ലണ്ടന്‍: സാങ്കേതിക തകരാറിനെ തുടര്‍ന്ന് യുകെയില്‍ അഞ്ഞൂറിലധികം സര്‍വീസുകള്‍ റദ്ദാക്കിയതോടെ വ്യോമയാന മേഖല വീണ്ടും പ്രതിസന്ധിയിലായി. ചൊവ്വാഴ്ച 1,746 വിമാനങ്ങള്‍ റദ്ദാക്കിയതിന് പിന്നാലെ ബുധനാഴ്ച 399 സര്‍വീസുകള്‍ കൂടി റദ്ദാക്കിയതായി വ്യോമയാന അനലിറ്റിക്‌സ് സ്ഥാപനമായ സിറിയം (Cirium) അറിയിച്ചു. യൂറോപ്പിലെ തന്നെ ഏറ്റവും തിരക്കേറിയ ലണ്ടന്‍ ഹിത്രൂ വിമാനത്താവളത്തെയാണ് ഇത് കൂടുതല്‍ ബാധിച്ചത്.

രണ്ട് ദിവസങ്ങളിലായി 3.3 ലക്ഷത്തിലധികം യാത്രക്കാരെയാണ് സര്‍വീസ് തടസ്സം ബാധിച്ചതെന്ന് എയര്‍ലൈന്‍സ് യുകെ അറിയിച്ചു. ഇതില്‍ 1,55,000 ആളുകളുടെ യാത്രകള്‍ റദ്ദാക്കപ്പെടുകയും 1,80,000 പേരുടെ വിമാനങ്ങള്‍ വൈകുകയും ചെയ്തു. മണിക്കൂറുകളോളം വിമാനത്തിനുള്ളില്‍ കുടുങ്ങിക്കിടക്കേണ്ടി വന്ന യാത്രക്കാര്‍ക്ക് ലഗേജുകള്‍ തിരികെ ലഭിക്കാനും കടുത്ത പ്രയാസങ്ങള്‍ നേരിടേണ്ടി വന്നു.

അതേസമയം, യുകെ നാഷണല്‍ എയര്‍ ട്രാഫിക് സര്‍വീസിന് (NATS) സംഭവിച്ച തകരാര്‍ സൈബര്‍ ആക്രമണമല്ലെന്ന് സ്ഥാപന മേധാവി മാര്‍ട്ടിന്‍ റോള്‍ഫ് വ്യക്തമാക്കി. സംഭവത്തെക്കുറിച്ച് വിശദമായ അന്വേഷണം നടത്തുമെന്ന് അദ്ദേഹം അറിയിച്ചു.

പ്രതിസന്ധിയെ തുടര്‍ന്ന് ബ്രിട്ടീഷ് എയര്‍വേയ്സ് മാത്രം 550 ഓളം സര്‍വീസുകള്‍ റദ്ദാക്കി. ഇത് 85,000 യാത്രക്കാരെ ബാധിച്ചു. റയാന്‍എയറിന്റെ (Ryanair) അമ്പതോളം സര്‍വീസുകള്‍ റദ്ദാക്കുകയും 65,000-ത്തിലധികം യാത്രക്കാര്‍ ദുരിതത്തിലാകുകയും ചെയ്തു. മാഞ്ചസ്റ്റര്‍, ബര്‍മിംഗ്ഹാം, എഡിന്‍ബറ, ഡബ്ലിന്‍ വിമാനത്താവളങ്ങളിലെ സര്‍വീസുകളെയും തകരാര്‍ ബാധിച്ചു.

സംഭവത്തില്‍ സ്വതന്ത്ര അന്വേഷണത്തിന് ഗതാഗത സെക്രട്ടറി ഹൈഡി അലക്‌സാണ്ടര്‍ ഉത്തരവിട്ടിട്ടുണ്ട്. അന്വേഷണ റിപ്പോര്‍ട്ട് ആറ് മാസത്തിനുള്ളില്‍ സമര്‍പ്പിക്കും. സാങ്കേതിക തകരാര്‍ മൂലം യാത്ര തടസ്സപ്പെട്ടതിനാല്‍ വിമാനക്കമ്പനികളില്‍ നിന്ന് യാത്രക്കാര്‍ക്ക് നഷ്ടപരിഹാരം ലഭിക്കാന്‍ സാധ്യതയില്ലെന്നാണ് വ്യോമയാന റഗുലേറ്ററി അതോറിറ്റിയുടെ വിലയിരുത്തല്‍.