റിയാദ്: പ്രവാസി മലയാളികള്‍ക്കായി നോര്‍ക്ക റൂട്ട്‌സ് നടപ്പിലാക്കുന്ന 'നോര്‍ക്ക കെയര്‍ പ്ലസ്' (NORKA CARE+) ഇന്‍ഷുറന്‍സ് പദ്ധതിയില്‍ അംഗത്വമെടുക്കുന്നതിനും പദ്ധതിയുമായി ബന്ധപ്പെട്ട സംശയങ്ങള്‍ ദൂരീകരിക്കുന്നതിനുമായി ഒ.ഐ.സി.സി റിയാദ് മലപ്പുറം ജില്ലാ കമ്മിറ്റിയുടെ നേതൃത്വത്തില്‍ ഹെല്‍പ് ഡെസ്‌ക് സംഘടിപ്പിക്കുന്നു.

സെപ്റ്റംബര്‍ 4 വെള്ളിയാഴ്ച വൈകുന്നേരം 3 മുതല്‍ 6 വരെ ബത്ഹയിലെ ഒ.ഐ.സി.സി ഓഫീസായ 'സബര്‍മതി'യിലാണ് ഹെല്‍പ് ഡെസ്‌ക് പ്രവര്‍ത്തിക്കുക. പദ്ധതിയില്‍ അംഗത്വമെടുക്കാന്‍ ആഗ്രഹിക്കുന്ന പ്രവാസികള്‍ക്ക് രജിസ്‌ട്രേഷന്‍ ഉള്‍പ്പെടെയുള്ള നടപടിക്രമങ്ങളില്‍ ആവശ്യമായ സഹായം ഹെല്‍പ് ഡെസ്‌കില്‍ ലഭ്യമാകും.

രജിസ്‌ട്രേഷനായി എത്തുന്നവര്‍ സാധുവായ നോര്‍ക്ക ഐ.ഡി കാര്‍ഡ്/നമ്പര്‍, മൊബൈല്‍ നമ്പര്‍, പദ്ധതിയില്‍ ഉള്‍പ്പെടുത്തേണ്ട കുടുംബാംഗങ്ങളുടെ പേര്, ജനനത്തീയതി എന്നിവ കരുതണം. ഇന്‍ഷുറന്‍സ് തുക അംഗത്വമെടുക്കുന്നയാളുടെ ഇന്ത്യയിലെ ബാങ്ക് അക്കൗണ്ട് മുഖേന യു.പി.ഐ (UPI), ഡെബിറ്റ് കാര്‍ഡ്, നെറ്റ് ബാങ്കിങ് തുടങ്ങിയ മാര്‍ഗങ്ങളിലൂടെയാണ് അടയ്‌ക്കേണ്ടത്.

റിയാദിലും പരിസര പ്രദേശങ്ങളിലുമുള്ള പ്രവാസികള്‍ ഹെല്‍പ് ഡെസ്‌കിന്റെ സേവനം പരമാവധി പ്രയോജനപ്പെടുത്തണമെന്ന് ഒ.ഐ.സി.സി മലപ്പുറം ജില്ലാ കമ്മിറ്റി അഭ്യര്‍ഥിച്ചു.

കൂടുതല്‍ വിവരങ്ങള്‍ക്ക് ഹെല്‍പ് ഡെസ്‌ക് കോഓര്‍ഡിനേറ്റര്‍മാരായ അന്‍സാര്‍ നെയ്തല്ലൂര്‍ (0573103145), ജംഷീര്‍ ചെറുകാട് (0508031564), ഷറഫു ചിറ്റാന്‍ (0507816440) എന്നീ നമ്പറുകളില്‍ ബന്ധപ്പെടാം.