ജിദ്ദ: പൗരന്റെ മൗലികാവകാശമായ വോട്ടവകാശം നിഷേധിക്കപ്പെടുന്നതിനെതിരെ രാജ്യവ്യാപകമായി നടക്കുന്ന പ്രതിഷേധത്തിന് ഐക്യദാര്‍ഢ്യം പ്രഖ്യാപിച്ച് ജിദ്ദ മലപ്പുറം ജില്ലാ കെഎംസിസി പ്രതിഷേധ പ്രൊഫൈല്‍ ക്യാമ്പയിന്‍ സംഘടിപ്പിച്ചു. 'രാജ്യദ്രോഹികളെ തുറങ്കിലടക്കുക, ജനാധിപത്യം സംരക്ഷിക്കുക' എന്ന മുദ്രാവാക്യമുയര്‍ത്തി 'പൗരാവകാശ ലംഘനത്തിനെതിരെ ജിദ്ദ മലപ്പുറം ജില്ലാ കെഎംസിസി പ്രതിഷേധ പ്രൊഫൈല്‍ ക്യാമ്പയിന്‍' എന്ന പേരിലാണ് പരിപാടി നടന്നത്.
ജില്ലാ കെഎംസിസി ഹാളില്‍ നടന്ന പരിപാടി കെഎംസിസി ദേശീയ ഉപാധ്യക്ഷന്‍ നിസാം മമ്പാട് ഉദ്ഘാടനം ചെയ്തു. ജില്ലാ പ്രസിഡന്റ് ഇസ്മയില്‍ മണ്ടുപറമ്പ് അധ്യക്ഷത വഹിച്ചു. ജനറല്‍ സെക്രട്ടറി നാസര്‍ ഇസ്ഹാഖ് മാസ്റ്റര്‍ സ്വാഗതം പറഞ്ഞു.
നാസര്‍ വെളിയങ്കോട് വിഷയാവതരണം നടത്തി. വോട്ടവകാശം ഭരണഘടന ഉറപ്പുനല്‍കുന്ന അവകാശമാണെന്നും അത് ഇല്ലാതാക്കുന്നത് ജനാധിപത്യവിരുദ്ധ നടപടിയാണെന്നും അദ്ദേഹം പറഞ്ഞു. ഇത്തരം പ്രവര്‍ത്തനങ്ങള്‍ക്ക് പിന്നില്‍ പ്രവര്‍ത്തിച്ച മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ രാജിവെക്കണമെന്നും അദ്ദേഹത്തിനെതിരെ കര്‍ശന നിയമനടപടി സ്വീകരിക്കണമെന്നും യോഗം ആവശ്യപ്പെട്ടു.
രാഷ്ട്രീയഭേദമന്യേ സമൂഹം മുഴുവന്‍ ഈ ക്യാമ്പയിനില്‍ അണിചേരണമെന്നും പ്രതിഷേധത്തിന്റെ ഭാഗമാകണമെന്നും ഭാരവാഹികള്‍ അഭ്യര്‍ത്ഥിച്ചു. ഭാരവാഹികളും പ്രമുഖ നേതാക്കളും സംബന്ധിച്ച പരിപാടിയില്‍ മുഹമ്മദ് യാസിദ് എ.പി. നന്ദി പറഞ്ഞു.
Related News
