ബുറൈദ: സൗദി അറേബ്യയിലെ ബുറൈദയില്‍ മരിച്ച കൊല്ലം കാറ്റാടി സ്വദേശി സാവിന്‍ സാബുവിന്റെ (29) മൃതദേഹം 'കനിവ്' ജീവകാരുണ്യ കൂട്ടായ്മയുടെ ഇടപെടലിനെ തുടര്‍ന്ന് നാട്ടിലെത്തിച്ചു. സെപ്റ്റംബര്‍ 18-നാണ് ബുറൈദയിലെ താമസസ്ഥലത്ത് സാവിന്‍ സാബുവിനെ മരിച്ച നിലയില്‍ കണ്ടെത്തിയത്. കൊല്ലം കാറ്റാടി 'സാബു വില്ലയില്‍' സാബു ചാക്കോ - ലീലാമ്മ ദമ്പതികളുടെ മകനാണ്. മൂന്ന് മാസം മുമ്പാണ് ആശ്രിത വിസയില്‍ സാവിന്‍ സാബു ബുറൈദയിലെത്തിയത്.
ഒന്‍പത് മാസം മുമ്പായിരുന്നു സിമിയുമായുള്ള വിവാഹം. സിമി എം.സി.എച്ചില്‍ സ്റ്റാഫ് നഴ്‌സായി ജോലി ചെയ്യുന്നു. താമസസ്ഥലത്ത് മരിച്ച നിലയില്‍ കണ്ടെത്തിയ സാവിന്‍ സാബുവിന്റെ മരണം ആത്മഹത്യയാണെന്നാണ് ഫോറന്‍സിക് പരിശോധനയിലെ കണ്ടെത്തല്‍.
റിയാദില്‍ നിന്ന് എയര്‍ ഇന്ത്യ വിമാനത്തിലാണ് മൃതദേഹം തിരുവനന്തപുരം വിമാനത്താവളത്തിലെത്തിച്ചത്. ബന്ധുക്കള്‍ മൃതദേഹം ഏറ്റുവാങ്ങി കാറ്റാടിയിലെ വീട്ടിലെത്തിക്കുകയും തുടര്‍ന്ന് ബന്ധുക്കളുടെയും നാട്ടുകാരുടെയും സാന്നിധ്യത്തില്‍ സംസ്‌കാരച്ചടങ്ങുകള്‍ നടത്തുകയും ചെയ്തു.
മരണാനന്തര നടപടിക്രമങ്ങള്‍ പൂര്‍ത്തിയാക്കി മൃതദേഹം നാട്ടിലെത്തിക്കുന്നതിന് 'കനിവ്' ജീവകാരുണ്യ കൂട്ടായ്മ അംഗം സലാം പാറട്ടി നേതൃത്വം നല്‍കി.
-ഇക്ബാല്‍ പള്ളിമുക്ക്
Related News
