ജിദ്ദ: പതിമൂന്നാം വര്‍ഷത്തേക്കുള്ള സൗദി കെഎംസിസി സാമൂഹ്യ സുരക്ഷാ അംഗത്വ ക്യാമ്പയിന്‍ ഒക്ടോബര്‍ 15ന് ആരംഭിക്കും. ഡിസംബര്‍ 31 വരെ ക്യാമ്പയിന്‍ തുടരും. ഈ പദ്ധതിയില്‍ ജിദ്ദയിലെ മുഴുവന്‍ മലയാളി പ്രവാസികളെയും അംഗങ്ങളാക്കി ക്യാമ്പയിന്‍ വിജയിപ്പിക്കണമെന്ന് സൗദി കെഎംസിസി നാഷണല്‍ കമ്മിറ്റി പ്രസിഡന്റ് കുഞ്ഞുമോന്‍ കാക്കിയ അഭ്യര്‍ത്ഥിച്ചു. ജിദ്ദ കെഎംസിസി സെന്‍ട്രല്‍ കമ്മിറ്റിക്ക് കീഴിലുള്ള സാമൂഹ്യ സുരക്ഷാ കോര്‍ഡിനേറ്റര്‍മാരുടെ യോഗത്തില്‍ സംസാരിക്കുകയായിരുന്നു അദ്ദേഹം.
പദ്ധതിയുടെ ഇതുവരെയുള്ള പ്രവര്‍ത്തനങ്ങളും സ്ഥിതിവിവരക്കണക്കുകളും കോര്‍ഡിനേറ്റര്‍ റഫീഖ് പാറക്കല്‍ അവതരിപ്പിച്ചു. പദ്ധതിയുടെ നിയമാവലിയും പുതിയ മൊബൈല്‍ ആപ്ലിക്കേഷനും യോഗത്തില്‍ പരിചയപ്പെടുത്തി. അംഗത്വ നടപടികള്‍ കൂടുതല്‍ കാര്യക്ഷമമാക്കുന്നതിനും പദ്ധതിയുടെ പ്രവര്‍ത്തനങ്ങള്‍ ഏകോപിപ്പിക്കുന്നതിനുമുള്ള പുതിയ സംവിധാനങ്ങളെക്കുറിച്ചും വിശദീകരണം നല്‍കി.
കഴിഞ്ഞ ഒരു ദശകത്തിലേറെയായി സൗദി അറേബ്യയിലെ വിവിധ സെന്‍ട്രല്‍ കമ്മിറ്റികള്‍ക്ക് കീഴില്‍ ഏകദേശം ഒരു ലക്ഷത്തോളം പ്രവാസികളെ അംഗങ്ങളാക്കി സൗദി കെഎംസിസി നടപ്പാക്കിവരുന്ന സാമൂഹ്യ സുരക്ഷാ പദ്ധതി, നിരവധി പ്രവാസി കുടുംബങ്ങള്‍ക്ക് ആശ്വാസമായി കോടിക്കണക്കിന് രൂപയുടെ സഹായം ഇതിനകം ലഭ്യമാക്കിയിട്ടുണ്ട്. പ്രവാസി സമൂഹത്തിന്റെ പിന്തുണയോടെ പദ്ധതി വിജയകരമായി 12 വര്‍ഷം പൂര്‍ത്തിയാക്കിയതായി നേതാക്കള്‍ അറിയിച്ചു.
പതിമൂന്നാം വര്‍ഷത്തേക്കുള്ള അംഗത്വ ക്യാമ്പയിന്‍ ഒക്ടോബര്‍ 15ന് ആരംഭിച്ച് ഡിസംബര്‍ 31ന് അവസാനിക്കും. ജിദ്ദയിലെ മുഴുവന്‍ മലയാളി പ്രവാസികളെയും പദ്ധതിയില്‍ അംഗങ്ങളാക്കി ക്യാമ്പയിന്‍ വിജയിപ്പിക്കുന്നതിന് യോഗം തീരുമാനിച്ചു.
ജിദ്ദ കെഎംസിസി പ്രസിഡന്റ് അബൂബക്കര്‍ അരിമ്പ്ര അധ്യക്ഷത വഹിച്ചു. സൗദി നാഷണല്‍ കെഎംസിസി ഭാരവാഹികളായ കാദര്‍ ചെങ്കള, അഹമ്മദ് പാളയാട്ട്, നിസാം മമ്പാട്, ബഷീര്‍ മൂന്നിയൂര്‍, ഫൈസല്‍ ബാബു എന്നിവര്‍ സംസാരിച്ചു. ജിദ്ദ കെഎംസിസി ജനറല്‍ സെക്രട്ടറി വി.പി. മുസ്തഫ സ്വാഗതവും പദ്ധതി കണ്‍വീനര്‍ ഉസ്മാന്‍ അലി പാലത്തിങ്ങല്‍ നന്ദിയും പറഞ്ഞു.
