റായ്പൂര്: നവരാത്രി ആഘോഷങ്ങളുടെ ഭാഗമായി നടക്കുന്ന ഗര്ബ, ദണ്ഡിയ പരിപാടികളില് മുസ്ലിംകള് പങ്കെടുക്കരുതെന്ന വിശ്വഹിന്ദു പരിഷത്ത് (വി.എച്ച്.പി) നേതാക്കളുടെ ആഹ്വാനത്തിനെതിരെ കേന്ദ്ര സാമൂഹികനീതിശാക്തീകരണ സഹമന്ത്രി രാംദാസ് അതാവാലെ. മതത്തിന്റെ പേരില് ഇത്തരം വിലക്കുകള് ഏര്പ്പെടുത്തുന്നത് ഭരണഘടനാപരമായി ന്യായീകരിക്കാനാവില്ലെന്നും എല്ലാ മതവിഭാഗങ്ങള്ക്കും തുല്യ അവകാശങ്ങളാണ് ഭരണഘടന ഉറപ്പുനല്കുന്നതെന്നും അദ്ദേഹം പറഞ്ഞു.
ഛത്തീസ്ഗഢിലെ റായ്പൂരില് ഏകദിന സന്ദര്ശനത്തിനിടെ മാധ്യമപ്രവര്ത്തകരോട് സംസാരിക്കുകയായിരുന്നു അതാവാലെ. വി.എച്ച്.പി നേതാക്കളുടെ പ്രസ്താവനകള് പരാമര്ശിച്ച അദ്ദേഹം, ഇന്ത്യയുടെ സാമൂഹിക ഘടനയുടെ അടിസ്ഥാന സവിശേഷതകളിലൊന്ന് വിവിധ മതസമുദായങ്ങള് തമ്മിലുള്ള സൗഹാര്ദവും പരസ്പര ആഘോഷങ്ങളിലെ പങ്കാളിത്തവുമാണെന്ന് വ്യക്തമാക്കി.
മഹാരാഷ്ട്രയിലെ വി.എച്ച്.പി നേതാക്കളാണ് ഗര്ബ, ദണ്ഡിയ പോലുള്ള നവരാത്രി ആഘോഷങ്ങളില് മുസ്ലിംകള് പങ്കെടുക്കുന്നതിനെതിരെ രംഗത്തെത്തിയത്. വിഗ്രഹാരാധനയില് വിശ്വസിക്കാത്തവര് ഇത്തരം ഹിന്ദു മതാചാരങ്ങളില് നിന്ന് വിട്ടുനില്ക്കണമെന്നാണ് അവരുടെ വാദം. ആഘോഷങ്ങളുടെ മതപരമായ സ്വഭാവവും വിശ്വാസികളുടെ അവകാശങ്ങളും സംരക്ഷിക്കണമെന്ന നിലപാടിലാണ് വി.എച്ച്.പി. പുറമേ നിന്നുള്ളവര് ഇത്തരം പരിപാടികളില് പ്രവേശിക്കുന്നത് ഒഴിവാക്കണമെന്നും ചില നേതാക്കള് ആവശ്യപ്പെട്ടിട്ടുണ്ട്.
ഇത്തരം നിലപാടുകളെയാണ് അതാവാലെ ചോദ്യം ചെയ്തത്. ഹിന്ദുക്കള്, മുസ്ലിംകള്, സിഖുകാര്, ക്രിസ്ത്യാനികള്, ജൈനര്, ബുദ്ധമതക്കാര്, ലിംഗായത്തുകള്, പാര്സികള് തുടങ്ങി വിവിധ സമുദായങ്ങള് ഒരുമിച്ച് ജീവിക്കുന്ന രാജ്യമാണ് ഇന്ത്യയെന്ന് അദ്ദേഹം ചൂണ്ടിക്കാട്ടി. ഡോ. ബി.ആര്. അംബേദ്കറുടെ നേതൃത്വത്തില് രൂപപ്പെട്ട ഭരണഘടന എല്ലാ പൗരന്മാര്ക്കും തുല്യനീതിയും സംരക്ഷണവും ഉറപ്പുനല്കുന്നുവെന്നും മന്ത്രി പറഞ്ഞു.
മറ്റ് മതങ്ങളുടെ ആഘോഷങ്ങളില് പങ്കെടുക്കാനുള്ള അവകാശം വിവിധ സമുദായങ്ങള്ക്കുണ്ടെന്നും അദ്ദേഹം വ്യക്തമാക്കി. ഇതിന് ഉദാഹരണമായി രാജസ്ഥാനിലെ അജ്മീര് ശരീഫ് ദര്ഗ അദ്ദേഹം ചൂണ്ടിക്കാട്ടി. വിവിധ മതവിഭാഗങ്ങളില്പ്പെട്ടവര് അവിടെ പതിവായി എത്തുന്നത് ഇന്ത്യയുടെ മതസൗഹാര്ദത്തിന്റെ ഉദാഹരണമാണെന്നും അതാവാലെ പറഞ്ഞു.
സംവരണത്തെക്കുറിച്ചുള്ള ചര്ച്ചകളിലും ഭരണഘടനാപരമായ അവകാശങ്ങള് സംരക്ഷിക്കണമെന്ന് അതാവാലെ ആവശ്യപ്പെട്ടു. ജാതിവിവേചനം പൂര്ണമായി ഇല്ലാതാകുന്നതുവരെ പിന്നാക്ക വിഭാഗങ്ങള്ക്കുള്ള സംവരണം തുടരണമെന്നാണ് അദ്ദേഹത്തിന്റെ നിലപാട്.
Related News
