തായിഫ്: ആഗോള സംരംഭകത്വ വാരാചരണത്തിന്റെ ഭാഗമായി തായിഫ് ചേംബറിന്റെ കീഴിലുള്ള 'അതാഅ് ബിസിനസ് സെന്റര്‍' (Ata'a Business Center) സംഘടിപ്പിക്കുന്ന 'തായിഫ് സംരംഭകത്വ ഉച്ചകോടി' (Taif Entrepreneurship Summit) അടുത്ത തിങ്കളാഴ്ച ആരംഭിക്കും. തായിഫ് ചേംബര്‍ ആസ്ഥാനത്ത് തുടര്‍ച്ചയായി രണ്ട് ദിവസങ്ങളിലായി നടക്കുന്ന ഉച്ചകോടി ചേംബര്‍ ചെയര്‍മാന്‍ ഗാസി അല്‍ ഖതാമിയുടെ രക്ഷാകര്‍തൃത്വത്തിലാണ് സംഘടിപ്പിക്കുന്നത്.

സംരംഭകര്‍, നിക്ഷേപ-ധനകാര്യ സ്ഥാപനങ്ങള്‍, അക്കാദമിക്-സേവന സ്ഥാപനങ്ങള്‍, വിവിധ വ്യവസായ മേഖലകള്‍, മാധ്യമങ്ങള്‍ എന്നിവരെ ലക്ഷ്യമിട്ടാണ് ഉച്ചകോടി ഒരുക്കിയിരിക്കുന്നത്. സംരംഭങ്ങളുടെ തുടക്കം, വളര്‍ച്ചയും വിപണി പ്രവേശനവും, തായിഫിലെ നിക്ഷേപ അവസരങ്ങള്‍, സുസ്ഥിരതയും സാമ്പത്തിക സ്വാധീനവും എന്നീ നാല് പ്രധാന വിഷയങ്ങളാണ് ഉച്ചകോടി ചര്‍ച്ച ചെയ്യുന്നത്. സംരംഭകര്‍, നൂതന ആശയങ്ങളുള്ളവര്‍, സ്റ്റാര്‍ട്ടപ്പുകള്‍, നിക്ഷേപകര്‍, സര്‍വകലാശാലകള്‍, വിദഗ്ധര്‍, സാങ്കേതിക-പ്രൊഫഷണല്‍ സേവന ദാതാക്കള്‍ എന്നിവരെ ഒന്നിപ്പിക്കുന്ന ഒരു പ്രധാന സാമ്പത്തിക-സംരംഭകത്വ വേദിയായി ഉച്ചകോടിയെ മാറ്റുകയാണ് ലക്ഷ്യം.

സംരംഭക ആശയങ്ങളെ പ്രായോഗിക പദ്ധതികളാക്കി മാറ്റാനും, വളര്‍ന്നുവരുന്ന സംരംഭങ്ങളെ അറിവ്, ധനസഹായം, നിക്ഷേപം എന്നിവയുമായി ബന്ധിപ്പിക്കാനും ഉച്ചകോടി സഹായിക്കുമെന്ന് ചേംബര്‍ ബോര്‍ഡ് അംഗവും അതാഅ് സെന്റര്‍ സൂപ്പര്‍വൈസറി മേധാവിയുമായ ബന്ദര്‍ അല്‍ ഒസൈമി വ്യക്തമാക്കി. തായിഫ് ഗവര്‍ണറേറ്റിലെ സംരംഭകത്വ മേഖലയിലെ വിവിധ സ്ഥാപനങ്ങള്‍ തമ്മിലുള്ള ഏകോപനം ശക്തിപ്പെടുത്താനും ഇതിലൂടെ സാധിക്കും.

രണ്ട് ദിവസങ്ങളിലായി ഉച്ചയ്ക്ക് 3 മുതല്‍ വൈകുന്നേരം 6 വരെ നീളുന്ന കേന്ദ്രീകൃത പരിപാടികളാണ് ഉച്ചകോടിയിലുള്ളത്. സംവാദങ്ങള്‍ക്കും പ്രഭാഷണങ്ങള്‍ക്കും പുറമെ പ്രത്യേക ബിസിനസ് ക്ലിനിക്കും, വിവിധ പദ്ധതികളുടെയും സഹായ സ്ഥാപനങ്ങളുടെയും പ്രദര്‍ശനവും ഉച്ചകോടിയുടെ ഭാഗമായി നടക്കും.

തായിഫ് ഗവര്‍ണറേറ്റിലെ നിക്ഷേപ അവസരങ്ങളും മികച്ച പദ്ധതികളും ഉയര്‍ത്തിക്കാട്ടുന്ന ഒരു മുന്‍നിര പരിപാടിയായി ഉച്ചകോടിയെ മാറ്റാനാണ് ലക്ഷ്യമിടുന്നതെന്ന് ബന്ദര്‍ അല്‍ ഒസൈമി പറഞ്ഞു. തായിഫിലെ യുവതീയുവാക്കള്‍ക്കിടയില്‍ സംരംഭകത്വ-നൂതന സംസ്‌കാരം വളര്‍ത്തുക, ആശയങ്ങളെ ലാഭകരമായ ബിസിനസ് മോഡലുകളാക്കി മാറ്റാന്‍ പ്രോത്സാഹിപ്പിക്കുക, സ്റ്റാര്‍ട്ടപ്പുകള്‍ക്ക് ധനസഹായം ലഭ്യമാക്കുക, സര്‍ക്കാര്‍-സ്വകാര്യ-ധനകാര്യ സ്ഥാപനങ്ങളുമായി സംരംഭകരെ ബന്ധിപ്പിക്കുക എന്നിവയാണ് ഉച്ചകോടിയുടെ പ്രധാന തന്ത്രപ്രധാന ലക്ഷ്യങ്ങള്‍.

ടൂറിസം-ഹോസ്പിറ്റാലിറ്റി, കൃഷി-ഭക്ഷ്യ സംസ്‌കരണ വ്യവസായം, തായിഫ് റോസ്, ഇ-കൊമേഴ്സ്, സാങ്കേതികവിദ്യ, ക്രിയേറ്റീവ് വ്യവസായങ്ങള്‍ എന്നീ മേഖലകളിലെ നിക്ഷേപ സാധ്യതകള്‍ ഉച്ചകോടി പരിചയപ്പെടുത്തും. സംരംഭം തുടങ്ങുന്നതിനും വളര്‍ത്തുന്നതിനുമുള്ള ഘട്ടങ്ങളെക്കുറിച്ച് അവബോധം നല്‍കുക, ലഭ്യമായ ധനസഹായ സ്രോതസ്സുകള്‍ പരിചയപ്പെടുത്തുക, പ്രാരംഭ കണ്‍സള്‍ട്ടേഷന്‍ നല്‍കുക എന്നിവയാണ് ഉച്ചകോടിയിലൂടെ പ്രതീക്ഷിക്കുന്ന പ്രധാന നേട്ടങ്ങള്‍.

ഉച്ചകോടിയുടെ സമാപനത്തില്‍ തിരഞ്ഞെടുക്കപ്പെടുന്ന മികച്ച പദ്ധതികള്‍ പ്രത്യേക സമിതിക്കും നിക്ഷേപകര്‍ക്കും മുന്നില്‍ അവതരിപ്പിക്കും. ഇവയ്ക്ക് നിക്ഷേപകരുമായും ഇന്‍കുബേറ്ററുകളുമായും ബന്ധം സ്ഥാപിച്ചു നല്‍കുകയും പുതിയ പങ്കാളിത്തങ്ങള്‍ പ്രഖ്യാപിക്കുകയും ചെയ്യും. തായിഫിലെ സംരംഭകത്വ അന്തരീക്ഷം മെച്ചപ്പെടുത്തുന്നതിനുള്ള പ്രായോഗിക നിര്‍ദ്ദേശങ്ങളും പദ്ധതികളുടെ പ്രത്യേക ഡാറ്റാബേസും ഉച്ചകോടിയുടെ ഭാഗമായി തയ്യാറാക്കുമെന്നും അല്‍ ഒസൈമി കൂട്ടിച്ചേര്‍ത്തു.