ഹൈദരാബാദ്: സെക്കന്തരാബാദ് കാന്റോണ്‍മെന്റിലെ അതീവ സുരക്ഷയുള്ള ആയുധശാലയില്‍ നിന്ന് തോക്കുകളും വെടിയുണ്ടകളും മോഷണം പോയ സംഭവത്തില്‍ അന്വേഷണം കൂടുതല്‍ വ്യാപിപ്പിച്ച് ഇന്ത്യന്‍ സൈന്യം. 20 മദ്രാസ് റെജിമെന്റിലെ ഒരു യൂണിറ്റിലെ മുതിര്‍ന്ന ഉദ്യോഗസ്ഥനെ സൈനിക ഉദ്യോഗസ്ഥരും തെലങ്കാന പോലീസും ചോദ്യം ചെയ്തതായി ദി ഇന്ത്യന്‍ എക്‌സ്പ്രസ് നടത്തിയ അന്വേഷണത്തില്‍ കണ്ടെത്തി.
ആയുധശാലയിലെ രേഖകളും രജിസ്റ്ററുകളും മാസങ്ങളായി കൃത്യമായി പരിപാലിച്ചിരുന്നില്ലെന്ന കണ്ടെത്തലാണ് ഉദ്യോഗസ്ഥനെ ചോദ്യം ചെയ്യാന്‍ പ്രധാന കാരണം. ആയുധങ്ങള്‍ ഓരോ ദിവസവും വൈകുന്നേരം കണക്കെടുപ്പ് നടത്തേണ്ടതാണെങ്കിലും രേഖകളിലെ വീഴ്ചകള്‍ കാരണം മോഷണം നടന്ന കൃത്യമായ സമയം പോലും വ്യക്തമല്ലാത്ത സാഹചര്യമാണ് നിലവിലുള്ളത്.
ഓഗസ്റ്റ് 31 രാവിലെ 7.50ഓടെയാണ് സംഭവം പുറത്തറിഞ്ഞത്. നാല് എ.കെ 203 അസോള്‍ട്ട് റൈഫിളുകള്‍, ഏഴ് പിസ്റ്റളുകള്‍ ഉള്‍പ്പെടെ 12 ആയുധങ്ങളും 1,000ലേറെ വെടിയുണ്ടകളും ഒരു ജോഡി പാസീവ് നൈറ്റ്‌വിഷന്‍ ബൈനോക്കുലറുകളും നഷ്ടപ്പെട്ടതായി കണ്ടെത്തുകയായിരുന്നു.
വെടിക്കോപ്പുകള്‍ സൂക്ഷിച്ചിരുന്ന സ്ഥലത്തിന്റെ പൂട്ടുകള്‍ തകര്‍ന്ന നിലയില്‍ കണ്ടെത്തിയതിനെ തുടര്‍ന്ന് ഉന്നത സൈനിക ഉദ്യോഗസ്ഥന്‍ ബൊല്ലാരം പോലീസില്‍ പരാതി നല്‍കി. ഓഗസ്റ്റ് 30 വൈകിട്ട് ആറുമണിയോടെയാണ് ആയുധങ്ങളുടെയും വെടിക്കോപ്പുകളുടെയും അവസാന കണക്കെടുപ്പ് നടന്നതെന്നാണ് രേഖകള്‍ സൂചിപ്പിക്കുന്നത്.
ആദ്യഘട്ടത്തില്‍ ഓഗസ്റ്റ് 30നും 31നും ഇടയിലുള്ള രാത്രിയിലായിരിക്കാം മോഷണം നടന്നതെന്നായിരുന്നു പോലീസിന്റെ നിഗമനം. എന്നാല്‍ പിന്നീട് നടത്തിയ പരിശോധനയില്‍ ആയുധശാലയിലെ രേഖകള്‍ മാസങ്ങളായി ശരിയായി സൂക്ഷിച്ചിട്ടില്ലെന്ന് കണ്ടെത്തിയത് അന്വേഷണത്തിന്റെ ദിശ മാറ്റി.
ആയുധശാലയായ 'കോട്ടെ'യില്‍ സ്ഥിരമായി സുരക്ഷാ ജീവനക്കാരുണ്ടെന്നും രാത്രിയില്‍ അനധികൃത പ്രവേശനം നടന്നതായി കാവല്‍ക്കാര്‍ ശ്രദ്ധിച്ചിട്ടില്ലെന്നും മുതിര്‍ന്ന പോലീസ് ഉദ്യോഗസ്ഥര്‍ പറയുന്നു. അതിനാല്‍ പൂട്ടുതകര്‍ത്ത് മോഷണം നടന്നുവെന്ന പ്രാഥമിക നിഗമനത്തിനപ്പുറം, മോഷണം നടന്നത് അതിന് മുമ്പായിരിക്കാമെന്ന സാധ്യതയും പോലീസ് പരിശോധിക്കുകയാണ്.
ആയുധശാലയിലെ രേഖകളിലെ വീഴ്ചയും സുരക്ഷാ സംവിധാനത്തിലെ സംശയാസ്പദമായ സാഹചര്യങ്ങളും കേസിനെ കൂടുതല്‍ സങ്കീര്‍ണമാക്കുന്നു. മോഷണം പുറത്തറിയുന്നതിന് മുമ്പുതന്നെ ആയുധങ്ങള്‍ കാണാതായിട്ടുണ്ടാവാമെന്നാണ് സൂചന. ഇത് ആയുധശാലയുടെ ആഭ്യന്തര നിയന്ത്രണവും സുരക്ഷാ സംവിധാനവും സംബന്ധിച്ച ഗുരുതര ചോദ്യങ്ങള്‍ ഉയര്‍ത്തും.