പത്തനംതിട്ട: വയോധികയായ പൊന്നമ്മ തോമസിന്റെ (75) മരണം മകന്റെ ക്രൂര മര്‍ദനം മൂലമെന്ന് തെളിഞ്ഞു. അജ്ഞാത ഫോണ്‍ സന്ദേശത്തെ തുടര്‍ന്ന് കോയിപ്രം പോലീസ് നടത്തിയ അന്വേഷണത്തിലാണ് ഞെട്ടിക്കുന്ന കൊലപാതക വിവരം പുറത്തുവന്നത്. സംഭവത്തില്‍ മകന്‍ ടിജോ തോമസ് (37), ഒപ്പം താമസിച്ചിരുന്ന റിന്‍സി മോള്‍ (37) എന്നിവരെ പോലീസ് അറസ്റ്റ് ചെയ്തു.

കുമ്പനാട് ഫെലോഷിപ് ആശുപത്രിയില്‍ വയോധികയുടെ മൃതദേഹം സൂക്ഷിച്ചിട്ടുണ്ടെന്ന അജ്ഞാത ഫോണ്‍ സന്ദേശമാണ് അന്വേഷണത്തിലേക്ക് നയിച്ചത്. മൃതദേഹം പരിശോധിച്ച കോയിപ്രം എസ്.ഐ പങ്കജ് കൃഷ്ണ, കീഴ്വായ്പൂര്‍ സി.ഐ ജി. സുരേഷ്‌കുമാര്‍ എന്നിവര്‍ക്ക് തോന്നിയ അസ്വാഭാവികതയും പോസ്റ്റ്മോര്‍ട്ടം റിപ്പോര്‍ട്ടുമാണ് കേസില്‍ നിര്‍ണായക വഴിത്തിരിവായത്.

ഭാര്യയുമായി പിണങ്ങി കഴിയുന്ന ടിജോയ്ക്കൊപ്പം റിന്‍സി മോള്‍ കഴിഞ്ഞ 6 മാസമായി ഒരുമിച്ചാണ് താമസം. തിങ്കളാഴ്ച രാത്രി ഇരുവരും തമ്മിലുണ്ടായ വഴക്ക് തടയാന്‍ എത്തിയപ്പോഴാണ് പൊന്നമ്മ തോമസിന് നേരെ ആക്രമണമുണ്ടായത്. അമ്മയെ ടിജോ നെഞ്ചില്‍ തൊഴിക്കുകയും ശ്വാസംമുട്ടിക്കുകയും ശരീരമാസകലം മര്‍ദ്ദിച്ച് കൊലപ്പെടുത്തുകയുമായിരുന്നു. പ്രതികളുടെ അറസ്റ്റ് രേഖപ്പെടുത്തി കോടതിയില്‍ ഹാജരാക്കി റിമാന്‍ഡ് ചെയ്തു.