ജിദ്ദ: അബുദാബിയെ റെഡ് സീ ഇന്റര്നാഷണല് എയര്പോര്ട്ടുമായി ബന്ധിപ്പിക്കുന്ന വിമാന സര്വീസുകള് ഒക്ടോബര് 4 മുതല് ആരംഭിക്കുമെന്ന് റെഡ് സീ ഗ്ലോബല് അറിയിച്ചു. ആദ്യ വിമാനം ഒക്ടോബര് 4 ഞായറാഴ്ച അബുദാബിയിലെ സായിദ് അന്താരാഷ്ട്ര വിമാനത്താവളത്തില് നിന്ന് സര്വീസ് നടത്തും. തുടക്കത്തില് ഞായറാഴ്ചകളില് ആഴ്ചയിലൊരിക്കലായിരിക്കും സര്വീസ്. തുടര്ന്ന് ഒക്ടോബര് 25 മുതല് വ്യാഴം, ഞായര് ദിവസങ്ങളിലായി ആഴ്ചയില് രണ്ട് സര്വീസുകളായി ഉയര്ത്തും.
ആഗോള വ്യോമയാന ശൃംഖലയുമായി ഈ വിനോദസഞ്ചാര കേന്ദ്രത്തെ ബന്ധിപ്പിക്കുന്നത് യാത്രാസൗകര്യം വര്ദ്ധിപ്പിക്കാന് സഹായിക്കുമെന്ന് റെഡ് സീ ഗ്ലോബല് ഗ്രൂപ്പ് സിഇഒ ജോണ് പഗാനോ പറഞ്ഞു. അബുദാബിയില് നിന്ന് മൂന്ന് മണിക്കൂര് മാത്രമുള്ള ഈ ലക്ഷ്യസ്ഥാനത്തേക്ക് ഒക്ടോബര് 4 മുതല് വര്ഷം മുഴുവന് സര്വീസ് നടത്തുമെന്ന് ഇത്തിഹാദ് എയര്വേയ്സ് പ്രസ്താവനയില് വ്യക്തമാക്കി. റിയാദ്, ജിദ്ദ, ദമാം, മദീന, അല് ഖസീം എന്നിവയ്ക്ക് ശേഷം സൗദി അറേബ്യയിലെ ഇത്തിഹാദിന്റെ ആറാമത്തെ സര്വീസാണിത്.
സാധാരണയായി ദീര്ഘദൂര യാത്രകള് ആവശ്യമായി വരാറുള്ള ദ്വീപുകളും പവഴപ്പുറ്റുകളും നിറഞ്ഞ വിനോദസഞ്ചാര കേന്ദ്രങ്ങള് ഇനി അബുദാബിയില് നിന്ന് മിനിറ്റുകള്ക്കുള്ളില് എളുപ്പത്തില് പ്രാപ്യമാകുമെന്ന് ഇത്തിഹാദ് എയര്വേയ്സ് ചീഫ് എക്സിക്യൂട്ടീവ് ഓഫീസര് അന്റോണോ ആല്ഡോ നെവസ് പറഞ്ഞു. ജനറല് അതോറിറ്റി ഓഫ് സിവില് ഏവിയേഷന്, എയര് കണക്റ്റിവിറ്റി പ്രോഗ്രാം, എയര്പോര്ട്ട് ഓപ്പറേറ്ററായ ഡിഎഎ ഇന്റര്നാഷണല് എന്നിവരുടെ സഹകരണത്തോടെയാണ് സര്വീസുകള് ആരംഭിക്കുന്നത്.
ദ്വീപുകളും കടല്ത്തീരങ്ങളും മരുഭൂമി കാഴ്ചകളും ഉള്പ്പെടുന്ന ആഡംബര വിനോദസഞ്ചാര കേന്ദ്രമാണ് 'റെഡ് സീ' പദ്ധതി. ലോകത്തിലെ ഏറ്റവും വലിയ പവഴപ്പുറ്റുകളില് ഒന്നായ തബൂക്ക് പ്രവിശ്യയിലെ വടക്കുപടിഞ്ഞാറന് തീരത്ത് തൊണ്ണൂറിലധികം ദ്വീപുകളുണ്ട്.
നിലവില് സിക്സ് സെന്സസ് സതേണ് ഡ്യൂണ്സ്, നുജുമ (റിറ്റ്സ്-കാള്ട്ടണ് റിസര്വ്), ഫോര് സീസണ്സ് റിസോര്ട്ട് ആന്ഡ് റെസിഡന്സസ് തുടങ്ങി 11 റിസോര്ട്ടുകളാണ് ഇവിടെയുള്ളത്. വരും മാസങ്ങളില് 6 റിസോര്ട്ടുകള് കൂടി പ്രവര്ത്തനം ആരംഭിക്കും.
നിലവില് റിയാദ്, ജിദ്ദ, ദുബായ്, ദോഹ, മിലാന് എന്നിവിടങ്ങളിലേക്ക് ആഴ്ചയില് ഇരുപതോളം സര്വീസുകള് റെഡ് സീ ഇന്റര്നാഷണല് എയര്പോര്ട്ടില് നിന്ന് നടത്തുന്നുണ്ട്.
Related News
