്തിന് ശേഷം, അന്താരാഷ്ട്ര കായിക പരിപാടികളുടെ കേന്ദ്രമായി ഫ്രാന്സ് മാറുന്നതിന്റെ തെളിവാണിതെന്ന് വാര്ത്താക്കുറിപ്പ് ചൂണ്ടിക്കാട്ടി. സ്പോര്ട്സിലൂടെയും സംസ്കാരത്തിലൂടെയും ഇരുരാജ്യങ്ങളും തമ്മിലുള്ള സൗഹൃദം കൂടുതല് ശക്തമാക്കുകയാണ് ഇതിലൂടെ ലക്ഷ്യമിടുന്നത്.
.jpg)
Related News
