കോഴിക്കോട്: കഴിഞ്ഞ ഓഗസ്റ്റ് 18 ന് ആരംഭിച്ച നോര്ക്ക കെയര് പ്ലസ് മെഡിക്കല് ഇന്ഷുറന്സ് പദ്ധതിയില് അംഗമാകാനുള്ള സമയപരിധി സെപ്റ്റംബര് 18 ല് നിന്ന് രണ്ടാഴ്ചക്കാലത്തേക്ക് കൂടി നീട്ടണമെന്ന് പ്രവാസി ലീഗ് ആവശ്യപ്പെട്ടു.
മാതാപിതാക്കളെ കൂടി ചേര്ക്കാന് വലിയ തുക നല്കേണ്ടതുള്ളതിനാല് ചെറിയ വരുമാനക്കാരായ സാധാരണ പ്രവാസികള്ക്ക് സാമ്പത്തിക ബുദ്ധിമുട്ടുണ്ട്. അംഗത്വമെടുക്കാന് ആഗ്രഹിക്കുന്ന സാധാരണ പ്രവാസികള് തുക സ്വരൂപിച്ചു വരികയാണ്; അവര്ക്ക് പ്രയോജനപ്പെടുന്ന രീതിയില് സമയപരിധി നീട്ടി നല്കണമെന്ന് പ്രവാസി ലീഗ് സംസ്ഥാന ഭാരവാഹി യോഗം ആവശ്യപ്പെട്ടു.
വര്ഷം തോറും ഒരു മാസ ക്യാമ്പയിന് കാലം എന്ന രീതി മാറ്റി എപ്പോഴും അംഗത്വമെടുക്കാനും, ചേരുന്ന തീയതി മുതല് ഒരു വര്ഷക്കാലം അംഗത്വം നിലനിര്ത്തുകയും കാലാവധി തീരുന്ന മുറയ്ക്ക് പുതുക്കുകയും ചെയ്യുന്ന രീതിയില് ക്രമീകരിക്കണമെന്നും യോഗം അഭിപ്രായപ്പെട്ടു. നിലവില് വിദേശത്തുള്ള പ്രവാസികള്ക്കും മറുനാടന് മലയാളികള്ക്കുമാണ് അംഗത്വമെടുക്കാനുള്ള അര്ഹത. എന്നാല് മടങ്ങി വന്ന പ്രവാസികളെക്കൂടി ഉള്പ്പെടുത്തി ഇവ പരിഷ്കരിക്കണമെന്നും പ്രവാസി ലീഗ് ആവശ്യപ്പെട്ടു.
തൃശൂര് ജില്ലാ പ്രവാസി ലീഗ് പ്രസിഡന്റ് സി.കെ. അഷ്റഫലിയുടെ നിര്യാണത്തില് യോഗം അനുശോചനം രേഖപ്പെടുത്തി.
സംസ്ഥാന പ്രസിഡന്റ് ഹനീഫ മൂന്നിയൂര് അധ്യക്ഷത വഹിച്ചു. ഭാരവാഹികളായ കെ.പി. ഇമ്പിച്ചി മമ്മു ഹാജി, കാപ്പില് മുഹമ്മദ് പാഷ, കെ.സി. അഹ്മദ്, പി.എം.എ. ജലീല്, പി.എം.കെ. കാഞ്ഞിയൂര്, ഉമയനല്ലൂര് ശിഹാബുദീന്, കെ.വി. മുസ്തഫ, എന്.പി. ശംസുദ്ദീന്, ശുഐബ് അബ്ദുള്ളക്കോയ, കെ.കെ. അലി, സലാം വളാഞ്ചേരി എന്നിവര് പങ്കെടുത്തു.
Related News
