ന്യൂഡല്ഹി: ഐക്യരാഷ്ട്രസഭയുടെ പിന്തുണയോടെ തയാറാക്കപ്പെടുന്ന പുതിയ ലോകഭൂപടത്തില് ജമ്മുകശ്മീരും ലഡാക്കും ഉള്പ്പെടുന്ന ഇന്ത്യയുടെ പരമാധികാര പ്രദേശങ്ങള് രാജ്യത്തിന്റെ ഔദ്യോഗിക ഭൂപടത്തിന് അനുസൃതമായിത്തന്നെ രേഖപ്പെടുത്തണമെന്ന് കേന്ദ്ര സര്ക്കാര് വ്യക്തമാക്കി. ഇന്ത്യയുടെ ഭൂപ്രദേശത്തെ തെറ്റായോ ആശയക്കുഴപ്പം സൃഷ്ടിക്കുന്ന രീതിയിലോ ചിത്രീകരിക്കുന്നത് ഒരിക്കലും അംഗീകരിക്കാനാവില്ലെന്ന് വിദേശകാര്യ മന്ത്രാലയ വക്താവ് രണ്ധീര് ജയ്സ്വാള് ഊന്നിപ്പറഞ്ഞു.
ലോകഭൂപടങ്ങളില് ഭൂഖണ്ഡങ്ങളുടെ യഥാര്ഥ വിസ്തീര്ണം കൂടുതല് കൃത്യമായി പ്രതിഫലിപ്പിക്കുന്ന ഈക്വല് എര്ത്ത് ഭൂപട പ്രൊജക്ഷന് പ്രോത്സാഹിപ്പിക്കാന് ലക്ഷ്യമിട്ട് ഐക്യരാഷ്ട്രസഭാ ജനറല് അസംബ്ലി പാസാക്കിയ പ്രമേയത്തിന് ഇന്ത്യ പിന്തുണ നല്കിയതിന് പിന്നാലെയാണ് കേന്ദ്ര സര്ക്കാരിന്റെ വിശദീകരണം. എന്നാല്, പ്രമേയത്തെ അനുകൂലിച്ച് വോട്ട് ചെയ്തത് അതില് ഉള്പ്പെടുത്തിയിരിക്കുന്ന ഏതെങ്കിലും പ്രത്യേക ഭൂപടത്തെയോ അതിര്ത്തി രേഖകളെയോ ഇന്ത്യ അംഗീകരിക്കുന്നുവെന്നതല്ലെന്ന് വിദേശകാര്യ മന്ത്രാലയം വ്യക്തമാക്കി.
ജമ്മുകശ്മീരും ലഡാക്കും ഉള്പ്പെടെയുള്ള ഇന്ത്യയുടെ പരമാധികാര പ്രദേശങ്ങള് ഔദ്യോഗിക ഇന്ത്യന് ഭൂപടപ്രകാരമായിരിക്കണം ചിത്രീകരിക്കേണ്ടത്. തെറ്റായതോ തെറ്റിദ്ധരിപ്പിക്കുന്നതോ ആയ അവതരണം അംഗീകരിക്കാനാവില്ല. ഇന്ത്യയുടെ പരമാധികാരത്തെയും ഭൗമ അഖണ്ഡതയെയും സംബന്ധിച്ച നിലപാട് വ്യക്തവും സ്ഥിരതയുള്ളതും വിട്ടുവീഴ്ച ചെയ്യാനാകാത്തതുമാണ്,' ജയ്സ്വാള് പറഞ്ഞു.
പ്രമേയത്തിന്റെ പ്രധാന ലക്ഷ്യം രാജ്യങ്ങളുടെ രാഷ്ട്രീയ അതിര്ത്തികള് മാറ്റുകയോ അംഗീകരിക്കുകയോ അല്ലെന്നും, മെര്ക്കേറ്റര് പ്രൊജക്ഷനില് ഭൂഖണ്ഡങ്ങളുടെ വിസ്തീര്ണത്തില് ഉണ്ടാകുന്ന വ്യതിയാനങ്ങള് ഒഴിവാക്കി കൂടുതല് കൃത്യമായ ഭൂമിശാസ്ത്ര പ്രതിനിധാനം പ്രോത്സാഹിപ്പിക്കുകയാണെന്നും ഇന്ത്യ വിശദീകരിച്ചു. ആഫ്രിക്കയും ഏഷ്യയും ഉള്പ്പെടെയുള്ള ഭൂഖണ്ഡങ്ങളുടെ യഥാര്ഥ വലുപ്പം പ്രതിഫലിപ്പിക്കുന്ന ഭൂപടരീതിക്ക് പ്രോത്സാഹനം നല്കുക മാത്രമാണ് പ്രമേയത്തിന്റെ ഉദ്ദേശ്യമെന്നും കേന്ദ്രം ചൂണ്ടിക്കാട്ടി.
164 രാജ്യങ്ങളുടെ പിന്തുണയോടെയാണ് യു.എന് പ്രമേയം പാസായത്. അമേരിക്ക മാത്രമാണ് എതിര്ത്ത് വോട്ട് ചെയ്തത്. എന്നിരുന്നാലും, അന്താരാഷ്ട്ര വേദികളില് ഇന്ത്യയുടെ അതിര്ത്തികളുമായി ബന്ധപ്പെട്ട വിഷയങ്ങളില് രാജ്യത്തിന്റെ ഔദ്യോഗിക ഭൂപടം മാത്രമേ അംഗീകരിക്കാവൂ എന്ന നിലപാട് കേന്ദ്ര സര്ക്കാര് വീണ്ടും ആവര്ത്തിച്ചു.
Related News
