റിയാദ്: ലോകമെമ്പാടുമുള്ള വ്യോമയാന മേഖലയിലെ പ്രമുഖ പുരസ്‌കാരമായ 2026-ലെ സ്‌കൈട്രാക്‌സ് വേള്‍ഡ് എയര്‍ലൈന്‍ റാങ്കിംഗില്‍ മികച്ച നേട്ടവുമായി സൗദിയുടെ ദേശീയ വിമാനക്കമ്പനിയായ 'സൗദിയ'. ലോകത്തെ മികച്ച എയര്‍ലൈനുകളുടെ പട്ടികയില്‍ 15-ാം റാങ്ക് നേടിയാണ് സൗദിയ വന്‍ മുന്നേറ്റം നടത്തിയത്.

ലണ്ടനില്‍ നടന്ന സ്‌കൈട്രാക്‌സ് വേള്‍ഡ് എയര്‍ലൈന്‍ അവാര്‍ഡ് ദാന ചടങ്ങിലാണ് നേട്ടം പ്രഖ്യാപിച്ചത്. തുടര്‍ച്ചയായ വികസനത്തിലൂടെ സൗദിയ അന്താരാഷ്ട്ര തലത്തില്‍ തങ്ങളുടെ സാന്നിധ്യം ഉറപ്പിക്കുകയാണെന്ന് പ്രഖ്യാപിച്ച അവാര്‍ഡ് ചടങ്ങില്‍, മിഡില്‍ ഈസ്റ്റ് മേഖലയിലെ പ്രമുഖ പുരസ്‌കാരങ്ങളും എയര്‍ലൈന്‍ കരസ്ഥമാക്കി.

യാത്രയുടെ വിവിധ ഘട്ടങ്ങളില്‍ (എയര്‍പോര്‍ട്ട് ഗ്രൗണ്ട് സര്‍വീസ് മുതല്‍ വിമാനത്തിനുള്ളിലെ അനുഭവം വരെ) മികച്ച സേവനം നല്‍കിയതിന് തുടര്‍ച്ചയായ രണ്ടാം വര്‍ഷവും ഈ പുരസ്‌കാരം സൗദിയ സ്വന്തമാക്കി. വിമാനത്തിനുള്ളിലെ മികച്ച ആതിഥ്യമര്യാദയ്ക്കും സേവനത്തിനും ഒന്നാം സ്ഥാനവും സൗദിയ നേടി.

കഴിഞ്ഞ രണ്ട് വര്‍ഷത്തിനിടെ അഞ്ച് സ്ഥാനങ്ങളാണ് സൗദിയ ആഗോള റാങ്കിംഗില്‍ മെച്ചപ്പെടുത്തിയത്. 2024-ല്‍ 20-ാം സ്ഥാനത്തായിരുന്ന സൗദിയ, 2025-ല്‍ 17-ാം സ്ഥാനത്തേക്കും ഇപ്പോള്‍ 2026-ല്‍ 15-ാം സ്ഥാനത്തേക്കും ഉയരുകയായിരുന്നു.
'ഈ നേട്ടം ലോകത്തെ മുന്‍നിര വിമാനക്കമ്പനികള്‍ക്കിടയില്‍ സൗദിയയുടെ സാന്നിധ്യം കൂടുതല്‍ ശക്തമാക്കുന്നു. തങ്ങളുടെ തന്ത്രപരമായ പദ്ധതികള്‍ യാഥാര്‍ത്ഥ്യമാക്കി യാത്രക്കാര്‍ക്ക് മികച്ച അനുഭവമാക്കാന്‍ ജീവനക്കാര്‍ക്ക് സാധിക്കുന്നുണ്ട്. സൗദിയുടെ പരമ്പരാഗത ആതിഥ്യമര്യാദ ലോകത്തിന് മുന്നില്‍ എത്തിക്കുന്നതില്‍ മനുഷ്യവിഭവശേഷിക്കുള്ള പങ്ക് വലുതാണ്. മനുഷ്യവിഭവശേഷി, സാങ്കേതികവിദ്യ, ഉല്‍പ്പന്നങ്ങളുടെ നിലവാരം എന്നിവയില്‍ തുടരുന്ന നിക്ഷേപം ഇനിയും വര്‍ദ്ധിപ്പിക്കും- സൗദിയ ഗ്രൂപ്പ് സി.ഇ.ഒ ഇബ്രാഹിം അല്‍-ഉമര്‍ പറഞ്ഞു.