റിയാദ്: റിയാദിലെ സാമൂഹിക-പ്രസ്ഥാനിക രംഗങ്ങളില് സജീവമായി പ്രവര്ത്തിച്ചിരുന്നവരില്, ഗുരുതര രോഗങ്ങളും സാമ്പത്തിക പ്രയാസങ്ങളും കാരണം നാട്ടില് ദുരിതമനുഭവിക്കുന്ന മുന്കാല പ്രവാസികള്ക്കും മരണപ്പെട്ട പ്രവാസി കുടുംബങ്ങള്ക്കും കൈത്താങ്ങായി റിയാദ് ഇന്ത്യന് കള്ച്ചറല് ഫൗണ്ടേഷന്റെ (ഐ.സി.എഫ്) 'സ്നേഹസ്പര്ശം' മൂന്നാം ഘട്ട ജീവകാരുണ്യ പദ്ധതിക്ക് തുടക്കമായി.
2026 സെപ്റ്റംബര് മുതല് 2027 ഓഗസ്റ്റ് വരെയുള്ള ഒരു വര്ഷക്കാലയളവിലാണ് പദ്ധതിയുടെ മൂന്നാം ഘട്ടം നടപ്പിലാക്കുന്നത്. നിത്യരോഗങ്ങളാല് പ്രയാസമനുഭവിക്കുന്നവരും ദൈനംദിന മരുന്നുകള് വാങ്ങാന് പോലും സാമ്പത്തികമായി ബുദ്ധിമുട്ടുന്നവരുമായ തെരഞ്ഞെടുത്ത മുന്കാല പ്രവാസികള്ക്ക് പദ്ധതിയിലൂടെ കൃത്യമായ പ്രതിമാസ ധനസഹായം നേരിട്ട് ലഭ്യമാക്കും. കൂടാതെ, മരണപ്പെട്ട മുന് പ്രവാസികളുടെ കുടുംബങ്ങള്ക്കും പദ്ധതിയുടെ ഭാഗമായി പൂര്ണ്ണ പിന്തുണ നല്കും.
പദ്ധതിയുടെ നടത്തിപ്പിനായി പ്രതിമാസം ആവശ്യമായി വരുന്ന ഏകദേശം ഒരു ലക്ഷം രൂപയുടെ ധനസഹായം അല് ഖുദ്സ് ഉംറ സര്വീസ് വഴിയാണ് കണ്ടെത്തുന്നത്. പ്രവാസ ലോകത്ത് നിരവധി നിര്ധനര്ക്ക് ആശ്വാസവും അഭയവുമായി മാറിയ അല് ഖുദ്സ് ഉംറ സര്വീസിലൂടെ ലഭിക്കുന്ന തുക പൂര്ണ്ണമായും അശരണരായ കുടുംബങ്ങളുടെ ക്ഷേമത്തിനായി മാറ്റിവെക്കുകയാണ്.
പ്രവാസ ഭൂമിയില് സാമൂഹിക-ജീവകാരുണ്യ പ്രവര്ത്തനങ്ങള്ക്ക് നേതൃത്വം നല്കിയ മുന്കാല പ്രവര്ത്തകരെയും അവരുടെ കുടുംബങ്ങളെയും ചേര്ത്തുപിടിക്കുന്ന ഈ മാതൃകാപരമായ പദ്ധതി, സംഘടനയുടെ കാരുണ്യത്തിന്റെയും സാമൂഹിക പ്രതിബദ്ധതയുടെയും മികച്ച ഉദാഹരണമാണെന്ന് ഭാരവാഹികള് അറിയിച്ചു.
Related News
