മണിപ്പാല്‍: അന്താരാഷ്ട്ര രംഗത്ത് ഇന്ത്യയുടെ അഭിമാനമായി മലയാളി വിദ്യാര്‍ഥികള്‍. ഇംഗ്ലണ്ടിലെ ബക്കിന്‍ഹാംഷെയറില്‍ നടന്ന 'യുഎഎസ് ചലഞ്ച് 2026' (UAS Challenge 2026) എന്ന ഡ്രോണ്‍ നിര്‍മ്മാണ പറത്തല്‍ മത്സരത്തില്‍ മണിപ്പാല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ (MIT) മലയാളി വിദ്യാര്‍ത്ഥികളുടെ 'പ്രൊജക്റ്റ് ഡ്രോണെയ്ഡ്' (Project DronAid) പുരസ്‌കാരം നേടി. ലോകത്തെ 54 ലധികം സര്‍വ്വകലാശാലകളില്‍ നിന്നുള്ള മത്സരാര്‍ത്ഥികളെ പിന്നിലാക്കിയാണ് എംഐടി മണിപ്പാല്‍ സംഘം തങ്ങളുടെ കഴിവ് തെളിയിച്ചത്. ഏഷ്യന്‍ രാജ്യങ്ങളില്‍ ആറാം സ്ഥാനവും കരസ്ഥമാക്കിയ ടീം 'മീഡിയ ആന്‍ഡ് എന്‍ഗേജ്‌മെന്റ് അവാര്‍ഡ്' എന്ന പ്രത്യേക പുരസ്‌കാരവും സ്വന്തമാക്കി.

കെവിന്‍ സിബി (ഇരിഞ്ഞാലക്കുട), ശ്രേയസ് എസ് കുമാര്‍, ദേവിക രാജീവ്, ഹര്‍ഷ് പൈ, യുവരാജ് സിംഗ്, വേദാന്ത കൃഷ്ണ, സൗരജിത് സാഹ, സാഹില്‍ സിന്‍ഹ എന്നിവരടങ്ങുന്ന എട്ട് അംഗ ടീമാണ് ഈ നേട്ടത്തിന് പിന്നില്‍. ഈ വര്‍ഷം ഇന്ത്യയില്‍ നിന്ന് ഒരു അവാര്‍ഡ് നേടുന്ന ഏക ടീം എന്ന ബഹുമതിയും 'പ്രൊജക്റ്റ് ഡ്രോണെയ്ഡി'ന് സ്വന്തമായി.

സ്വന്തം നാടിന്റെ പേര് അന്താരാഷ്ട്ര വേദിയില്‍ ഉയര്‍ത്തിയ വിദ്യാര്‍ത്ഥികളെ കര്‍ണ്ണാടക സര്‍ക്കാരും മണിപ്പാല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി അധികൃതരും അഭിനന്ദിച്ചു. രാജ്യത്തിന്റെ ഭാവി സാങ്കേതിക വിദഗ്ധര്‍ക്ക് മാതൃകയാണ് ഈ നേട്ടമെന്ന് അവര്‍ പറഞ്ഞു. പ്രൊജക്ട് ലീഡായ കെവിന്‍ സിബി ജിദ്ദ പ്രവാസിയായ ഇരിഞ്ഞാലക്കുട സ്വദേശി സിബി വിതയത്തിലിന്റെയും, ഷിമി സിബിയുടേയും മകനാണ് എന്നത്, ജിദ്ദയിലെ മലയാളി പ്രവാസികള്‍ക്കും, കേരളത്തിനും അഭിമാനകരമാണ്.