നഗോയ: ഏഷ്യന്‍ ഗെയിംസിന്റെ പത്താം ദിനത്തില്‍ ഷൂട്ടിങ്ങില്‍ ഇന്ത്യക്ക് ചരിത്രനേട്ടം. വനിതകളുടെ ട്രാപ്പ് വ്യക്തിഗത ഇനത്തില്‍ നീരു ധണ്ഡ ചരിത്രത്തിലാദ്യമായി ഇന്ത്യക്ക് സ്വര്‍ണം നേടിയപ്പോള്‍, വനിതാ ടീം വെള്ളിയും സ്വന്തമാക്കി. ഏഷ്യന്‍ ഗെയിംസ് ട്രാപ്പില്‍ വ്യക്തിഗത മെഡല്‍ നേടുന്ന ആദ്യ ഇന്ത്യന്‍ വനിതയെന്ന നേട്ടവും നീരു സ്വന്തമാക്കി.
വനിതാ ട്രാപ്പ് യോഗ്യതയില്‍ 118 പോയിന്റുമായി ഖത്തറിന്റെ റേ ബാസിലിനൊപ്പം ഒന്നാം സ്ഥാനത്തെത്തിയ നീരു ഷൂട്ടോഫിലൂടെയാണ് ഫൈനലിലേക്ക് ഒന്നാം സീഡായി കടന്നത്. ഫൈനലിലും അതിശയകരമായ സ്ഥിരത കാഴ്ചവെച്ച താരത്തിന് 30 ഷോട്ടുകളില്‍ രണ്ടെണ്ണം മാത്രമാണ് പിഴച്ചത്. അവസാന ഘട്ടത്തില്‍ കൃത്യമായ ഷോട്ടുകളിലൂടെ ലീഡ് ഉറപ്പിച്ച നീരു 28 പോയിന്റുമായി സ്വര്‍ണം സ്വന്തമാക്കി. ഈ പ്രകടനത്തോടെ ഏഷ്യന്‍ ഗെയിംസ് റെക്കോര്‍ഡിനൊപ്പവും താരം എത്തി.
നീരു, ആശിമ അഹ്ലാവത്, മനീഷ കീര്‍ എന്നിവര്‍ ഉള്‍പ്പെട്ട ഇന്ത്യന്‍ വനിതാ ട്രാപ്പ് ടീം നേരത്തെ വെള്ളി നേടിയിരുന്നു. 328 പോയിന്റാണ് ഇന്ത്യ നേടിയത്. 346 പോയിന്റുമായി ചൈന സ്വര്‍ണം നേടിയപ്പോള്‍ 325 പോയിന്റുമായി കുവൈത്ത് വെങ്കലം കരസ്ഥമാക്കി.
പുരുഷന്മാരുടെ ട്രാപ്പ് വ്യക്തിഗത ഇനത്തില്‍ ഇന്ത്യയുടെ ശപത് ഭരദ്വാജിന് പ്രതീക്ഷിച്ച നേട്ടം കൈവരിക്കാനായില്ല. യോഗ്യതയില്‍ 117 പോയിന്റുമായി ഏഴാം സ്ഥാനം പങ്കിട്ട ശപത് ഷൂട്ടോഫിലൂടെയാണ് എട്ടാമനായാണ് ഫൈനലില്‍ പ്രവേശിച്ചത്. എന്നാല്‍ ആദ്യ എലിമിനേഷന്‍ റൗണ്ടില്‍ തന്നെ പുറത്തായി. രണ്ടാം സീരീസില്‍ അഞ്ച് ഷോട്ടുകളില്‍ നാല് എണ്ണം കൃത്യമായി ലക്ഷ്യത്തിലെത്തിച്ചെങ്കിലും മുന്നേറാന്‍ അത് മതിയായില്ല.
നീരു ധണ്ഡയുടെ സ്വര്‍ണത്തോടെ ഇന്ത്യ 47 മെഡലുകളുമായി 11ാം സ്ഥാനത്തേക്കുയര്‍ന്നു. സ്വര്‍ണ മെഡലുകളുടെ എണ്ണവും അഞ്ചായി.
ഷൂട്ടിങ്ങിന് പുറമെ അത്‌ലറ്റിക്‌സിലും ഇന്ത്യ മെഡലുകള്‍ സ്വന്തമാക്കി. ബോക്‌സിങ്ങിലും ഇന്ത്യന്‍ താരങ്ങള്‍ ക്വാര്‍ട്ടര്‍ഫൈനല്‍ വിജയങ്ങളിലൂടെ കൂടുതല്‍ മെഡലുകള്‍ ഉറപ്പിച്ചിട്ടുണ്ട്.